முகங்கள் - 2014

மாற்றத்தின் முகங்கள்

கடந்த ஆண்டைப் போலவே இந்த ஆண்டின் 10 முகங்களை இங்கே பட்டியலிட்டிருக்கிறோம். கடந்த ஆண்டின் பட்டியலோடு இந்தப் பட்டியலை ஒப்பிட்டுப்பார்த்தாலே இந்தியா எந்த அளவுக்கு மாற்றங்களின், ஆச்சர்யங்களின் தேசமாக இருந்துவருகிறது என்பது நமக்குப் புரியும்.

கடந்த ஆண்டின் பட்டியலில் இடம்பெற்றவர்களின் வரிசை இது: அரவிந்த் கெஜ்ரிவால், நரேந்திர மோடி, சச்சின் டெண்டுல்கர், பாட்மின்டன் வீராங்கனை சிந்து, ராகுல் காந்தி, ரகுராம் ராஜன், அருந்ததி பட்டாச்சார்யா, ராமச்சந்திர குஹா, நவீன் பட்நாயக், கே. சந்துரு. இரண்டு பட்டியலிலும் இடம்பெற்றிருக்கும் ஒரே பெயர் மோடி. கடந்த ஆண்டு பட்டியலில் முதல் இடத்தைப் பெற்றிருந்த கேஜ்ரிவால் இந்த ஆண்டு பட்டியலிலிருந்து காணாமல் போனதற்கு அவரே முழுக் காரணம். பட்டியலிலிருந்து ராகுல் காந்தி காணாமல் போனதற்கு அவருடைய கட்சியும், அந்தக் கட்சியின் தலைமையிலான 10 ஆண்டு ஆட்சியுமே காரணம். மற்றவர்கள், கால மாற்றத்தின் விளைவால் வேறு ஆளுமைகளுக்கு வழிவிட்டிருக்கிறார்கள்.

கடந்த ஆண்டைப் போலவே இந்தப் பட்டியலும் சாதனையாளர்கள் அல்லது தலைசிறந்தவர்கள் அல்லது வெற்றியாளர்களின் பட்டியல் அல்ல. 2014-ன் முகங்கள், அவ்வளவே. அந்தந்த துறைகளில் இந்த ஆண்டின் போக்கைத் தீர்மானித்தவர்கள் இவர்கள்.

கடந்த ஆண்டின் பட்டியலை நம்பிக்கையின் பட்டியல் என்ற வகையில் வரையறுத்திருந்தோம். இந்த ஆண்டின் பட்டியலை மாற்றத்தின் பட்டியல் என்று சொல்லலாம். ஓராண்டுக்குள் இந்தியாவில் ஏற்பட்ட தலைகீழ் மாற்றங்களின் பிரதிபலிப்பு என்று இதைச் சொல்லலாம். அரசியல், மக்களின் மனப்போக்கு, கலை, இலக்கியம் போன்றவற்றிலும் இந்த மாற்றம் வெகுவாகப் பிரதிபலிக்கிறது.

அந்த மாற்றத்தின் பிரதிநிதிகள்தான் இதில் இடம்பிடித்திருக்கும் ஆளுமைகள். இவர்கள் அடுத்த ஆண்டு பட்டியலிலும் இடம்பிடிப்பார்கள் என்றால் அவர்கள் மக்களின் நம்பிக்கையையோ கவனத்தையோ இழக்கவில்லை என்றே அர்த்தம். மக்களின் நம்பிக்கையைப் பொருட்படுத்தாதவர்களை மக்கள் வெகு விரைவில் மறந்துவிடுவார்கள் என்பதே வரலாறு. பொறுத்திருந்து பார்ப்போம்!

நரேந்திர மோடி, 64

"நான் உங்களுக்கு உறுதியளிக்கிறேன். நீங்கள் 12 மணிநேரம் வேலை செய்தால் நான் 13 மணி நேரம் வேலை செய்வேன். நீங்கள் 14 மணி நேரம் வேலை செய்தால் நான் 15 மணி நேரம் வேலை செய்வேன். ஏன்? ஏனென்றால், நான் பிரதம மந்திரி அல்ல, பிரதம சேவகன்"

இவர்...

இந்த ஆண்டின் முகங்கள் பட்டியலில் முதலிடத்துக்கு யாரைத் தேர்ந்தெடுப்பது என்ற கேள்விக்கே பத்திரிகையாளர்களுக்கு வாய்ப்பே தராத அளவுக்கு இந்த வருடத்தை ஆக்கிரமித்தார். ஒரு டீக்கடைக்காரரின் மகனாகப் பிறந்து, எல்லையற்ற நம்பிக்கையும் உறுதியும் கலந்த உத்வேகத்துடன் உழைத்து, இந்தியாவின் பிரதமராக உயர்ந்திருக்கிறார் நரேந்திர தாமோதர தாஸ் மோடி.

இவர்...

இந்தப் பிரதமர் தேர்தலையே அதிபர் தேர்தல் போன்று உருமாற்றினார். 3 லட்சம் கி.மீ. பயணம், 437 நேரடிப் பொதுக்கூட்டங்கள், 3டி தொழில்நுட்ப உதவியுடன் 1,350 பேரணிகள், விடியோ கான்ஃபிரன்சிங் தொழில்நுட்ப உதவியுடன் சுமார் 4,000 டீக்கடை விவாதங்கள் என இவர் பங்கேற்ற 5,385 தேர்தல் நிகழ்ச்சிகள்தான் இந்தியத் தேர்தல் வரலாற்றின் மாபெரும் பிரச்சாரம்.

இவர்...

பாஜகவுக்குப் பெற்றுக்கொடுத்த 282 இடங்கள் இதுவரை காங்கிரஸ் அல்லாத எந்தக் கட்சியும் பெற்றிராத இடங்கள். இதன் மூலம் 30 ஆண்டு காலக் கூட்டணி யுகத்தை முடிவுக்குக் கொண்டுவந்தார். தன்னுடைய வெற்றியின் மூலம் கட்சிக்குள்ளும் கட்சிக்கு வெளியிலும் தன்னை அசைக்க முடியாதவராக மாற்றிக்கொண்டார். தன்னுடைய சகாவான அமித் ஷாவைக் கட்சியின் தலைவராக்கியதன் மூலம் கட்சி - ஆட்சி இரண்டையுமே தன் கைக்குள் கொண்டுவந்துவிட்டார்.

இவர்...

இந்தியாவுக்கு வெளியிலும் தன்னை ஜனரஞ்சகத் தலைவராக நிறுவிக்கொள்ள ஆரம்பித்திருக்கிறார். ஜப்பான், அமெரிக்கா, ஆஸ்திரேலியாவில் இவர் பேசிய கூட்டங்கள் இந்தியர்களைத் தாண்டியும் பலரையும் வசீகரித்தது.

இவர்...

கோஷங்களை உருவாக்கி நடத்தும் அரசியலுக்கு முன் எதிர்க்கட்சிகளின் வியூகங்கள் பொய்த்துப்போகின்றன.

இவர்...

ஒரே சமயத்தில் அமெரிக்கா, ரஷ்யா ஆகிய இரண்டு நாடுகளுடனும் உறவைப் பேணும் ராஜதந்திரம், “மீண்டும் பனிப்போர் நிகழும் அறிகுறிகள் தென்படுகின்றன” என்று சோவியத் ஒன்றிய முன்னாள் அதிபர் கோர்பசேவ் எச்சரித்திருக்கும் சூழலில் மிகவும் முக்கியத்துவம் பெறுகிறது.

இவர்...

பிரதமரான பின்னரும் தேர்தல் பிரச்சாரங்களுக்கு ஓய்வளிக்கவில்லை. மகாராஷ்டிரம், ஹரியாணா, ஜார்கண்ட் மாநிலங்களில் பாஜக ஆட்சியைப் பிடிக்கவும் ஜம்மு காஷ்மீரில் வலுவாக எழுந்து நிற்கவும் இவருடைய சூறாவளிப் பிரச்சாரமும் ஒரு முக்கியக் காரணம்.

இவர்...

செயல்பாடுகள்தான் - அவை நல்லவையானாலும் தீயவையானாலும் - இந்தியாவின் இன்றைய அரசியல் போக்கைத் தீர்மானிக்கின்றன.

அமித் ஷா, 50

"ராகுல் அணிந்திருப்பது இத்தாலியில் தயாரான குளிர்கண்ணாடி, அவரால் இந்திய எல்லையைச் சரியாகப் பார்க்க முடியாது "

இவர்...

மோடியின் தளபதி. பிரதமர் மோடி நினைப்பதை முடிப்பவராக இவர் கருதப்படுகிறார்.

இவர்...

யாருமே எதிர்பாராத வகையில், 2014 மக்களவைத் தேர்தலில் உத்தரப் பிரதேசத்தில் 80 தொகுதிகளில் 71 தொகுதிகளை பாஜகவுக்குப் பெற்றுத்தந்ததன் மூலம் கட்சி தனிப் பெரும்பான்மை பெற வழிவகுத்தார்.

இவர்...

நாட்டின் மிகப் பெரிய கட்சியாக உருவெடுக்கும் கனவில் இருக்கும் பாஜகவின் தலைவர்.

இவர்...

பேச்சுக்கும் நடவடிக்கைக்கும் ஈடுகொடுக்கக் கூடிய அளவுக்கு ஏனைய கட்சிகளில் துடிப்பான தலைவர்கள் எங்கே என்று தன் கட்சியினரைக் கேட்கவைத்திருக்கிறார், மிகக் குறுகிய காலத்தில்.

இவர்...

தன் வியூகங்களால் பாஜக இதுவரை கால் பதிக்க முடியாத தமிழகம், கேரளம் போன்ற மாநிலங்களில்கூடக் கட்சியை உயிர்ப்பாகவும் துடிப்பாகவும் செயல்பட வைக்கிறார். இவர் தங்கள் மாநிலத்துக்கு வருகிறார் என்றால், மாநிலக் கட்சிகள் பதற்றம் அடைகின்றன. மேற்கு வங்கத்தில் இவர் பேசவிருந்த கூட்டத்துக்கு மறுக்கப்பட்ட அனுமதி இவர் மீது திரிணமுல் கட்சியினருக்கு இருந்த அச்சத்தைக் காட்டியது.

கைலாஷ் சத்யார்த்தி, 60

"தனித்து விடப்பட்ட லட்சக்கணக்கான குழந்தைகளின் மவுனத்தின் சாட்சியாகப் பேசுகிறேன். நாகரிகச் சமூகத்தில் குழந்தைகளுக்கு எதிரான குற்றங்களுக்கு இடமே இல்லை. ஒவ்வொரு குழந்தையும் சுதந்திரமாக வளர வேண்டும் என்பதே எனது கனவாகும். அவர்களின் கனவுகளைச் சிதைப்பதைவிடப் பெரிய வன்முறை எதுவுமில்லை! "

இவர்...

2014-ம் ஆண்டுக்கான அமைதிக்கான நோபல் பரிசை மலாலாவுடன் இணைந்து பெற்றதன் மூலம் இந்தியாவின் நோபல் விருதாளர்கள் பட்டியல் மேலும் விரிவடைந்தது. 1980-களில் கொத்தடிமைகளின் மறுவாழ்வுக்காக இந்தியாவில் தொடங்கப்பட்ட முதல் அமைப்பான ‘பச்பன் பச்சாவோ அந்தோலன்’ இவர் தொடங்கியது. இன்று வரை குழந்தைத் தொழிலாளர்களுக்காகப் போராடும் வலுவான அமைப்புகளில் ஒன்றாக அதை வைத்திருக்கிறார்.

இவர்...

1981-ல் தொடங்கிய கொத்தடிமைகள் மீட்பு இயக்கம் இன்று பல நூற்றுக் கணக்கான குழந்தைகளைக் கொத்தடிமை முறையிலிருந்து மீட்டிருக்கிறது.

இவர்...

இளம் வயதிலிருந்தே சமூக அக்கறையுடன் வளர்ந்தவர், சாதிப் பாகுபாட்டையும் வெறுத்தவர். சாதி அடையாளமான ‘சர்மா’ எனும் பெயரை நறுக்கிவிட்டு, தனது பெயரை கைலாஷ் சத்யார்த்தி என்று மாற்றிக்கொண்டவர் (சத்யார்த்தி என்றால், ‘உண்மையை விரும்புபவர்’ என்று பொருள்). பின்னாளில், தாழ்த்தப்பட்டோர் ஆலய நுழைவுப் போராட்டம் உள்ளிட்ட பல சமூகநீதிப் போராட்டங்களை நடத்தியவர்.

மைக்கேல் டி குன்ஹா, 55

"ஊழலை அளவின் அடிப்படையில் தீர்மானிக்கக் கூடாது. ஊழல்தான் ஒழுங்கீனத்தின் தாய். அது சமூக முன்னேற்றத்தை அழிக்கிறது, தகுதியற்ற ஆசைகளை வளர்க்கிறது, மனசாட்சியைக் கொல்கிறது, மனித நாகரிகத்தையே குலைக்கிறது!"

இவர்...

