காவல்துறை நவீன மயமாக்கல் திட்டம்

: தகவல் தொடர்பு பரிமாற்ற வசதியால் வழக்குகள் உடனுக்குடன் தீர்வு

தமிழகத்தில் திருட்டுப் போன வாகனங்களை உடனுக்குடன் கண்டுபிடிப்பதற்கு, குற்றம் மற்றும் குற்றவாளிகள் கண்காணிப்பு வலைத்தளச் சேவை பெரிதும் உதவிகரமாக உள்ளது. இந்த சேவையின் மூலம் 10 ஆண்டுகளுக்கு முன்பு காணாமல் போன வாகனத்தை போலீஸார் மிக அளிதாக மீட்க முடிந்திருக்கிறது.

38 லட்சம் ஆவணங்கள் கணினிமயம்

காவல்துறை நவீனமயமாக்கல் திட்டத்தின் கீழ் நாடு முழுவதிலும், குற்றம் மற்றும் குற்றவாளிகள் கண்காணிப்பு வலைத்தளத் திட்டம் (சிசிடிஎன்எஸ்), அனைத்து மாநில காவல்துறைகளிலும் அமல்படுத்தப்பட்டுவருகிறது. இதன்படி, குற்றங்கள் மற்றும் குற்றவாளிகளின் தகவல்கள், காணாமல் போனவர்கள் மற்றும் அடையாளம் தெரியாத சடலங்கள் போன்ற தகவல்கள் கணினிமூலம் தொகுக்கப்படுகின்றன. தமிழகத்தில் 2003-ம் ஆண்டு முதல் பதிவான அனைத்து வழக்குகள், பெறப்பட்ட புகார்களைப் பதியும் பணி கடந்த ஆண்டு மார்ச் மாதத்தில் தொடங்கப்பட்டது. அதில் இதுவரை 38 லட்சம் வழக்கு ஆவணங்கள் பதிவுசெய்யப்பட்டுள்ளன.

வாகனத்திருட்டு வழக்குகள்…

இத்திட்டத்தின்படி, மாநிலத்தில் உள்ள எந்தவொரு காவல்நிலையத்திலும், அவ்வப்போது பெறப்படும் புகார்களின் விவரங்கள் கணினியில் பதிவு செய்யப்படுகின்றன. அவை உடனுக்குடன், சென்னையில் உள்ள மாநில குற்ற ஆவண காப்பகத்தின் மாநில தகவல் மைய சர்வரில் பதிவாகிவிடுகின்றன. இதற்காக, அனைத்து காவலர்கள் மற்றும் அதிகாரிகளுக்கு கடந்த ஆண்டு முதல் மாவட்டந்தோறும் பயிற்சியளிக்கப்பட்டுவருகிறது. மாநிலத்தின் ஏதோ ஒரு மூலையில் உள்ள காவல்நிலைய கணினியில் பதிவுசெய்யப்படும் எந்த வகையான புகாரையும், வேறிடத்தில் உள்ள காவல்நிலையத்தவரும், உயரதிகாரிகளும் பார்க்கும் வகையில் அனைத்து காவல்நிலையங்களும் வலைப்பின்னலால் ஒருங்கிணைக்கப்பட்டுள்ளனய இந்த வசதியால் பல்வேறு வழக்குகள் விரைவாக முடிக்கப்படும் நிலை உருவாகியுள்ளது. குறிப்பாக, வாகனத்திருட்டு வழக்குகளுக்கு வெகு வேகமாக தீர்வு கிடைப்பதும் தெரியவந்துள்ளது.

இது குறித்து மாநில குற்ற ஆவணக் காப்பக வட்டாரங்கள் கூறியதாவது:-

10 ஆண்டுக்கு முன் இறந்தவரின்…

சிசிடிஎன்எஸ் திட்டத்தில் வாகனத் திருட்டு வழக்குகள் வெகு விரைவாக கண்டறியப்படுகின்றன. பல ஆண்டுகளுக்கு முன்பு காணாமல் போன நூற்றுக்கணக்கான வாகனங்கள் இச்சேவையின் மூலம் கண்டறியப்பட்டுள்ளன. ஒரே நாளில் 14 வாகன வழக்குகளுக்கு தீர்வு காணப்பட்ட சம்பவங்களும் நடந்துள்ளது. உதாரணத்துக்கு, கடந்த 2004-ம் ஆண்டில் காணாமல்போன ஒரு இருசக்கர வாகனத்தினை 10 ஆண்டுகள் கழித்து போலீஸார் சமீபத்தில் சிசிடிஎன்எஸ் வசதி மூலம் கண்டுபிடித்துள்ளனர். புதுக்கோட்டையில் வாகனவிபத்தில் உயிரிழந்த ஒருவரின் வாகனம் (டிஎன்63ஒய் 7481) அது. சமீபத்தில் மதுரையில் கருப்பாயூரணி போலீஸார் வாகனச் சோதனை நடத்தியபோது அது திருட்டு வாகனம் எனத் தெரியவந்தது. அந்த வாகனத்தின் எஞ்சின், சேஸிஸ் எண்களை சிசிடிஎன்எஸ் வசதி மூலம் சரிபார்த்தபோது, உண்மை தெரியவந்தது.