இந்திய வரலாற்றிலேயே முதல்முறையாக ஒரு மாநிலத்தின் முதலமைச்சரை ஊழல் வழக்கில் குற்றவாளி என்று தீர்ப்பளித்துச் சிறைக்கு அனுப்பினார். வருமானத்துக்கு மீறிய சொத்துக் குவிப்பு வழக்கில் ஜெயலலிதாவுக்கு 4 ஆண்டு சிறைத் தண்டனையும் ரூ. 100 கோடி அபராதமும் விதித்ததன் மூலம் இந்திய அரசியல்வாதிகளுக்குப் பெரும் நடுக்கத்தை உருவாக்கினார்.

இவர்...

17 ஆண்டுகள் நீதித் துறையைக் கேலிக்கூத்தாக்கி இழுத்துக்கொண்டிருந்த இந்த வழக்கை, தான் நியமிக்கப்பட்ட ஒரு ஆண்டுக்குள் முடிவுக்குக் கொண்டுவந்தவர். இவருடைய கண்டிப்பான, கறாரான அணுகுமுறையும் இவர் வழக்கில் காட்டிய வேகமும் தாமதக் கலாச்சாரத்துக்குப் பேர்போன இந்திய நீதித் துறையில் மைல்கல் முன்னுதாரணம்.

இவர்...

தீர்ப்பின் 1136 பக்கங்களில் இடம்பெற்றிருக்கும் பல வரிகள் ஊழலுக்கு எதிரான பிரகடனமாக ஒலிக்கின்றன.

ஜெயலலிதா, 66

"ஒருநாள் தமிழ்நாட்டின் முதலமைச்சராவேன் என்று நான் கனவிலும் நினைத்ததில்லை. ஆனால், அது நடந்தது. அதேபோலத்தான்... எனக்கு இதைவிடப் பெரிய பொறுப்பு தரப்படுமானால், அந்தக் கடமையிலிருந்து நான் பின்வாங்க மாட்டேன் . "

இவர்...

நாடு முழுவதும் மோடி அலை சுழன்றடித்த சூழலில், 2014 பொதுத்தேர்தலில் தமிழ்நாட்டில் திராவிடக் கட்சிகள் தேசியக் கட்சிகளால் அசைக்க முடியாத பெரும் மலைகள் என்பதைக் காட்டினார். எந்தக் கூட்டணியுடனும் சேராமல் தமிழ்நாட்டில் 37 தொகுதிகளில் அதிமுகவை வெற்றி பெற வைத்ததன் மூலம் நாட்டின் மூன்றாவது தனிப்பெரும் கட்சியாக அதிமுகவை உருவெடுக்க வைத்தார்.

இவர்...

யாராலும் அசைக்க முடியாதவராகத் தேர்தல் வெற்றியினால் உச்சத்துக்குச் சென்ற அடுத்த சில மாதங்களில் பெரும் சரிவைச் சந்தித்தார். ஊழல் வழக்கில் தண்டிக்கப்பட்டு, முதல்வர் பதவியை இழந்தார். இவர் பெற்ற 4 ஆண்டுகள் சிறைத்தண்டனையும் ரூ. 100 கோடி அபராதமும் நாடு முழுவதும் பெரும் பரபரப்பை உருவாக்கின.

இவர்...

ஆட்சியில் இல்லையென்றாலும் அதிகாரச் சக்கரங்கள் இவரைச் சுற்றியே சுழல்கின்றன, கட்சியிலும் ஆட்சியிலும். இவருடைய அதிமுக இவ்வளவு பின்னடைவைச் சந்தித்திருக்கும் சூழலிலும் தமிழக எதிர்க் கட்சிகளால் அரசியல் போக்கைத் தீர்மானிக்கும் சக்தியை இவரிடமிருந்து பறிக்க முடியவில்லை.

சத்யா நாதெள்ளா, 47

"என்னைப் பற்றிச் சொல்வதானால் நான் ஒன்றைக் குறிப்பிட விரும்புகிறேன். கற்றுக்கொள்வது என்பதை நான் எப்போதும் விரும்புகிறேன். புதிய விஷயங்களால் நான் தூண்டப்படுகிறேன். உண்மையில் வாசிக்கிறேனோ இல்லையோ, நிறைய புத்தகங்களை வாங்குகிறேன். ஒவ்வொரு நாளும் உங்களைப் புதுப்பித்துக்கொள்ளுங்கள். "

இவர்...

உலகெங்கும் ஒரு லட்சத்துக்கும் மேற்பட்ட தொழிலாளர்களைக் கொண்ட, ஆண்டுக்கு ரூ. 4.8 லட்சம் கோடி வருமானம் வரும் ‘மைக்ரோ சாஃப்ட்’ நிறுவனத்தின் தலைமைச் செயல் அதிகாரியாக அமர்ந்ததன் மூலம் பன்னாட்டு நிறுவனங்களில் இந்திய மூளைக்கு உள்ள மதிப்பை உலகுக்கு உணர்த்தினார்.

இவர்...

பில் கேட்ஸ் அமர்ந்திருந்த பதவியில் அமர்ந்ததன் மூலம் இந்திய இளைஞர்களின் ஆதர்சங்களில் ஒருவராக ஆகியிருக்கிறார்.

இவர்...

‘டிஜிட்டல் இந்தியா’ திட்டத்தைப் பற்றி பிரதமர் மோடி சந்தித்துக் கருத்தறிந்த முக்கியமானவர்களில் ஒருவர்.

மேரி கோம், 31

"ஏழைக் குடும்பத்தைச் சேர்ந்த எனக்கு இளம் வயது வாழ்க்கை மிகக் கடினமானதாக இருந்தது. குத்துச்சண்டை விளையாட்டில் பங்கேற்க வேண்டும் என்று முடிவுசெய்தபோது அதை என் பெற்றோரிடமிருந்து மறைக்க வேண்டியிருந்தது. ஏனெனில், குத்துச்சண்டை என்பது பெண்களுக்கான விளையாட்டாகக் கருதப்படுவதில்லை."

இவர்...

மணிப்பூரில் ஒரு பழங்குடியின விவசாயக் குடும்பத்தில் பிறந்து, இன்று உலக அளவில் பெண்களுக்கான ஃபிளைவெயிட் குத்துச் சண்டை தர வரிசையில் 4-வது இடத்தில் இருக்கிறார்.

இவர்...

5 முறை தேசிய அளவிலான குத்துச் சண்டை சாம்பியன்; 5 முறை உலக சாம்பியன் பெருமைகளையெல்லாம் தாண்டி, மூன்று குழந்தைகளுக்குத் தாயான பின்னரும் 2014-ல் நடந்த தென் கொரியாவில் நடந்த ஆசிய விளையாட்டுப் போட்டிகளில், தங்கப் பதக்கம் வென்றார். இந்த சாதனையை செய்த ஒரே இந்தியப் பெண் இவர்தான்.

இவர்...

இளம் வயதிலிருந்தே கடும் உடல் உழைப்பில் ஈடுபட்டவர். வீட்டில் மூத்த பெண்ணான இவர் தனது தம்பி, தங்கைகளைக் கவனித்துக்கொண்டு, விவசாயப் பணிகளில் தனது பெற்றோருக்கும் உதவிசெய்தவர். இந்தியப் பெண்களுக்கு ஒரு முன்னுதாரணம் ஆகியிருக்கிறார். இவர் வாழ்க்கையை அடிப்படையாக வைத்து எடுக்கப்பட்ட ‘மேரி கோம்’ இந்தித் திரைப்படம் 2014-ல் வெளியானபோது, பாலிவுட்டைத் தாண்டியும் இந்தியாவெங்கும் உள்ள ரசிகர்கள் மேரி கோம் வாழ்க்கையைப் பார்த்து பிரமித்தார்கள். நாடே அவரை வாழ்த்தியது.

சதீஷ் சிவலிங்கம், 22

"தங்கம் வெல்வதற்காக இரண்டரை ஆண்டுகளாகத் தீவிரப் பயிற்சி எடுத்துவந்தேன். ஆசிய விளையாட்டுப் போட்டி, ஒலிம்பிக்கில் பதக்கம் வெல்வதே எனது அடுத்த லட்சியம். அதற்காக எவ்வளவு வேண்டுமானாலும் உழைப்பேன். "

இவர்...

வேலூரிலிருந்து காமன்வெல்த் விளையாட்டுப் போட்டியில் பளுதூக்குதல் போட்டிக்குச் சென்று, தங்கப் பதக்கத்துடன் ஊர் திரும்பி தமிழகத்துக்கும் இந்தியாவுக்கும் பெருமை சேர்த்திருக்கிறார்.

இவர்...

இவர் வேலூர் சத்துவாச்சாரியில் ஓர் எளிமையான உடற்பயிற்சியகத்திலிருந்து தன் பயணத்தைத் தொடங்கியவர். ஸ்னாட்ச் பிரிவில் 149 கிலோ எடையைத் தூக்கியதன் மூலம் இவர் உருவாக்கிய புதிய காமன்வெல்த் சாதனை இவர் மீது மிகப் பெரிய நம்பிக்கைகளை விதைத்திருக்கிறது.

இவர்...

வெற்றி தமிழகத்தைச் சேர்ந்த இளைஞர்களிடம் பெரும் ஊக்கத்தை ஏற்படுத்தியிருக்கிறது.

கார்த்திக் சுப்புராஜ், 31

"விளையாட்டாக ஆரம்பித்ததுதான் எனது குறும்பட இயக்கம். கதை, திரைக்கதை, ஒளிப்பதிவு எல்லாம் நானே. ரொம்ப அமெச்சூர் முயற்சிதான். ஆனால், அதுதான் சினிமாவைப் பற்றிய பிரமிப்பையும் பயத்தையும் விலக்கியது."

இவர்...

தமிழின் ‘புதிய அலை’ இயக்குநர்களில் முக்கியமானவர் ஆகியிருக்கிறார்.

இவர்...

திரையுலகின் வழக்கமாகவே ஆகிவிட்ட ‘உதவி இயக்குநர்’ பணி அனுபவம் இல்லாமலேயே, குறும்படங்கள் எடுத்த அனுபவத்தை மட்டும் வைத்துக்கொண்டு வித்தியாசமான, வெற்றிகரமான படைப்புகளைத் தொடர்ந்து தருகிறார்.

இவர்...

தமிழில் தந்த ‘பீட்ஸா’ படம் இந்தியிலும் எடுக்கப்பட்டு பெரும் வெற்றி பெற்றது. ‘பீட்ஸா’வைத் தொடர்ந்து ‘ஜிகர்தண்டா’வையும் வெற்றிப் படமாக்கித் தன் முத்திரையை ஆழமாகப் பதித்திருக்கிறார் விமர்சனங்களையும் வெற்றிக்கான காரணிகளாக உருமாற்றுகிறார். ‘ஜிகர்தண்டா’ படம் பற்றி அதுவரை வெளியான எதிர்மறையான செய்திகளை வைத்தே, படத்துக்குத் துணிச்சலாக விளம்பரம் வெளியிட்டு அசத்தினார் (‘டர்ட்டி கார்னிவல்’ கொரியப் படத்தின் நகல் என்ற வதந்தியையும் சேர்த்துதான்).

ஜெயமோகன், 52

"தமிழ் மனதைப் பொறுத்தவரை எழுத்தாளன் முக்கியமான ஆளுமையே கிடையாது. எவ்வளவு பெரிய கலைஞராக இருந்தாலும் பிரபுக்களுக்குச் சந்தனம் பூசிவிட வேண்டும் என்ற மனநிலையில்தான் தமிழ்ச் சமூகம் இன்னும் இருக்கிறது. வணிக எழுத்தாளர்கள் அந்த சந்தனம் பூசும் வேலையைத் தொடர்ந்து செய்துகொண்டிருக்கிறார்கள். இங்கேதான் எனது சின்னஞ்சிறிய கருத்துகள்கூட இத்தனை சர்ச்சைகளை உருவாக்குகின்றன. இந்தப் பின்னணியில் தொடர்ந்து இலக்கியவாதியாகக் கருத்துகளைச் சொல்வதற்கான இடத்தை உருவாக்கியது நான்தான். "

இவர்...

வெகுஜனப் பத்திரிகைகள், தொலைக்காட்சிகள், சிறுபத்திரிகை வட்டங்கள் எல்லாவற்றையும் பகைத்துக்கொண்டும் ஒரு தமிழ் எழுத்தாளன் தனித்துத் தாக்குப்பிடிக்க முடியும் என்பதைத் தொடர்ந்து நிரூபித்துவருகிறார்.

இவர்...

நாவல், சிறுகதை, விமர்சனம், தத்துவம், வரலாறு, கட்டுரைகள் எனப் பல தளங்களிலும் ராட்சச வேகத்தில் இயங்கிக்கொண்டிருக்கிறார். ஒரு தரமான படைப்பாளியின் கடுமையான உழைப்புக்கு உதாரணமாக இருக்கிறார். கூடவே, ‘காவியத் தலைவன்’, ‘பாபநாசம்’ எனத் திரைப்படக் கதை, வசனகர்த்தாவாகவும் கலக்குகிறார். ஷங்கரின் புதிய படத்துக்கு இவர் கேட்டிருக்கும் சம்பளம் இதுவரை எந்த எழுத்தாளரும் கேட்டிராதது என்கிறது கோலிவுட்.

இவர்...

ஒரு படைப்பாளி எதிர்கொள்ளத் தயங்கக்கூடிய பெரும் சவாலை 2014-ல் தனக்குத் தானே உருவாக்கிக்கொண்டார். மகாபாரதத்தை ‘வெண்முரசு’ என்னும் பொதுத் தலைப்பில் ஒவ்வொரு நாளும் ஒரு அத்தியாயம் என 10 ஆண்டுகள் திட்டமிட்டு எழுதத் தொடங்கியிருக்கிறார். மகாபாரதத் தொடரில் இந்த ஆண்டு மட்டும் 4 நாவல்களை வெளியிட்டிருக்கிறார். எழுத்தாளர்களுக்குப் பெரும் கனவு இருந்தால் மட்டுமே உயரப் பறக்க முடியும் என்பதை நிரூபித்திருக்கிறார். 

படங்கள்: ‘தி இந்து’ ஆவணக் காப்பகம்

கடலில் விழுந்தது கண்டுபிடிப்பு: 40-க்கும் மேற்பட்ட உடல்கள் மீட்பு;

இந்தோனேசியாவில் இருந்து சிங்கப்பூர் சென்

ஏர்ஏசியா QZ 8501 விமானத்தை தேடும் பணியில் சிங்கப்பூர் கடற்படை அதிகாரிகள். | படம்: ராய்ட்டர்ஸ்.

நடுவானில் மாயமான ஏர்ஏசியா விமானத்தின் உடைந்த பாகங்கள் இந்தோனேசிய கடல் பகுதியில் நேற்று காலை கண்டுபிடிக்கப் பட்டன. இதுவரை 40 பேரின் உடல்கள் மீட்கப்பட்டுள்ளன.

கடந்த 28-ம் தேதி இந்தோனேசியாவின் சுரபயா நகரில் இருந்து சிங்கப்பூருக்கு 162 பேருடன் ‘ஏர் ஏசியா இந்தோனேசியா’ விமானம் புறப்பட்டது. அந்த விமானத்தில் 156 இந்தோனேசி யர்கள், 3 தென்கொரியர்கள், மலேசியா, பிரான்ஸ், பிரிட்டனை சேர்ந்த தலா ஒருவர் பயணம் செய்தனர்.

பெலித்துங் கடல் பகுதியில் விமானம் பறந்து கொண்டிருந்த போது ஜகார்தா விமான கட்டுப்பாட்டு அறையை தொடர்பு கொண்ட விமானிகள், மோசமான வானிலை காரணமாக சற்று உயரத்தில் பறக்க அனுமதி கோரினர். ஆனால் அதே நேரத்தில் 6 விமானங்கள் அப்பகுதியில் பறந்து கொண்டிருந்ததால் கட்டுப்பாட்டு அறை அதிகாரிகள் அனுமதி அளிக்கவில்லை.

அடுத்த சில நிமிடங்களில் ஏர் ஏசியா விமானம் ரேடாரில் இருந்து மறைந்தது. கடந்த 28, 29-ம் தேதிகளில் பெலித்துங் கடல் பகுதியை இந்தோனேசிய விமானப் படை, கடற்படை வீரர்கள் சல்லடை போட்டு தேடினர்.

மூன்றாவது நாளாக நேற்று காலையும் தேடுதல் பணி தொடர்ந்தது. காலை 10.15 மணி அளவில் களிமந்தான் பகுதி, பங்காலான் பன் கடல் பகுதியில் ‘லைப் ஜாக்கெட்கள்’, விமானத்தின் கதவுகள் மிதப்பதை இந்தோனேசிய ஹெலிகாப்டரின் விமானி கண்டுபிடித்தார்.

உடனடியாக கடற்படை கப்பல்கள் அங்கு விரைந்து சென்று மீட்புப் பணியில் ஈடுபட்டன. அந்தப் பகுதியில் இருந்து இதுவரை 40-க்கும் மேற்பட் டோரின் சடலங்கள் மீட்கப் பட்டுள்ளன. இதில் 6 பேரின் உடல்கள் அடையாளம் காணப் பட்டுள்ளன.

இந்தோனேசியா, மலேசியா, ஆஸ்திரேலியா, சிங்கப்பூர் உள்ளிட்ட நாடுகளைச் சேர்ந்த சுமார் 30 கப்பல்கள், 15 விமானங்கள், 7 ஹெலிகாப்டர்கள் தொடர்ந்து மீட்புப் பணியில் ஈடுபட்டுள்ளன.

இதுகுறித்து இந்தோனேசிய கடற்படை மூத்த அதிகாரி ஒருவர் கூறியதாவது: கடல் அலைகள் ஆக்ரோஷமாக இருப்பதால் உடல்கள் சில மைல் தொலைவில் ஆங்காங்கே மிதக்கின்றன. அவற்றை மீட்டு வருகிறோம்.

விமானத்தில் பயணம் செய்த 162 பேரும் உயிரிழந்திருக்கலாம் என்று அஞ்சுகிறோம், யாரும் உயிர் பிழைத்திருக்க வாய்ப்பில்லை. விமானத்தின் பெரும் பகுதி கடலில் மூழ்கியிருப்பதால் அதனை தேடும் பணியை முடுக்கிவிட்டுள்ளோம். இவ்வாறு அவர் தெரிவித்தார்.

மீட்கப்பட்ட உடல்கள் அருகில் உள்ள பங்காலான் பன் நகருக்கு கொண்டு வரப்படுகின்றன. அங்கு உடல்களை அடையாளம் காண்பதற்காக பயணிகளின் உறவினர்கள் அழைத்துச் செல்லப் பட்டுள்ளனர்.

உயிரிழந்த பயணிகளின் குடும்பங்களுக்கு இந்தோனேசிய அதிபர் ஜோகோ விடோடா, மலேசிய பிரதமர் நஜிப் ரசாக் ஆகியோர் ஆழ்ந்த இரங்கல் தெரிவித்துள்ளனர்.

மாயமான விமானம் குறித்த தகவல்களை அறிவதற்காக இந்தோனேசியாவின் சுரபயா விமான நிலையம், சிங்கப்பூர் விமான நிலையத்தில் நூற்றுக் கணக்கான உறவினர்கள் திரண்டிருந்தனர்.

அங்குள்ள டி.வி. திரைகளில் விமான பயணிகளின் உடல்கள் மீட்கப்படும் செய்தி ஒளிபரப்பானதை பார்த்ததும் உறவினர்கள் நிலைகுலைந்தனர். பலர் விமான நிலையத்திலேயே மயங்கி விழுந்தனர். அவர்கள் உடனடியாக மருத்துவமனைக்கு கொண்டு செல்லப்பட்டனர்.

சுரபயா மேயர் டிரி ரிஸ்மகாரனி மற்றும் அரசு உயரதிகாரிகள் பலர் சுரபயா விமான நிலையத்தில் கூடியிருந்தனர். சோகம் தாங்காமல் கதறி அழுத உறவினர்களுக்கு அவர்கள் ஆறுதல் கூறி தேற்றினர்.

ஏர் ஏசியா விமானத்தை இந்தோனேசியாவை சேர்ந்த விமானி, பிரான்ஸ் நாட்டைச் சேர்ந்த துணை விமானி ஆகியோர் இயக்கினர். அவர்கள் அபாய பகுதியாகக் கருதப்படும் ஜாவா கடல் பகுதியில் விமானத்தை செலுத்தியதால் விமானம் விபத்துக் குள்ளானதாக ஆஸ்திரேலியா வைச் சேர்ந்த விமான போக்குவரத்து துறை நிபுணர் நேல் தெரிவித்துள்ளார்.

அவர் கூறியபோது, விமானி களின் தவறினால்தான் விபத்து ஏற்பட்டிருக்கக்கூடும். தொழில் நுட்ப கோளாறுகள் ஏற்படுவதற் கான வாய்ப்புகள் மிகவும் குறைவு என்று தெரிவித்தார்.

எனினும் விமானத்தின் கருப்பு பெட்டியைக் கண்டுபிடித்த பின்னரே விபத்துக்கான உண்மை யான காரணம் தெரியவரும் என்று நிபுணர்கள் தெரிவித்துள்ளனர்.

சாலையை சீரமைக்கக் கோரி கிடாரம்கொண்டானில் மக்கள் மறியல்

திருவாரூர் அருகேயுள்ள கிடாரம்கொண்டானில் மிக மோசமான நிலையில் உள்ள திருவாரூர்-நாகை சாலையை விரைந்து சீரமைக்க வலியுறுத்தி, அப்பகுதி மக்கள் திங்கள்கிழமை மறியலில் ஈடுபட்டனர்.

கிடாரம்கொண்டான் பகுதியில் திருவாரூர்-நாகை சாலை குண்டும், குழியுமாக பழுதடைந்து மிக மோசமான நிலையில் உள்ளன. இதனால், அந்தப் பகுதியில் அடிக்கடி விபத்து ஏற்பட்டு, பலர் காயமடைந்து பாதிக்கப்பட்டு வருகின்றனர்.

இந்நிலையில், இந்த சாலையை விரைந்து சீரமைக்க வேண்டும் என்று வலியுறுத்தி, கிடாராம்கொண்டான் பகுதியில் மக்கள் மறியலில் ஈடுபட்டனர். இதனால், அப்பகுதியில் போக்குவரத்து பாதிக்கப்பட்டது.

தகவலறிந்த திருவாரூர் டிஎஸ்பி மதுரசாமி, வட்டாட்சியர் நாகராஜன் ஆகியோர் மறியலில் ஈடுபட்டவர்களிடம் பேச்சுவார்த்தை நடத்தி, பழுதடைந்த சாலையை தா ற்காலிகமாக சீரமைக்கவும், மழை நின்றதும் நிரந்தரமாக பழுது பார்க்க நடவடிக்கை எடுக்கப்படும் என்று உறுதியளித்ததன்பேரில், மறியல் விலக்கிக் கொள்ளப்பட்டது.

மறியலால்ல அந்த பகுதியில் சுமார் 1 மணி நேரம் போக்குவரத்து பாதிக்கப்பட்டது.

2014-ம் ஆண்டு பாஜகவுக்கு நனவு, காங்கிரஸுக்கு கெட்ட கனவு

நரேந்திர மோடி| கோப்புப் படம்: பிடிஐ.

2014-ம் ஆண்டு பாரதிய ஜனதா கட்சிக்கும், பிரதமர் நரேந்திர மோடிக்கும் நினைவில் கொள்ள வேண்டிய வரலாற்று சிறப்பு மிக்க ஆண்டாக உள்ளது. ஆனால் காங்கிரஸ் கட்சிக்கு மறக்க வேண்டிய ஆண்டாக இருக்கிறது.

10 ஆண்டுகள் எதிர்க்கட்சியாக இருந்த பிறகு பாஜக இந்த ஆண்டு மத்தியில் ஆட்சிப் பொறுப் பேற்றது. 1984-க்குப் பிறகு ஒரு கட்சி மக்களவையில் பெரும்பான் மை பெற்றது இதுவே முதல்முறை.

மக்களவைத் தேர்தலில் பல் வேறு முக்கிய கட்சிகளை வீழ்த்தி ஆட்சிக்கு வந்தது பாஜக. இதைத் தொடர்ந்து ஹரியாணா, மகாராஷ்டிரா, ஜார்க்கண்ட் ஆகிய மாநிலங்களில் முதல் முறையாக ஆட்சிப் பொறுப்பேற்றுள்ளது. ஜம்மு காஷ்மீர் தேர்தலில் முதல் முறையாக இரண்டாவது மிகப் பெரிய கட்சியாக உருவெடுத் துள்ளது. இங்கும் கூட்டணி ஆட் சிக்கான வாய்ப்பை பெற்றுள்ளது.

ஜெயலலிதா தகுதியிழப்பு

2014-ம் ஆண்டு பல்வேறு வகையிலும் தனிச் சிறப்புக்குரிய ஆண்டாக உள்ளது. இந்தியாவில் நீண்டகாலம் பதவிவகித்த 3-வது பிரதமர் என்ற சிறப்பை பெற்ற மன்மோகன் சிங், தனது 10 ஆண்டுகால ஆட்சிக்குப் பின் அமைதியாக வெளியேறினார். ஆம் ஆத்மி கட்சி சார்பில் டெல்லி முதல்வராக பதவியேற்ற அர்விந்த் கேஜ்ரிவால் தனது பதவியை ராஜினாமா செய்தார். பிறகு தவறான முடிவை எடுத்து விட்டதாக ஒப்புதல் அளித்தார். ஊழல் வழக்கில் குற்றவாளி என அறிவிக்கப்பட்ட தமிழக முதல்வர் ஜெயலலிதா, நீதிமன்றத்தால் தகுதியிழப்புக்கு ஆளான முதல் முதல்வர் என்ற பெயருக்கு ஆளானார்.