வடமாவட்டங்களை விட தென்மாவட்ட போலீஸார் இந்த சேவையைச் சிறப்பாக பயன்படுத்தி வருவதைத் தொடர்ந்து அனைத்து காவல்நிலையங்களுக்கும், இச்சேவையை நன்றாக பயன்படுத்திக் கொள்ளக் கூறி சுற்றறிக்கை அனுப்பப்பட்டுள்ளது.

பொதுமக்களுக்கு வசதி…

சிசிடிஎன்எஸ்-ல் பொதுமக்கள் பல்வேறு சேவைகளை ஆன்லைன் (eservices.tnpolice.gov.in) வழியாகவே பெறமுடியும். அந்த இணையதளத்தில் பொதுமக்கள், தங்களது எல்லாவிதமான புகார்களைப் பதிவு செய்யலாம். அவர்களுக்கு உடனடியாக ஒரு ரகசிய ஒப்புகை எண் வழங்கப்படும். அதற்கடுத்த ஓரிரு தினங்களுக்குள் அவர்களுக்கு அது தொடர்பான பதில் இமெயலிலோ, செல்போன் மூலமாகவோ அந்தந்த காவல்நிலையத்தில் இருந்து அனுப்பப்படும். தங்களது புகார் எந்த நிலையில் இருக்கிறது என்பதையும் அவ்வப்போது அவர்கள் பார்த்துத் தெரிந்துகொள்ளமுடியும்.

40 சதவீதம் ‘செல்போன்’ புகார்கள்…

எல்லா காவல்நிலையத்திலும் இந்த வசதியின் கீழ் பெறப்படும் புகார்கள் மீது நடவடிக்கை எடுக்கப்படுகிறதா என்று தலைமையகத்தில் கண்காணிக்கப்படுகிறது. ஒரு மாதத்துக்கு சராசரியாக 700 ஆன்லைன் புகார்கள் வருகின்றன. அவற்றில் செல்போன் தொடர்பாக மட்டும் 40 சதவீதம் புகார்கள் வருகின்றன.

இவ்வாறு அவர்கள் தெரிவித்தனர்.

பழைய வாகனம் அல்லது செல்போன் வாங்கும் முன்…

பழைய இரு சக்கர வாகனங்களையோ, செல்போன்களையோ வாங்குவதற்கு முன்பு பொதுமக்கள், இந்த இணையதளத்தில், அதற்கான பிரத்யேக வசதி (check before buying) செய்யப்பட்டுள்ள இடத்தில், வாகனப்பதிவெண், எஞ்சின் எண் மற்றும் செல்போனில் உள்ள 15 இலக்க ஐஎம்இஐ எண்-ஐ பதிவு செய்தால், அவை காணாமல் போனதாக வேறெந்த காவல்நிலையத்தில் புகார் பெறப்பட்டிருந்தால், அது திருட்டுப் பொருள் (stolen) என்பதைக் கண்டறியமுடியும்.

ரயில் நிலையங்கள் தனியார் மயமாவது அவசியம்: பிரதமர் நரேந்திர மோடி பேச்சு

அசாம் மாநிலம் குவாஹாட்டியில் இருந்து மேகாலயாவுக்கு புறப்பட்ட புதிய ரயில். படம்: ரீதிராஜ் கன்வர்.

ரயில் நிலையங்களை தனியார்மயமாக்க வேண்டிய அவசியம் ஏற்பட்டுள்ளது என்று பிரதமர் நரேந்திர மோடி தெரிவித்துள்ளார்.