அரசியல் நாயகன் மோடி

2014-ல் இந்திய அரசியலின் நாயகன் என்று நரேந்திர மோடியை கூறலாம். குஜராத் முன்னாள் முதல்வரான மோடி, பாஜகவுக்கு தொடர் வெற்றி வாய்ப்புகளை பெற்றுத் தந்து எதிர்க்கட்சிகளை திணறச் செய்துள்ளார்.

விலைவாசி உயர்வு, ஊழல் குற்றச்சாட்டுகளால் காங்கிரஸ் கூட்டணி அரசு மீது மக்களிடையே காணப்பட்ட அதிருப்தியை அறுவடை செய்துகொண்டார் பாஜக பிரதமர் வேட்பாளராக அறிவிக்கப்பட்ட நரேந்திர மோடி.

பிரதமர் நரேந்திர மோடி, மாநில சட்டப்பேரவை தேர்தல்க ளிலும் பிரச்சார நாயகராகத் தொடர்கிறார். அவரது தலைமை யிலான பிரச்சாரம் ஹரியாணா, மகாராஷ்டிரம், ஜார்க்கண்ட், ஜம்மு காஷ்மீர் மாநிலங்களில் பாஜக வுக்கு வெற்றியை பெற்றுத் தந் துள்ளது. தேர்தல் வாக்குறுதிகளை நிறைவேற்றவில்லை என்று எதிர்க் கட்சிகளின் குற்றச்சாட்டை அவர் வலுவிழக்கச் செய்துள்ளார்.

வரும் ஆண்டில் டெல்லி, பிஹார் சட்டப்பேரவை தேர்தல் வருகிறது. இந்நிலையில் கருப்புப் பணத்தை மீட்பது உள்ளிட்ட வாக்குறுதிகளுக்கு மத்திய அரசு செயல்வடிவம் தரும் என்று எதிர் பார்க்கப்படுகிறது. மேலும் சிறு பான்மையின மக்களை மதமாற்றம் செய்ய உறுதியேற்றுள்ள இந்துத்வா அமைப்புகளை மோடி கட்டுப்படுத்துவாரா என்ற எதிர்பார்ப்பும் எழுந்துள்ளது.

2002-ம் ஆண்டு குஜராத் கல வரம் தொடர்பாக மோடி தொடர்ந்து பல ஆண்டுகள் விமர்சனங்களை சந்தித்து வந்தார். இந்நிலையில் 2014 மக்களவை தேர்தலில் வரலாற்று சிறப்புமிக்க வெற்றி மூலம் தன்னை விமர்சித்தவர்களை வியப்புறச் செய்தார்.

தாக்குபிடித்த கட்சிகள்

மக்களவைத் தேர்தலில் நம்புவதற்கரிய 282 இடங்களை பாஜக பெற்றதுடன், 2009 தேர்தலில் 206 இடங்களை பெற்ற காங்கிரஸ் கட்சியை வெறும் 44 தொகுதிகளுடன் கட்டுப்படுத்தியது.

மேற்கு வங்கத்தில் திரிணமூல் காங்கிரஸ், ஒடிஸாவில் பிஜு ஜனதா தளம், தமிழ்நாட்டில் அதிமுக ஆகிய 3 பிராந்திய கட்சிகள் மட்டுமே மோடி அலையை தாக்குப்பிடித்தன.

மக்களுடன் தொடர்பு

நாடாளுமன்றத்துக்கு மோடி முதல் முறையாக செல்லும்போது, நுழைவாயில் படிக்கட்டுகளை அவர் வணங்கிச்சென்ற பண்பாடு மக்களின் கவனத்தை பெற்றது. பின்னர் அரசு இயந்திரம் ஆற்றல் பெறவும் முடிவு எடுப்பதை விரைவுபடுத்தவும் மோடி நடவடிக்கை எடுத்தார். வெளிநாடுகளுடன் ஒத்துழைப்பை வலுப்படுத்தி வருகிறார்.

மேக் இன் இந்தியா (இந்தியாவில் உற்பத்தி செய்யுங்கள்), ஸ்வச் பாரத் (தூய்மை இந்தியா) உள்ளிட்ட பிரச்சார இயக்கங்களை மோடி அரசு தொடங்கியுள்ளது. பொருளாதார சீர்திருத்தங்களை விரைவுபடுத்த சில முக்கிய சட்டங்களுக்கு அவசரச் சட்டம் பிறப்பிக்கப்பட்டுள்ளது.

மற்ற பிரதமர்களுக்கு மாறாக, மேடைப் பேச்சுகள், ரேடியோ நிகழ்ச்சிகள், சமூக வலைதளம், அரசு இணைய தளம் என மக்களிடம் தொடர்ந்து தொடர்பில் இருந்து வருகிறார் மோடி.

ராகுலுக்கு பின்னடைவு

மக்களவைத் தேர்தலில் காங்கிரஸ் துணைத் தலைவர் ராகுல் காந்தியின் பிரச்சாரம் எதிர்பார்த்த பலனைத் தரவில்லை. இது அவரது தலைமைப் பண்புகள் தொடர்பான கேள்விகளை எழுப்பியது. பிறகு நடைபெற்ற சட்டப்பேரவை தேர்தல் தோல்விகள் இந்த அவமதிப்பை அதிகரித்தது.

இதற்கு மாறாக பிரதமர் மோடிக்கு நெருக்கமான அமித் ஷாவின் தலைமையில், மேற்குவங்கம், தமிழ்நாடு கேரளம் உள்ளிட்ட அடித்தளம் இல்லாத மாநிலங்களிலும் வலுப்பெறமுடியும் என்ற நம்பிக்கையை பாஜக பெற்றுள்ளது.

ஒன்று சேரும் ஜனதா பரிவார்

பாஜகவின் பிரம்மாண்ட வெற்றியால், முந்தைய ஜனதா பரிவார் கட்சிகளான ஐக்கிய ஜனதா தளம், ராஷ்ட்ரீய ஜனதா தளம், மதச்சார்பற்ற ஜனதா தளம், சமாஜ்வாதி, இந்திய தேசிய லோக் தளம் ஆகிய கட்சிகள் ஒன்றுசேரவேண்டிய நிலைக்கு தள்ளப்பட்டுள்ளன.

ஆனால் பாஜக மிகுந்த நம்பிக்கையுடன் காணப்படுகிறது. ஆண்டின் இறுதியில், நாட்டின் உயரிய பாரத ரத்னா விருதுக்கு முன்னாள் பிரதமர் வாஜ்பாயின் பெயரை மத்திய அரசு அறிவித்துள்ளது.

  

வாசகர் கருத்து

ஜமாஅத் தேர்தல் 2015 தேதி அட்டவணை விபரம் அறிவிப்பு

        நமது முஹ்யித்தீன் ஆண்டவர்கள் பள்ளிவாசல் ஊர் உறவின் முறை ஜமாஅத் தின் தற்போதைய நிர்வாகத்தின் பொறுப்புகள் வரும் ஹிஜ்ரி 1436 ரபியுல் ஆகிர் பிறை 11 அன்றுடன் முடிகிறது.

    இதனால் புதிய நிர்வாகத்தை தேர்தெடுக்கும் நடைமுறைகள் கடந்த டிசம்பர் 4 வரை புதிய அங்கத்தினர்கள் சேர்ப்பு ,நீக்கம்,தெரு மாற்றம் நடைபெற்றது.

   இந்த நிலையில் டிசம்பர் 27 வெள்ளிக்கிழமை ஜூம்மா தொழுகைக்கு பிறகு மூன்று கட்டங்களாக 21 தெரு பிரதிநிதிகள் தேர்தல் நடைபெறும் நாட்கள் அறிவிக்கப்பட்டன.

தேர்தல் தேதி அட்டவணை விபரம் அறிவிப்பு :

பின்னர் 4ம் கட்டமாக தெரு பிரதிநிதிகள் முலமாக மக்கள் சபையில் தலைவர் உள்ளிட்ட நிருவாக ஸ்தர்கள் தேர்தல் நடைபெறும்

 

கணினி வழிக் குற்றங்கள் 40% அதிகரிப்பு

• 

நாட்டில் கடந்த மூன்று ஆண்டுகளில், இணையதளங்களை முடக்குவது, ஆபாசக் கருத்துக்களை வெளியிடுவது, கடன் அட்டை, வங்கி தொடர்பான மோசடிகள் போன்ற கணினி வழிக் குற்றங்கள், ஆண்டுக்கு 40 சதவீதம் அதிகரித்துள்ளதாக மத்திய உள்துறை அமைச்சக புள்ளி விவரங்கள் தெரிவிக்கின்றன.

அவற்றில் மேலும் தெரிவிக்கப்பட்டுள்ளதாவது:

கடந்த 2012, 2013 -ஆம் ஆண்டுகளில் தேசிய அளவில் நிகழ்ந்த கணினி வழிக் குற்றங்களின் எண்ணிக்கை முறையே 22,060, 71,780 ஆகும். ஆனால், நிகழாண்டில் ஜூன் மாதம் வரை மட்டுமே நிகழ்ந்துள்ள இந்த வகைக் குற்றங்களின் எண்ணிக்கை 62,189 ஆகும். உலகெங்கும் பரவியுள்ள இணையதள மோசடிக் கும்பல்களால், கடந்த ஆண்டு 28,481 இந்திய இணையதளங்கள் முடக்கப்பட்டன. கடந்த 2011, 2012 ஆகிய ஆண்டுகளில் இந்த எண்ணிக்கை முறையே 21,699, 27,605 ஆக இருந்தது என்று அதில் தெரிவிக்கப்பட்டுள்ளது.

இதுகுறித்து மத்திய உள்துறை அமைச்சக அதிகாரி ஒருவர் கூறியதாவது:

எளிதாக நிகழ்த்தப்படும் இந்தக் குற்றங்களைத் தடுப்பது, வேகமான பொருளாதார வளர்ச்சியை நோக்கி பயணிக்கும் நம் நாட்டுக்கு அவசியமாகும். ஆனால், உலகின் எந்த மூலையில் இருந்தும் மிகவும் நுட்பமாக நிகழ்த்தப்படும் இந்தக் குற்றங்களுக்கு காரணமாக உள்ளவர்களைக் கண்டறிவது கடினமாக உள்ளது என்று அவர் தெரிவித்தார்.

தேசிய இணையதள ஆவணப் பிரிவின் புள்ளிவிவரப்படி இந்தியாவில், தகவல் தொழில்நுட்ப சட்டத்தின்கீழ், கடந்த 2011, 2012, 2013-ஆம் ஆண்டுகளில் முறையே, 1,791; 2,876; 4,356 வழக்குகளும், கணினி வழிக் குற்றங்கள் தொடர்பான இந்திய தண்டனை சட்டப் பிரிவுகளின்கீழ் முறையே 422; 601; 1,337 வழக்குகளும் பதிவாகி உள்ளன.

கணினி வழிக் குற்றங்களைத் தடுப்பதற்கான வழிமுறைகளைக் கண்டறிய ஐந்து பேர் கொண்ட நிபுணர் குழுவை மத்திய உள்துறை அமைச்சகம் அண்மையில் அமைத்தது குறிப்பிடத்தக்கது.

மதுவிலக்கு குற்றங்களில் பிடிபட்ட வாகனங்கள் திருவாரூரில் டிசம்பர் 30-ல் ஏலம்

திருவாரூர் மாவட்டத்தில் மதுவிலக்கு குற்றங்களில் பிடிபட்ட இருசக்கர வாகனங்கள் வரும் 30-ம் தேதி ஏலம் விடப்படவுள்ளது.

இதுகுறித்து மதுவிலக்கு அமல்பிரிவு கூடுதல் காவல் கண்காணிப்பாளர் அனார்கலிபேகம் வெளியிட்ட செய்திக்குறிப்பு: மாவட்டத்திலுள்ள அனைத்து காவல் நிலையங்கள் மற்றும் மதுவிலக்கு அமல் பிரிவு போலீஸாரால் மதுவிலக்கு சோதனையின்போது பல்வேறு இருசக்கர வாகனங்கள் பறிமுதல் செய்யப்பட்டன. பறிமு தல் செய்யப்பட்ட வாகனங்கள் திருவாரூர் ஆயுதப்படை மைதானத்தில் டிச. 30-ம் தேதி காலை 10 மணிக்கு ஏலம் விடப்படுகிறது. மேலும் விவரங்களுக்கு 04366-225270 என்ற எண்ணில் தொடர்பு கொள்ளலாம்.

இந்தோனேசியாவில் 161 பேருடன் ஏர்ஏசியா விமானம் மாயம்

கோப்புப் படம்: ஏ.பி.

இந்தோனேசியாவில் இருந்து 155 பயணிகள் உட்பட 161 பேருடன் சிங்கப்பூர் புறப்பட்ட 'ஏர்ஏசியா' விமானம் மாயமானதாக தெரிவிக்கப்பட்டுள்ளது.

இந்த விமானம் தொடர்பான விவரங்களை காலை 7.42 மணியளவிலிருந்து விமான கட்டுப்பாட்டு அறை அதிகாரிகளால் சேகரிக்க முடியவில்லை.

இந்தோனேசியாவின் சுரபயா விமான நிலையத்தில் இருந்து இன்று காலை புறப்பட்ட விமானம் பயணம் தொடங்கிய 42 நிமிடங்களில் சரியாக காலை 7.42 மணிக்கு கட்டுப்பாட்டு தொடர்பிலிருந்து திடீரென மாயமானதாக சிங்கப்பூர் சிவில் விமான போக்குவரத்து ஆணையம் தெரிவித்துள்ளது.

சுரபயா விமான நிலைய மேலாளர் திரிகோரா ரஹார்ஜியோ, "மாயமான A320-200 என்ற பயணிகள் விமானத்தில் சிங்கப்பூர், பிரிட்டன், மலேசியா, இந்தோனேசியா ஆகிய நாடுகளைச் சேர்ந்த 6 சிறுவர்கள், ஒரு குழந்தை உட்பட 155 பயணிகள் மற்றும் 6 பேர் கொண்ட விமானப் பணிக்குழு இருந்ததனர். விமானத்தை கட்டுப்பாட்டு அறை கவனத்துக்கு கொண்டு வருவதற்கான தேடல் பணி தொடங்கியுள்ளது" ஏ.பி. செய்தி நிறுவனத்திடம் தெரிவித்துள்ளார்.

முதற்கட்ட தகவலில், அந்த விமானம் ஜாவா தீவுகள் மற்றும் கலிமந்தன் அருகே ஜாவா கடற் பகுதியில் மாயமானதாக தெரிவிக்கப்பட்டுள்ளது.

விமான சிக்னல், கட்டுப்பாட்டு அமைப்புக்கு வந்தடையாததைத் தொடர்ந்து, அடுத்த அரை மணி நேரத்தில் சிங்கப்பூர் விமான போக்குவரத்து கழகத்துக்கு தகவல் தெரிவிக்கப்பட்டது.

தேடல் நடவடிக்கை குறித்து மேலாளர் திரிகோரா மேலும் கூறும்போது, "இந்தோனேசிய அதிகாரிகள் தேடலில் ஈடுபட்டு வருகின்றனர். அந்த நாட்டின் கடற்படை அதிகாரிகளும் விமானப் படை அதிகாரிகளும் சி-130 ரக போர் விமானங்கள் மூலம் மாயமான விமானத்தை தேடி வருகின்றனர்.

தற்போதைய நிலை வரை விமானம் குறித்து எந்த தகவலும் கிடைக்காமல் உள்ளது கவலை அளிப்பதாக இருக்கிறது. தேடும் பணிக்கு ஏர்ஏசியா அதிகாரிகளும் ஒத்துழைத்து வருகின்றனர். தகவல்கள் கிடைக்கும் நிலையில், அதனை நாங்கள் உடனுக்குடன் ஊடகங்கள் வழியாகவும், பயணிகளின் குடும்பத்தினருக்கும் தெரிவிப்போம்" என்றார் அவர்.

ஏர்ஏசியா விமான நிறுவனம், பயணிகளின் குடும்பத்தினர் மற்றும் உறவினர்கள் தகவல் தொடர்பு வசதிக்காக+622129850801 என்ற உதவி மைய எண்ணை தொடர்புகொள்ளலாம் என்று தெரிவித்துள்ளது.

வெளியூர் மௌத் அறிவிப்பு 28/12/2014

  நமதூர் ஹாஸ்பாவா தர்கா வளாகம் ஹாஸ் ரிபாய் ,அப்துல் காதர் இவர்களின் தகப்பனார் ஹாஸ் இஹ்சானுல்லா அவர்கள் மஞ்சகொல்லையில் மௌத்.  அன்னாரின் ஜனாசா 28/12/2014 ஞாயிறு மாலை 4 மணிக்கு நாகை மாவட்டம் மஞ்சகொல்லை பள்ளிவாசல்
அடக்கஸ்தலத்தில் நல்லடக்கம் செய்யபடுகிறது.

கொசு விரட்டும் நொச்சி

வீட்டு மாடித் தோட்டங்களிலும் பால்கனிகளிலும் செடி வளர்ப்பது வீட்டிற்கு அழகை மட்டுமல்ல வீட்டில் வசிப்பவர்களுக்கு நல் ஆரோக்கியத்தை வழங்கும். நகர நெருக்கடிகளுக்குள் தோட்டம் அமைத்துச் செடி வளார்ப்பது சாத்தியமான காரியமல்ல. மேலும் செடி வளர்ப்பதற்குச் சிலர் தயங்குவதுண்டு. காரணம் என்னவென்றால் செடி வளர்ப்பதால் சிறிய சிறிய பூச்சிகள், மரவட்டை, கொசுக்கள் வரக்கூடும் என நினைப்பார்கள். ஆனால் உண்மையிலேயே கொசுக்களை விரட்டும் இயற்கை வேதிப் பொருள்கள் நம் பாரம்பரியச் செடிகளில் நிறைந்துள்ளன.

உதாரணமாக நொச்சி, வேம்பு போன்ற செடிகளில் இந்தப் பண்புகள் மிகுந்துள்ளன. சாமந்தி, நொச்சி, வேம்பு போன்ற தாவரங்களுக்கு இந்தக் குணம் உண்டு. இவை அல்லாது ரோஸ்மேரி, சிட்ரோநெல்லா, ஏஜ்ரேடம் போன்ற செடிகளிலும் இந்தக் குணம் உள்ளதாகச் சொல்லப்படுகிறது. ஆக பயப்படாமல் இந்தச் செடிகளை வளர்ப்பதால் நமக்கு இருவிதமான பயன்கள் கிடைக்கும். வீட்டிற்கு அழகும் கிடைக்கும்.

அதேசமயம் கொசுக்களை விரட்டவும் முடியும். கொசுக்களை விரட்ட நாம் பலவிதமான வேதிப் பொருள்களை நாடுவது பயனளிக்கக்கூடியதாக இருக்கலாம். ஆனால் அவற்றைத் தொடர்ந்து பயன்படுத்துவதால் ஆரோக்கியத்திற்குக் கேடாகும்.

சென்னை மாநகராட்சியே சென்ற ஆண்டு கொசுக்களை விரட்ட நொச்சிச் செடிகளைத் தரும் திட்டத்தை அறிவித்தது. இந்தத் திட்டத்தின் மூலம் இதுவரை 1.5 லட்சத்திற்கும் அதிகமானோர் பயனடைந்துள்ளனர். இந்தத் திட்டத்தை அரசே முன்னெடுத்தது ஓர் முன்னுதாரணம் ஆகும். இனி நாமே முன்வந்து இந்தச் செடிகளை நட்டு ஆரோக்கியம் பேணுவோம்.

நமதூர் மௌத் அறிவிப்பு 26/12/2014

  நமதூர் மேலத்தெரு கெடிக்கார வீட்டு ஜமால் முஹம்மது ,ஜாகீர் ஹூசைன் இவர்களின் தகப்பனார் முஹம்மது முஹைதீன் (மதுக்கூர் அப்பா)அவர்கள் வடக்குத்தெருவில் மௌத்.  அன்னாரின் ஜனாசா 26/12/2014 இரவு 8:30 மணிக்கு நமது முஹ்யித்தீன் ஆண்டவர்கள்  பள்ளிவாசல்
அடக்கஸ்தலத்தில் நல்லடக்கம் செய்யபடுகிறது.

மளிகைக் கடைகளிலும் இனி 5 கிலோ எல்.பி.ஜி.

• 

மளிகைக் கடைகளில் 5 கிலோ சமையல் எரிவாயு (எல்.பி.ஜி.) உருளை விற்பனை செய்யும் திட்டத்தை மத்திய அரசு வியாழக்கிழமை அறிமுகப்படுத்தியுள்ளது. இதுவரை, குறிப்பிட்ட சில நகரங்களில் தேர்ந்தெடுக்கப்பட்ட சில சமையல் எரிவாயு முகமை மையங்கள், பெட்ரோல் விற்பனை நிலையங்களில் மட்டுமே 5 கிலோ சமையல் எரிவாயு உருளை விற்பனை செய்யப்பட்டு வருகிறது.

தற்போது அந்தத் திட்டத்தை அனைத்துப் பெருநகரங்களிலும் உள்ள பெட்ரோல் விற்பனை நிலையங்கள், பெரிய மளிகைக் கடைகளுக்கும் மத்திய அரசு விரிவுபடுத்தியுள்ளது.

மேலும், 5 கிலோ எரிவாயு உருளைகள் சந்தை விலையில் மட்டுமே இதுவரை விற்பனை செய்யப்பட்டு வந்தன. தற்போது மானிய விலையிலும் 5 கிலோ எரிவாயு உருளைகள் விற்பனை செய்யப்படும் எனவும் அரசு அறிவித்துள்ளது. அவை, எரிவாயு முகவர்களிடம் மட்டுமே கிடைக்கும். அதன்படி, ஆண்டுக்கு 34 உருளைகள், ரூ.155 வீதம் (தில்லியில்) மானிய விலையில் ஒரு குடும்பத்துக்கு விநியோகிக்கப்படும்.

வழக்கமான நடைமுறைகளைப் போல 5 கிலோ சமையல் எரிவாயு உருளைகளை முன்பதிவு செய்து மானிய விலையில் பெற்றுக் கொள்ளலாம்.

இதைத் தவிர பெட்ரோல் விற்பனை நிலையங்கள், குறிப்பிட்ட மளிகைக் கடைகளில் சந்தை விலையில் (ரூ.351) எரிவாயு உருளை விற்பனை செய்யப்படும். நல்லாட்சி தினத்தை முன்னிட்டு தில்லியில் வியாழக்கிழமை நடைபெற்ற விழாவில் இந்தத் திட்டத்தை பெட்ரோலியத் துறை அமைச்சர் தர்மேந்திர பிரதான் தொடக்கி வைத்தார். அப்போது அவர் பேசியதாவது:

இது புதிய திட்டம் அல்ல. அதேவேளையில், நல்லாட்சி தினத்தையொட்டி, இந்தத் திட்டத்தை மேலும் விரிவுபடுத்த மத்திய அரசு திட்டமிட்டிருந்தது. அதன் அடிப்படையில் மளிகைக் கடைகளிலும் எரிவாயு உருளை விற்பதற்கான திட்டம் அறிமுகப்படுத்தப்பட்டுள்ளது.

இதற்கு முன்பு நாடு முழுவதும், 610 பெட்ரோல் விற்பனை நிலையங்களில் எரிவாயு உருளை விற்கப்பட்டு வந்தது. தற்போது அதன் எண்ணிக்கை அதிகரிக்கப்பட்டுள்ளது.

கிராமப் பகுதிகளில் வசிக்கும் வறுமைக் கோட்டுக்கு கீழ் உள்ள மக்களுக்கு சலுகை விலையில் எரிவாயு இணைப்பு தரும் திட்டம் அமலில் உள்ளது. தற்போது அந்தச் சேவை நகர்ப்புறத்தில் வசிக்கும் வறுமைக் கோட்டுக்கு கீழ் உள்ள மக்களுக்கும் விரிவுபடுத்தப்பட்டுள்ளது என்று அவர் தெரிவித்தார்.

கல்வெட்டில் ஓ.பன்னீர்செல்வம் பெயரா?- முதல்வர் பெயரை தவிர்ப்பதற்காக திறக்கப்படாத அரசு கட்டிடங்கள்

ஆறரை கோடி ரூபாய் செலவில் கட்டப்பட்ட மதுரை ஹாக்கி மைதானம், ரூ.1.60 கோடியில் கட்டப்பட்ட விருதுநகர் சங்கர லிங்கனார் மணிமண்டபம் மற்றும் இருபதுக்கும் மேற்பட்ட அம்மா உணவகங்கள் உள்ளிட்ட பல புதிய கட்டிடங்கள் முதல்வரின் தேதிக்காக காத்திருக்கின்றன. திறப்பு விழா கல்வெட்டில் ஓ.பன்னீர்செல்வம் பெயர் வருவதைத் தவிர்க்கவே, விழா தள்ளிப் போடப்படுவதாக புகார் எழுந்துள்ளது.

தமிழகத்தில் பிரம்மாண்டமான பாலம் முதல் வி.ஏ.ஓ. அலுவலகம் வரையில், எந்தக் கட்டிடமாக இருந்தாலும் முதல்வரே திறந்து வைக்கும் வழக்கம் நடைமுறையில் உள்ளது. இவ்வாறு கடைசியாக 22.9.14ம் தேதியன்று சென்னையில் உள்ள 4 அரசு மருத்துவமனைகளில் அம்மா உணவகங்களை அன்றைய முதல்வர் ஜெயலலிதா திறந்து வைத்தார்.

அதைத் தொடர்ந்து, தமிழகம் முழுவதும் உள்ள விடுபட்ட மாவட்ட தலைமை மருத்துவமனைகள் மற்றும் நகராட்சிகளிலும் அம்மா உணவகங்கள் கட்டி முடிக்கப் பட்டன. ஆனால், இன்னும் திறக்கப் படவில்லை. மதுரையில் ஆறரை கோடி ரூபாய் செலவில் நவீன ஹாக்கி மைதானம் கட்டப்பட்டு, சுமார் 5 மாதங்களாகிவிட்டன. இன்னமும் மைதானம் திறக்கப் படாததால் முதல்வர் கோப்பை ஹாக்கி போட்டிகள் அமெரிக்கன் கல்லூரி மைதானத்தில் நடந்தன.