அசாம் மாநிலம் குவாஹாட்டி, மேகாலயத்தின் மெண்டிபாதரை இணைக்கும் ரயில் சேவையை பிரதமர் மோடி நேற்று தொடங்கிவைத்தார். குவாஹாட்டியில் நடைபெற்ற தொடக்க விழாவில் அவர் பேசியதாவது:

ரயில் நிலையங்களை ஏழை, நடுத்தர மக்களே அதிகம் பயன்படுத்துகின்றனர். ஆனால் ரயில் நிலையங்கள் தரம் திருப்திகரமாக இல்லை. விமான நிலையங்களைப் போன்று ரயில் நிலையங்களும் தரம் உயர்த்தப்பட வேண்டும்.

அதற்கு ரயில் நிலையங்களை தனியார்மயமாக்க வேண்டிய அவசியம் ஏற்பட்டுள்ளது. அப்போதுதான் ரயில் நிலையங்கள் நவீனமாகும்.

ரியல் எஸ்டேட் துறை வேகமாக வளர்ச்சி அடைந்து வருகிறது. இதனை ரயில்வே துறை சாதகமாகப் பயன்படுத்திக் கொள்ள வேண்டும். ரயில்வேக்கு சொந்தமான இடங்களை தனியாருக்கு குத்தகைக்கு அளிக்கலாம். இதன்மூலம் ரயில்வேக்கு கணிசமான வருவாய் கிடைக்கும்.

நாட்டின் பொருளாதார வளர்ச்சிக்கு ரயில்வே துறை முதுகெலும்பாக விளங்கி வருகிறது. ஒரு ரயிலில் கூடுதலாக ஒரு பெட்டியை இணைப்பது மூலமோ, ஒரு ரயில் நிலையத்தை தரம் உயர்த்துவது மூலமோ பெரிதாக எதையும் சாதித்துவிட முடியாது. அனைத்து ரயில் நிலையங்களும் உலகத் தரத்துக்கு இணையாக தரம் உயர்த்தப்பட வேண்டும். அப்போது இந்திய பொருளா தாரத்தின் என்ஜினாக ரயில்வே துறை உருவெடுக்கும்.

ரயில்வே துறையை நவீனமயமாக்க 100 சதவீத அந்நிய முதலீட்டுக்கு மத்திய அரசு அனுமதி அளித்துள்ளது. நாட்டின் முக்கிய பகுதிகளில் 4 ரயில்வே பல்கலைக்கழகங்களை அமைக்க முடிவு செய்யப்பட்டுள்ளது. அங்கு ரயில்வே துறை சார்ந்த அனைத்து தொழில்நுட்பங்களும் கற்றுக் கொடுக்கப்படும்.

இவ்வாறு அவர் பேசினார்.

அடுத்த ஆண்டு முதல் அனைத்து பள்ளிகளிலும் திருவள்ளுவர் பிறந்தநாள்

அனைத்து பள்ளிகளிலும் அடுத்த ஆண்டு முதல் திருவள்ளுவர் பிறந்த நாள் கொண்டாடப்படும்- அமைச்சர் ஸ்மிருதி இரானி

நாட்டில் உள்ள அனைத்து பள்ளிகளிலும் அடுத்த ஆண்டு முதல் திருவள்ளுவர் பிறந்த நாள் கொண்டாடப்படும் என மத்திய மனிதவள மேம்பாட்டுத் துறை அமைச்சர் ஸ்மிருதி இரானி நேற்று அறிவித்தார்.

உத்தராகண்ட் மாநில பாஜக உறுப்பினர் தருண் விஜய் இதுதொடர்பாக மாநிலங்களவையில் கோரிக்கை வைத்த நிலையில் இந்த அறிவிப்பு வெளியாகி உள்ளது.

இதுகுறித்து ஸ்மிருதி இரானி செய்தியாளர்களிடம் கூறும்போது, "திருவள்ளுவர் பிறந்த நாளை நாடு முழுவதிலும் உள்ள பள்ளிகளில் கொண்டாட வேண்டும் என தருண் விஜய் மாநிலங்களையில் கோரிக்கை வைத்தார். இதற்கு அனைவருமே ஒருமனதாக ஆதரவளித்தனர். எனவே, அடுத்த ஆண்டு முதல் நாட்டில் உள்ள அனைத்து பள்ளிகளிலும் திருவள்ளுவர் பிறந்த நாள் கொண்டாடப்படும்.

மேலும் பள்ளி மாணவர்கள் அறிந்து கொள்ளும் வகையில் திருவள்ளுவர் பற்றிய நூல்கள் இந்தி மற்றும் ஆங்கில மொழிகளில் விநியோகிக்கப்படும். அவரை பற்றிய கட்டுரைப் போட்டி, பேச்சுப் போட்டி மற்றும் திருக்குறள் போட்டிகளும் பள்ளிகளில் நடத்தப்படும்" என அவர் தெரிவித்தார்.