‘இந்த மைதானத்தில் விரிக்கப்பட்டுள்ள செயற்கை புல் வெளிநாட்டில் இருந்து கொண்டு வரப்பட்டது. விளையாட விளையாட தான் மைதானம் செட் ஆகும். பயன்படுத்தப்படாமல் கிடந்தால் சேதமடைந்துவிடும்’ என்று பயிற்சியாளர்கள் பதறுகிறார்கள். விளையாட்டுத்துறையில் ஆர்வம் கொண்டவர் ஜெயலலிதா. அவரது பெயரைச் சொல்லியே, அதிகாரிகள் மைதானத்தை வீணாக்குவது வேதனையளிக்கிறது என்கிறார்கள் ஹாக்கி வீரர்கள்.

சிவகங்கை தாலுகா அலுவல கம், திண்டுக்கல் அரசு மருத்துவ மனையின் மகப்பேறு மற்றும் தீக்காயப் பிரிவு போன்றவை கட்டி முடிக்கப்பட்டு 6 மாதங்களுக்கும் மேலாக பூட்டிக் கிடக்கின்றன. மதுரை, திண்டுக்கல், விருதுநகர், ராமநாதபுரம், சிவகங்கை, தேனி உள்ளிட்ட தென்மாவட்டங்கள் முழுவதும் புதிதாக கட்டப்பட்ட அம்மா உணவகங்கள் திறப்பு விழா காணாமல் உள்ளன. முதல்வரின் சொந்தத் தொகுதியான போடி பஸ்நிலையத்தில் கட்டப்பட்ட அம்மா உணவகத்தின் நிலையும் இதுதான். விருதுநகரில் 1.60 கோடி ரூபாயில் கட்டப்பட்ட தியாகி சங்கரலிங்கனார் மணிமண் டபத்தை, அவரது நினைவுச் தினமான அக்டோபர் 13-ம் தேதிக்கு முன் திறக்க அதிகாரிகள் ஏற்பாடு செய்தனர். அதற்குள் ஜெயலலிதாவுக்கு எதிரான தீர்ப்பு வந்ததால், அந்த விழாவும் ரத்தாகிவிட்டது.

முதல்வராக பதவியேற்று 3 மாதங்கள் ஆகியும் ஓ.பன்னீர் செல்வம் எந்த புதிய கட்டிடங் களையும் திறந்து வைக்கவில்லை. கல்வெட்டில் தன்னுடைய பெயர் இடம்பெறுவதைத் தவிர்ப் பதற்காகவே, திறப்பு விழாவில் முதல்வர் ஆர்வம் காட்டுவதில்லை என்று அதிகாரிகள் கூறுகின்றனர்.

முன்னாள் சட்டமன்ற உறுப்பினர் என்.நன்மாறன் கூறும்போது, ஏழை மக்களுக்கு உணவளிக்கும் அம்மா உணவகங்கள், சென்னை மாகாணம் என்ற பெயரை தமிழ் நாடு என்று மாற்றுவதற்காக உண்ணாவிரதம் இருந்து உயிர்நீத்த தியாகி சங்கரலிங்கனார் நினைவு மண்டபம் உள்ளிட்ட கட்டிடங்களை உடனே திறக்க வேண்டும். பொருத்தமில்லாத காரணங்களைக் கூறி மக்கள் பயன்பாட்டுக்கான கட்டிடங்களை மூடி வைத்திருப்பது நியாயமில்லை என்றார்.

புதிய கட்டிடங்களை திறக்க முதல்வர் ஓ.பி.எஸ். முன்வர வேண்டும். இல்லை என்றால், முந்தைய ஆட்சிக் காலங்களில் இருந்ததைப் போல அந்தந்த மாவட்ட ஆட்சியர், அமைச்சர், சட்டமன்ற உறுப்பினர்களைக் கொண்டே இந்த கட்டிடங்களைத் திறக்க அவர் உத்தரவு பிறப்பிக்க வேண்டும் என்பது பொதுமக்களின் கோரிக்கையாக உள்ளது.

வாஜ்பாய், மாளவியாவுக்கு பாரத ரத்னா விருது: மத்திய அரசு அறிவிப்பு

முன்னாள் பிரதமர் வாஜ்பாய், சுதந் திர போராட்ட வீரர் மதன் மோகன் மாளவியா ஆகியோருக்கு நாட் டின் மிக உயரிய விருதான பாரத ரத்னா அறிவிக்கப்பட்டுள்ளது.

வாஜ்பாய் 90-வது பிறந்த நாளும், மாளவியா 153-வது பிறந்த தினமும் இன்று கொண் டாடப்படுகிறது. இதனை முன் னிட்டு அவர்களுக்கு பாரத ரத்னா விருது வழங்கப்படவுள்ளதாக நேற்று அறிவிப்பு வெளியானது.

இதற்கான அறிவிப்பை குடி யரசுத் தலைவர் பிரணாப் முகர்ஜி நேற்று வெளியிட்டார். மரணத் துக்கு பிந்தைய விருதாக பண்டிட் மதன் மோகன் மாளவியாவுக்கு இந்த விருது வழங்கப்படுகிறது.

கடந்த சில நாட்களுக்கு முன்பு மத்திய அமைச்சர்கள், பாஜக மூத்த தலைவர்களுடன் பாரத ரத்னா விருது தொடர்பாக பிரதமர் நரேந் திர மோடி ஆலோசனை நடத்தி னார். அதன் பிறகு வாஜ்பாய், மாளவியா ஆகியோருக்கு பாரத ரத்னா விருது வழங்க குடியரசுத் தலைவருக்கு பரிந்துரைத்தார்.

பாரத ரத்னா விருது அறிவிக்கப்பட்டுள்ள இரு தலைவர்களுமே இந்திய வரலாற்றில் முக்கிய இடம் பெற்றவர்கள்.

தேசிய உணர்வாளர் மாளவியா

உத்தரப் பிரதேசத்தில் 1861-ம் ஆண்டு பிறந்த மாளவியா, சுதந்திரப் போராட்டத்தில் தீவிர பங்கு வகித்தார். இந்து தேசிய கொள்கையை வளர்த்தெடுத்ததில் முக்கிய பங்காற்றியுள்ளார். இந்திய தேசிய காங்கிரஸ் தலைவராக நான்கு முறை பதவி வகித்துள்ளார்.

வாரணாசியில் உள்ள பனராஸ் இந்து பல்கலைக்கழகத்தை நிறுவி யவர், இந்தியாவில் சாரணர் இயக் கம் நிறுவியர்களில் முக்கியமான வர். வழக்கறிஞரான மாளவியா பத்திரிகை துறையில் சிறப்பான பங்களிப்பை ஆற்றியுள்ளார். 1946-ம் ஆண்டு மறைந்தார்.

50 ஆண்டுகள் எம்.பி.

மத்தியப் பிரதேச மாநிலம் குவாலியரில் 1924 வாஜ்பாய் பிறந்தார். ஆர்எஸ்எஸ் இயக்கத் தால் ஈர்க்கப்பட்டு அதில் இணைந்த வாஜ்பாய், திருமணம் செய்து கொள்ளவே இல்லை.

சுதந்திரப் போராட்ட காலத்தி லும்,நெருக்கடிநிலை காலத்திலும் சிறையில் இருந்துள்ளார். 50 ஆண்டுகள் எம்.பி.யாக இருந்துள்ள வாஜ்பாய், 9 முறை மக்களவை உறுப்பினராகவும், 2 முறை மாநிலங்களவை உறுப் பினராகவும் பதவிவகித்தவர். மொரார்ஜி தேசாய் அமைச் சரவையில் வெளியுறவு அமைச்சராக இருந்தார்.

1996-ம் ஆண்டு முதல்முறை யாக பாஜக கூட்டணி மத்தியில் ஆட்சி அமைத்தபோது அதன் பிரதமரானார். அப்போது சில நாட்களிலேயே ஆட்சி கவிழ்ந்தது. 1998-ல் 2-வது முறையாக ஆட்சி அமைத்தபோது சுமார் 13 மாதங்களே ஆட்சியில் தொடர முடிந்தது. 1999-ம் ஆண்டில் 3-வது முறையாக பிரதமராகி 5 ஆண்டுகள் ஆட்சியில் இருந்தார்.

வாஜ்பாய் ஆட்சி காலத்தில் சாலைப் போக்குவரத்து, தகவல் தொழில்நுட்பம் ஆகிய துறைகளில் வளர்ச்சியில் இந்தியா முக்கிய இடத்தை எட்டியது. பொக்ரானில் அணு ஆயுத சோதனை நடத்தியது வாஜ்பாய் ஆட்சியில் முக்கிய சாதனையாக கருதப்படுகிறது. காங்கிரஸ் கட்சியை சாராமல் அதிக நாட்கள் பிரதமர் பதவியை அலங்கரித்த ஒரே தலைவர் என்ற பெருமையும் வாஜ்பாய்க்கு உண்டு.

கட்சி வேறுபாடுகளுக்கு அப்பாற்பட்டு அனைவராலும் மதிக்கப்படும் தலைவராக வாஜ்பாய் உள்ளார். 90 வயதை எட்டியுள்ள அவர் வயது முதிர்வு காரணமாக அரசியலில் இருந்து விலகி ஓய்வில் இருக்கிறார்.

2005க்கு முந்தைய ரூபாய் நோட்டுக்களை மாற்ற அடுத்த ஆண்டு ஜூன் வரை காலக்கெடு நீட்டிப்பு

• 

இந்தியாவில் 2005ஆம் ஆண்டுக்கு முன்பு அச்சிடப்பட்ட ரூபாய் நோட்டுகளை வங்கிகளில் கொடுத்து மாற்றிக் கொள்ள மேலும் 6 மாதம் கால அவகாசம் வழங்கப்பட்டுள்ளது.

2005ஆம் ஆண்டுக்கு முந்தைய ரூபாய் நோட்டுகள் சேதமடைந்து கிழிந்த நிலையில் இருப்பதால் அவற்றை வங்கிகளில் கொடுத்து மாற்றிக் கொள்ளுமாறு ரிசர்வ் வங்கி பொதுமக்களுக்கு அறிவுறுத்தியிருந்தது.

முன்னதாக அதற்காக குறிப்பிட்ட கால அவகாசமும் ரிசர்வ் வங்கி வழங்கி உத்தரவிட்டது.

மேலும், ரூபாய் நோட்டுகளில் ஆண்டு இல்லாத ரூபாய் நோட்டுகளையும், கிழிந்த, சேதமடைந்த ரூபாய் நோட்டுகளையும், 2005க்கு முன்பு அச்சிடப்பட்ட ரூபாய்களையும் வரும் ஜனவரி 1ஆம் தேதிக்குள் மாற்றிக்கொள்ள கால அவகாசம் நீட்டிக்கப்பட்டது.

இந்நிலையில் அவ்வாறு உள்ள நோட்டுகளை மாற்றிக் கொள்ள இன்னும் 6 நாட்களே இருந்த நிலையில் அடுத்த ஆண்டு ஜூன்வரை மாற்றிக்கொள்ளலாம் என்று ரிசர்வ் வங்கி அவகாசம் வழங்கியுள்ளது. அதன்பிறகு அவற்றை செல்லாததாக அறிவிக்கவும் வாய்ப்பு உள்ளது.

காயிதே மில்லத் பெயரில் புதிய விருது அறிவிப்பு

காயிதே மில்லத் கல்வி மற்றும் சமூக அறக்கட்டளை சார்பில் காயிதே மில்லத் பெயரில் ஆண்டுதோறும் புதிய விருது வழங்கப்படும் என அறிவிக்கப்பட்டுள்ளது.

இது தொடர்பாக அறக்கட்டளையின் பொதுச் செயலாளர் எம்.ஜி.தாவூத் மியாகான் நேற்று வெளியிட்ட அறிக்கை: சிறுபான்மை சமூகத்தின் தலைவராக அங்கீகரிக்கப்பட்டாலும் அரசியலில் அனைத்து மக்களின் ஆதரவையும் காயிதே மில்லத் பெற்றிருந்தார். 1946 முதல் 52 வரை சென்னை ராஜதானியின் சட்டமன்ற எதிர்க்கட்சித் தலைவராக இருந்தார்.

அரசியல் நிர்ணய சபை உறுப்பினராகவும், மாநிலங்களவை உறுப்பினராகவும், 3 முறை மக்களவை உறுப்பினராகவும் தேர்வு பெற்று சிறப்பான பணியாற்றியுள்ளார். அவரது அர்ப்பணிப்பை வருங்கால தலைமுறையினர் அறிந்துகொள்ளவும் அங்கீகரிக்கவும் காயிதே மில்லத் பெயரில் ஆண்டுதோறும் விருது வழங்க காயிதே மில்லத் கல்வி மற்றும் சமூக அறக்கட்டளை தீர்மானித்துள்ளது.

அரசியல் மற்றும் பொதுவாழ்வில் உயர்ந்த ஒழுக்க நெறிமுறைகள் மற்றும் கோட்பாடுகளுக்கான விருதாக இது வழங்கப்படும். கடந்த 1974-ம் ஆண்டு தொடங்கப்பட்ட காயிதே மில்லத் கல்வி மற்றும் சமூக அறக்கட்டளையின் 40-ம் ஆண்டு நிறைவு விழா, ஜனவரியில் நடத்தப்படுகிறது. அந்த விழாவில் விருது வழங்கப்படும். இவ்வாறு அதில் கூறப்பட்டுள்ளது.

பன்முக பயன்பாட்டுக்கு ஏற்ற ஸ்மார்ட் கார்டு!

அரசின் சேவைகளை துரிதமாகவும் சிறப்பாகவும் செய்யவேண்டும் என்பதில் இருவேறு கருத்துகள் இருக்க முடியாது. அரசின் பல சேவைகளில் ஒன்று DCT (Direct Cash Transfer). முதியோர் ஓய்வுதியம், மாணவர்களின் படிப்பு ஊக்கத்தொகை (Scholarship), கிராம வேலைவாய்ப்பு ஊதியம், கர்ப்பிணி பெண்கள் மற்றும் பாலூட்டும் தாய்மார்கள் உதவித் தொகை எனப்பல திட்டங்களில் அரசு மக்களுக்கு DCT செய்கிறது.

இவ்வாறான தொகைகளை பெற பயனாளிகள் அரசு அலுவலகத்திற்கு வரவேண்டும் அல்லது தபால் துறை பண மாற்று (postal money order) முறையைப் பயன்படுத்தவேண்டும். இவை இரண்டிலும் பயனாளிகளுக்கு முழு பணத் தொகை சென்று சேர்வதில்லை என்ற குற்றச்சாட்டுக்கள் உண்டு. இந்தப் பிரச்சினையைத் தீர்க்க முந்தைய ஆந்திர அரசு ஸ்மார்ட் கார்டு திட்டத்தை அறிமுகப்படுத்தியது.

இந்த முயற்சியின் சாதக பாதங்களை ஆராய அமெரிக்காவின் மூன்று பொருளியல் வல்லுனர்கள் முன்வந்தனர். (Muralidharan, K, P Niehaus and S Sukhtankar (2014), ‘Building state capacity: Evidence from biometric smartcards in India’, Working Paper No. 19999, National Bureau of Economic Research, USA)

ஒரு சில மண்டலங்களில் ஸ்மார்ட் கார்டு கொடுக்கப்பட்டது, அதற்கு பிறகு இரண்டு வருடங்களுக்குப் பிறகுதான் மற்ற மண்டலங்களில் ஸ்மார்ட் கார்டு கொடுக்கப்பட்டன. ஸ்மார்ட் கார்டுகள் பெற்ற மண்டலங்களின் மக்களுடன் ஒப்பிடும்போது ஸ்மார்ட் கார்டுகள் பெறாத மண்டலங்களிள் மக்கள் குறைவாகவே DCT-யின் பயன்பாட்டை அடைந்துள்ளதாக 1.9 கோடி மக்களிடம் திரட்டப்பட்ட புள்ளிவிவரங்களின் அடிப்படையில் இந்த ஆராய்ச்சி கூறுகிறது.

ஸ்மார்ட் கார்டு பெறாத மண்டலங்களை ஒப்பிடும்போது, ஸ்மார்ட் கார்டு பெற்ற மண்டலங்களில் நூறு நாள் வேலை திட்டத்தில் வேலைக்கும் ஊதியம் பெறும் நாளுக்கும் உள்ள இடைவெளி 29% குறைந்தும், 39% அதிக நிலைத் தன்மையுடன் கூலியைப் பெற்றனர்.

இரு மண்டலங்களில் இந்த திட்டத்தின் செலவுகள் ஒன்றாக இருக்க, ஸ்மார்ட் கார்டு உள்ள மண்டலங்களில் மக்களின் கூலித் தொகை ஒரு வாரத்திற்கு 24% அதிகமாகவும், திட்டத்தொகை விரையமாவது 3௦.8% இருந்து 10.8%ஆக குறைந்தது.

இதே போல் ஸ்மார்ட் கார்டு உள்ள மண்டலங்களில் 5% பயனாளிகளுக்குக் கூடுதலாக முதியோர் ஓய்வூதியம் சென்று அடைந்தது. இது மட்டுமல்லாமல் இத்திட்டத்தில் பணம் விரையமாவது 49% குறைந்தது. நூறுநாள் வேலை திட்டம், முதியோர் ஓய்வூதியம் ஆகிய திட்டங்களில் உள்ளவர்களில், ஸ்மார்ட் கார்டு பெற்ற பயனாளிகள் இந்த ஸ்மார்ட் கார்டு தங்களின் பயன்பாட்டை உயர்த்தியுள்ளதாக தெரிவித்தனர்.

ஸ்மார்ட் கார்டு வழங்கப்பட்ட மண்டலங்களில் 5௦% பயனாளிகளுக்குத்தான் ஸ்மார்ட் கார்டுகள் கொடுக்கமுடிந்தது. அதே மண்டலங்களில் மற்ற பயனாளிகள் எப்போதும் போல பழைய முறைப்படி பயன்பாட்டை அடையலாம் என்ற முறையும் இருந்தது. இந்த இரண்டு வருடங்களில் ஸ்மார்ட் கார்டு வழங்க செய்யப்பட்ட செலவைவிட அதனால் ஏற்பட்ட கூடுதல் பயனின் ரூபாய் மதிப்பு அதிகம். எனவே DCT போன்ற திட்டங்களில் ஆதார் கார்டு போன்ற முறையை பயன்படுத்தி வங்கி கணக்கில் பணத்தை செலுத்துவது பலவழிகளில் சிறப்பாக இருக்கும் என்று இந்த ஆய்வு முடிக்கிறது.

இந்தத் திட்டங்களைச் செயல்படுத்தினால் தாங்கள் ஆதாயம் அடைவது குறையும் அரசு அமைப்பில் உள்ளவர்கள் இதன் செயல்பாடுகளை நிறுத்த முயல்வது இயற்கை. அதனையும் மீறித்தான் ஆதார் போன்ற ஸ்மார்ட் கார்டு திட்டங்களை செயல்படுத்தவேண்டும். எல்லா இடங்களிலும் வங்கி அமைப்புகளை உருவாக்குவதும் ஒரு சவாலாக இருக்கும். ஆனால் வங்கிகள் உள்ள நகரங்களில் கிராமங்களில் இதனை உடனடியாக அமல்படுத்தி அதே நேரத்தில் மற்ற இடங்களுக்கு விரிவுபடுத்தவேண்டும்.

ஆதார் கார்டு வழங்கும் திட்டத்தை ஒரே ஆட்சி காலத்தில் செயல்படுத்த முடியாது. இந்திய போன்ற நாடுகளில் அதிக ஆண்டுகளாகும். அமெரிக்காவில் இது போன்ற திட்டங்களை ஸ்மார்ட் கார்டு திட்டத்திற்கு மாற்ற 15 வருடங்கள் ஆனதாகத் தெரிகிறது. இன்று 80-க்கும் மேற்பட்ட நாடுகளில் இதுபோன்ற ஸ்மார்ட் கார்டுகள் மூலம் DCT நடைபெறுகிறது.

ஸ்மார்ட் கார்டுகள் Bio-metric முறைப்படி தயாரிக்கப்பட்ட அடையாள அட்டைகள், இது ஒருவரின் கை ரேகை போன்ற மனித உடலின் அடையாளங்களைக் கொண்டு தயாரிக்கப்படுகிறது, ஸ்மார்ட் கார்டை பயன்படுத்த படிப்பறிவு தேவை இல்லை. ஒருவரின் கை ரேகையும் அவரின் ஸ்மார்ட் கார்டில் உள்ள கை ரேகையும் ஒன்றாக உள்ளதா என்பதை எளிதில் ஒப்பிட்டு பார்க்கலாம்.

இப்போது உள்ள அடையாள அட்டைகளில் ஒருவரின் புகைப்படம் இருப்பதை பார்த்திருப்பீர்கள். இவ்வாறான அடையாள அட்டையை எளிதில் மறுபிரதி எடுத்து அதில் உள்ள விவரங்களை மாற்றலாம். ஆனால் bio-metric ஸ்மார்ட் கார்டுகளில் உள்ள விவரங்களை மாற்றி எடுக்க முடியாது. மேலும் ஒருவரே இரண்டு இடங்களில் இவ்வாறான அடையாள அட்டைகளை எடுத்தாலும் எளிதில் கண்டுபிடித்துவிடலாம். ஸ்மார்ட் கார்டுகளை எங்கெல்லாம் பயன்படுத்துகிறோமோ அங்குள்ள விவரங்கள் அனைத்தும் ஒரு கம்ப்யூட்டரில் பதிவாகிவிடும்.

ஸ்மார்ட் கார்டுகளில் மற்ற அட்டைகளில் உள்ள விவரங்களையும் சேமிக்க முடியும். உதாரணமாக வாக்காளர் அட்டை, ஓட்டுனர் உரிமம் அட்டை, நிரந்தர கணக்கு எண் அட்டை (பான் கார்டு), ரேஷன் கார்டு, வங்கிக் கணக்கு புத்தகம் என்ற பலவற்றையும் இதில் சேர்க்கமுடியும். எனவே பல அட்டைகளுக்கு பதிலாக இந்த ஒரு அட்டையே எல்லா வேலைகளையும் செய்யும். இதில் உள்ள தொழிநுட்ப பிரச்சனைகளை அறிவியல் உலகம் சாமாளித்து வருகிறது. எப்படி இருந்தாலும் புகைப்பட அடையாள அட்டையை விட ஸ்மார்ட் கார்டு சிறந்தது.

அரசு இடங்களில் ஆக்கிரமிப்பு கூடாது

திருவாரூர், நாகை மாவட்டங்களில் அரசுக்கு சொந்தமான இடங்களில் ஆக்கிரமிப்பு செய்யக் கூடாது என ஆட்சியர்கள் தெரிவித்துள்ளனர்.

இதுகுறித்து திருவாரூர் ஆட்சியர் எம். மதிவாணன், நாகை ஆட்சியர் து. முனுசாமி ஆகியோர் தனித்தனியே வெளியிட்ட செய்திக்குறிப்பில் தெரிவித்துள்ளதாவது:

இந்த மாவட்டங்களில் அரசு இடங்களில் உள்ள ஆக்கிரமிப்புகளை அகற்றும்போது பல்வேறு இடர்பாடுகள் ஏற்படுகின்றன. எனவே, அரசு இடங்களை யாரும் ஆக்கிரமிப்பு செய்யக் கூடாது. மக்கள் யாரேனும் ஆக்கிரமிப்பு செய்திருந்தால் தாமாக முன்வந்து அகற்றிக் கொள்ள அறிவுறுத்தப்படுகிறார்கள்.

ஆக்கிரமிப்பு குறித்து மக்களிடமிருந்து வரும் புகார் மனுக்கள் மீது நடவடிக்கை மேற் கொள்ள கோட்ட அளவில், கோட்டாட்சியர்கள், டிஎஸ்பிக்கள், வட்ட துணை ஆய்வாளர்கள் (நிலஅளவை), மாவட்ட அளவில் மாவட்ட வருவாய் அலுவலர், மாவட்ட காவல் கண்காணிப்பாளர் மற்றும் துணை இயக்குநர் (நில அளவை) தலைமையில் ஆக்கிரமிப்பு தொடர்பான குறைகளை சரிசெய்ய குழு அமைக்கப்பட்டுள்ளது.

ஆக்கிரமிப்பு நடவடிக்கைகளில் சட்டப்படியான குறைகள் இருந்தால் மக்கள் மனுக்களாக தொடர்புடைய வருவாய் வட்டாட்சியருக்கு தகவல் தெரிவிக்கலாம். ஆக்கிரமிப்புக் குறித்து வரும் புகார் மனு மீது வட்டாட்சியர் உரிய நடவடிக்கை மேற்கொண்டு மனுதாரருக்கு 60 நாள்களுக்குள் தகவல் தெரிவிக்க வேண்டும். நடவடிக்கையில் மனுதாரர் திருப்தி அடையவில்லையெனில் கோட்டாட்சியரிடம் மேல்முறையீடு மனு செய்யலாம். மேல்முறையீட்டு மனு மீது 30 நாள்களுக்கு நடவடிக்கை மேற்கொண்டு மனுதாரருக்கு தகவல் தெரிவிக்கப்படும்.

குடும்ப அட்டையில் உள்தாள் இணைக்க காலக்கெடு இல்லை: அமைச்சர் தகவல்

குடும்ப அட்டையில் உள்தாளை இணைத்து பெறுவதற்கு காலக்கெடு ஏதும் நிர்ணயம் செய்யப்படவில்லை இல்லை என தமிழக அரசு தெரிவித்துள்ளது.

குடும்ப அட்டைகளில் உள்தாள்கள் ஒட்டும் பணி முன்னேற்றம் மற்றும் பொது விநியோகத் திட்ட செயல்பாடுகள் குறித்த, மாவட்ட வழங்கல் மற்றும் நுகர்வோர் பாதுகாப்பு துறை அலுவலர்களின் மாநில அளவிலான ஆய்வுக் கூட்டம் இன்று (திங்கள்கிழமை) அமைச்சர் காமராஜ் தலைமையில் நடைபெற்றது.

கூட்டத்தில் பேசிய அமைச்சர், "குடும்ப அட்டையில் உள்தாளை இணைத்து பெறுவதற்கு காலக்கெடு ஏதும் நிர்ணயம் செய்யப்படவில்லை. மீதமுள்ள குடும்ப அட்டைகளில் உள்தாள்கள் ஒட்டும் பணியினை துரிதப்படுத்தி, பொது மக்களுக்கு எவ்வித சிரமமுமின்றி, இதனை விரைந்து முடிக்க வேண்டுமென்று அலுவலர்களுக்கு உத்தரவிடப்பட்டுள்ளது.

வெள்ளை நிறமுடைய எப்பொருளும் வேண்டா குடும்ப அட்டைதாரர்கள் மற்றும் முகவரி ஆதாரத்திற்காக வழங்கப்படும் மஞ்சள் நிறமுடைய தக்கல் குடும்ப அட்டைதாரர்கள் அவர்களுடைய "N" குடும்ப அட்டைகளை புதுப்பித்துக் கொள்ள www.consumer.tn.gov.in என்ற இணைய தளத்தில் வசதி செய்து தரப்பட்டுள்ளது. இவ்வசதி 31.3.2015 வரை செயல்பாட்டில் இருக்கும். இதனை பயன்படுத்திக் கொள்ளுமாறு கேட்டுக் கொள்ளப்படுகிறார்கள். இணையதளத்தில் குடும்ப அட்டையை புதுப்பித்துக் கொள்ள இயலாத வெள்ளை மற்றும் மஞ்சள் நிறமுடைய எப்பொருளும் வேண்டா குடும்ப அட்டைதாரர்கள் பொது விநியோகத் திட்ட குறைதீர் முகாம்களில் அவர்களுடைய குடும்ப அட்டையை புதுப்பித்துக் கொள்ளலாம்.

குடும்ப அட்டை கோரி மனு செய்தவர்கள் குறிப்பிட்ட காலக்கெடுவிற்குள் தகவல்கள் கிடைக்கப் பெறவில்லையெனில்

உணவுப் பொருள் வழங்கல் மற்றும் நுகர்வோர் பாதுகாப்புத் துறை ஆணையாளர் அலுவலக இ-மெயில் முகவரிக்கு கோரிக்கை அனுப்பலாம். அலுவலர்களின் செல்லிடை பேசி மற்றும் இ-மெயில் முகவரிகள் இத்துறையின் இணைய தளத்தில் (www.consumer.tn.gov.in) அளிக்கப்பட்டுள்ளது.

பொது விநியோகத் திட்டம் மற்றும் குடும்ப அட்டைத்தாரர்களின் குறைபாடுகளைக் களைவதற்கு, "குறைதீர் முகாம்கள்" சென்னை உள்ளிட்ட அனைத்து மாவட்டங்களிலும், மாதந்தோறும் 2-ம் சனிக்கிழமையன்று காலை 10 மணி முதல் 1 மணி வரை நடத்தப்பட்டு வருகிறது.

இம்முகாம்களில் உரிய ஆவணங்களுடன் விண்ணப்பிக்கப்படும் குடும்ப அட்டை கோரும் மனுக்கள், அட்டைகளின் நகல் கோருதல், குடும்ப அட்டைகளில் உறுப்பினர்களின் பெயர் சேர்த்தல், நீக்கல், முகவரி மாற்றம், எரிவாயு இணைப்புகள் மற்றும் இவை தொடர்பான திருத்தங்கள் குறித்த மனுக்கள் பிற்பகல் வரை பெறப்பட்டு, உரிய பரிசீலனைக்குப் பிறகு அன்று மாலைக்குள் அவற்றுக்கு தீர்வு காணப்படுகிறது.

இக்குறைதீர் முகாம்களில் மாவட்ட, வட்ட வழங்கல் அலுவலர்கள், வருவாய் துறை அலுவலர்கள், மக்கள் பிரதிநிதிகள் கலந்து கொள்கின்றனர். ஜூன் 2011 முதல் 13.12.2014 வரையில் இம்முகாம்களில் 3 இலட்சத்து 7 ஆயிரத்து 70 மனுதாரர்கள் பயனடைந்துள்ளனர்" என அமைச்சர் தெரிவித்தார்.

10-ம் வகுப்பு பொதுத்தேர்வு அட்டவணையில் மாற்றம்

பத்தாம் வகுப்பு பொதுத் தேர்வு அட்டவணையில் சிறிய மாற்றம் செய்து அரசு தேர்வுகள்துறை அறிவித்துள்ளது.

தமிழகத்தில் பத்தாம் வகுப்பு பொதுத் தேர்வுகள் அடுத்த ஆண்டு மார்ச் 19-ம் தேதி தொடங்கி, ஏப்ரல் 10-ம் தேதி வரை நடக்கிறது. இதற்கான அட்டவணையை அரசு தேர்வுத்துறை ஏற்கெனவே வெளியிட்டிருந்தது. அதில் தற்போது சிறிய மாற்றம் செய்யப்பட்டுள்ளது.

பழைய அட்டவணைப்படி, மார்ச் 24-ம் தேதி நடப்பதாக அறிவிக்கப்பட்டிருந்த மொழிப்பாடம் 2-ம் தாள் தேர்வு, மார்ச் 20-ம் தேதியே நடக்கும் என தெரிவிக்கப்பட்டுள்ளது.

இவ்வாறு அரசு தேர்வுத்துறை அறிவித்துள்ளது.

திருமணத்துக்காக இஸ்லாம் மதத்துக்கு மாறுவது செல்லாது:அலகாபாத் உயர் நீதிமன்றம் பரபரப்பு தீர்ப்பு

திருமணம் என்ற தனிப்பட்ட நோக்கத்துக்காக இஸ்லாம் மதத்துக்கு மாறுவது செல்லாது என உத்தரப் பிரதேச மாநிலம் அலாகாபாத் உயர் நீதிமன்றம் உத்தரவிட்டுள்ளது.

இதுதொடர்பாக உத்தரப் பிரதேச மாநிலத்தின் பல்வேறு மாவட்டங்களைச் சேர்ந்த 5 தம்பதியினர் அலாகாபாத் உயர் நீதிமன்றத்தில் மனு தாக்கல் செய்திருந்தனர். அந்த 5 தம்பதியர்களில், கணவர் இஸ்லாம் மதத்தைச் சேர்ந்தவர். மனைவி ஹிந்து மதத்தைச் சேர்ந்தவர் ஆவர். திருமணத்துக்காக கணவரின் மதமான இஸ்லாமுக்கு 5 பெண்களும் மதம் மாறியிருந்தனர்.

அந்த 5 தம்பதியினரும், தங்களுக்கு பாதுகாப்பு வழங்க உத்தரவிட வேண்டும் என்று நீதிமன்றத்திடம் முறையிட்டிருந்தனர். இந்த மனுக்கள், அலாகாபாத் உயர் நீதிமன்றத்தில் நீதிபதி சூர்ய பிரகாஷ் கேசர்வானி முன்னிலையில் அண்மையில் விசாரணைக்கு வந்தன. அப்போது நீதிபதி தெரிவித்ததாவது:

கடந்த 2000ஆம் ஆண்டு இஸ்லாம் மதத்தின் மீது நம்பிக்கை என்ற அடிப்படையில்லாமல், பிற மதத்தைச் சேர்ந்தவர்கள் திருமணத்துக்காக மட்டும், அந்த மதத்துக்கு மாறுவது செல்லாது என உச்ச நீதிமன்றம் தீர்ப்பளித்துள்ளது. அதன்படி, இந்த மனுக்கள் மீதும் தீர்ப்பளிக்கிறேன்.

ஏனெனில், இந்த திருமணங்கள் அனைத்தும், புனித குரானின் சூரா 2 அயாத் 221ஆவது பிரிவுக்கு எதிரானதாகும். அந்தப் பிரிவில், இஸ்லாம் மீது நம்பிக்கையில்லாத பெண்ணை திருமணம் செய்யக் கூடாது. அதேபோல் இஸ்லாமியர்கள் தங்களது மகள்களை, இஸ்லாத்தின் மீது நம்பிக்கை வைக்காதோருக்கு திருமணம் செய்து வைக்கக் கூடாது எனத் தெரிவிக்கப்பட்டுள்ளது.

மனுத்தாக்கல் செய்துள்ள பெண்கள் அனைவரும், தங்களுக்கு இஸ்லாம் குறித்து எதுவும் தெரியாது என தெரிவித்துள்ளனர். திருமணத்துக்காகவே, இஸ்லாம் மதத்துக்கு மாறியதாகவும் அவர்கள் கூறியுள்ளனர். எனவே, அவர்களின் மதம் மாறுதலை அங்கீகரிக்க இயலாது என்றார் அவர்.

மேலும், 5 தம்பதியினர் தாக்கல் செய்திருந்த மனுக்களையும் நீதிபதி தள்ளுபடி செய்து உத்தரவிட்டார்.

திருவாரூரில் மின் தடை அறிவிப்பு

திருவாரூர் பவித்திரமாணிக்கத்தில் உள்ள துணை மின் நிலையத்தில் மாதாந்திர பராமரிப்பு பணிகள் நடைபெறவிருப்பதால் திருவாரூர் நகரம், கொடிக்கால் பாளையம், அடியக்கமங்கலம் ,புலிவலம், விளமல், நீலப்பாடி மற்றும் சுற்று வட்டார கிராமங்களில் 20/12/2014 சனிக்கிழமை காலை 9 மணி முதல் மாலை 5 மணி வரை மின் விநியோகம் இருக்காது என திருவாரூர் உதவி செயற்பொறியாளர் அறிவித்துள்ளார்.

தீவிரவாதத்துக்கு எதிராக உலக நாடுகள் போரிட வேண்டும்: ஐ.நா. பொதுச் செயலாளர் அழைப்பு

பான் கி-மூன்

தீவிரவாதத்துக்கு எதிராக உலக நாடுகள் ஒன்றிணைந்து போரிட வேண்டும் என்று ஐ.நா. பொதுச்செயலாளர் பான் கி-மூன் அழைப்பு விடுத்துள்ளார்.

இதுதொடர்பாக அவர் நிருபர்களிடம் கூறியதாவது:

சிறுபான்மையினர், அகதிகள், அப்பாவி மக்களை குறிவைத்து நடத்தப்படும் தீவிரவாத தாக்குதல்கள் அண்மைக்காலமாக அதிகரித்து வருகின்றன. உலகின் பல்வேறு பகுதிகளில் தீவிரவாதம் பெரும் அச்சுறுத்தலாக உள்ளது.

இந்தப் பிரச்சினைக்கு தீர்வு காண உலக நாடுகள் அனைத்தும் ஒன்றிணைந்து தீவிரவாதத்துக்கு எதிராக தீரமாக போரிட வேண்டும்.

வரும் 2015-ம் ஆண்டு செயல் ஆண்டாக இருக்க வேண்டும். உலகம் முழுவதும் வாழும் மக்கள் செழுமை அடைய வேண்டும், ஒளிமயமான எதிர்காலத்தைப் பெற வேண்டும். அதை இலக்காக கொண்டு ஐ.நா. சபை செயல் படும்.

பாகிஸ்தானில் நடைபெற்ற தீவிரவாத தாக்குதலை சகித்துக் கொள்ளவே முடியாது. ஆப்கானிஸ்தான், நைஜீரியா, சோமாலியா உட்பட பல்வேறு பகுதிகளில் தீவிரவாத பிரச்சினை தலைதூக்கியுள்ளது. அதனை அடியோடு வேரறுக்க வேண்டும்.

அமெரிக்காவின் சி.ஐ.ஏ. புலனாய்வு பிரிவினர் நடத்திய சோதனை முறைகள் மனித உரிமைகளை மீறும் வகையில் உள்ளன. இதுபோன்ற தவறுகள் தடுத்து நிறுத்தப்பட வேண்டும். உலக நாடுகள் அனைத்தும் மனித உரிமைக்கு முன்னுரிமை, முக்கியத்துவம் அளிக்க வேண்டும் என்று அவர் தெரிவித்தார்.

டிசம்பர் 18 சிறுபான்மையினர் உரிமைகள் தினம்

 


இன்று மாவட்ட ஆட்சியர் அலுவலகத்தில் நடைபெற்ற விழாவில் மாவட்ட வருவாய் அலுவலர் மணிமாறன் கலந்து கொண்டு சென்ற ஆண்டு நடந்த 10ம் மற்றும் 12ம் வகுப்பு பொது தேர்வில் முதல் மூன்று இடங்கள் பெற்றவர்களுக்கு பரிசுத்தொகையும் சான்றிதலும் வழங்கப்பட்டன .