முன்னதாக, தருண் விஜய் தலைமையில் டெல்லி தமிழ் சங்கத்தின் பொதுச்செயலாளர் கண்ணன், உபதலைவர் கே.வி.கே.பெருமாள், தமிழ் பண்பாட்டுக் கழகச் செயலாளர் எம்.நடேசன் உட்பட பல்வேறு தமிழ் அமைப்புகளின் நிர்வாகிகள் 60 பேர் ஸ்மிருதி இரானியை அவரதுஅலுவலகத்தில் சந்தித்து நன்றி தெரிவித்தனர். இவர்களுடன் மத்திய தரைவழிப் போக்குவரத்துத் துறை இணை அமைச்சர் பொன்.ராதாகிருஷ்ணனும் சென்றிருந்தார்.

காவிரியில் புதிய அணைகள்: இன்று நடக்கவிருந்த மறியல் - டிச. 4-க்குஒத்திவைப்பு

 

காவிரியில் புதிய அணைகள் கட்டும் திட்டத்தை எதிர்த்து டெல்டா மாவட்டங்களில் இன்று நடைபெறுவதாக அறிவிக்கப்பட்டிருந்த சாலை, ரயில் மறியல் போராட்டங்கள் கனமழை காரணமாக டிசம்பர் 4-ம் தேதிக்கு ஒத்திவைக்கப்பட்டுள்ளதாக அறிவிக்கப்பட்டுள்ளது.

இதுகுறித்து இந்திய கம்யூனிஸ்ட் கட்சி சார்பு தமிழ்நாடு விவசாயிகள் சங்க மாநிலப் பொதுச்செயலர் வே.துரைமாணிக்கம், மார்க்சிஸ்ட் கம்யூனிஸ்ட் கட்சி சார்பு தமிழ்நாடு விவசாயிகள் சங்க மாநிலப் பொதுச்செயலர் பெ.சண்முகம் ஆகியோர் நேற்று வெளியிட்டுள்ள அறிக்கை: காவிரியின் குறுக்கே புதிய அணைகள் கட்டும் முயற்சியில் கர்நாடக அரசு ஈடுபட்டுள்ளது. கர்நாடக அரசின் இந்த சட்டவிரோத நடவடிக்கைகளை மத்திய அரசு தடுத்து நிறுத்த வலியுறுத்தி, அனைத்து விவசாய சங்கங்கள் சார்பில் காவிரி டெல்டா மாவட்டங்களில் இன்று (நவ. 29) சாலை மற்றும் ரயில் மறியல் போராட்டங்கள் நடைபெறும் என அறிவிக்கப்பட்டிருந்தது.

இந்நிலையில், காவிரி டெல்டா மாவட்டங்களில் கடந்த 2 நாட்களாக கனமழை பெய்து வருவதால், இந்த மறியல் போராட்டம் டிசம்பர் 4-ம் தேதிக்கு ஒத்திவைக்கப்படுகிறது.

ஏற்கெனவே திட்டமிட்டிருந்த அனைத்து இடங்களிலும் ரயில் மற்றும் சாலை மறியல் போராட் டங்கள் நடைபெறும். இவ்வாறு அறிக்கையில் தெரிவிக்கப் பட்டுள்ளது.

காரைக்காலிலும் ஒத்திவைப்பு

இதேபோல, கர்நாடக அரசைக் கண்டித்து காரைக்கால் மாவட்ட விவசாயிகள் நலச் சங்கம் சார்பில் இன்று நடைபெறவிருந்த முழு அடைப்புப் போராட்டமும் மழை காரணமாக டிசம்பர் 4-ம் தேதிக்கு ஒத்திவைக்கப்பட்டுள்ளது.

பேஸ்புக் பழக்கத்தால் வந்த வினை: போலி தங்க பிஸ்கெட் கொடுத்து ரூ.40 ஆயிரம் மோசடி

கோப்புப் படம்: ஏ.பி.

ஹைதராபாத்தை சேர்ந்த லட்சுமி வர்மா சினிமா உதவி இயக்குநராக பணியாற்றி வருகிறார். இவருக்கு சில நாட்களுக்கு முன்னர் பேஸ்புக் மூலமாக சிந்து எனும் பெண் பழக்கமானார்.

திருப்பதியை சேர்ந்த அஜய் ரெட்டி எனும் சினிமா தயாரிப்பா ளரை அறிமுகப்படுத்துவதாக கூறிய சிந்து, அஜய் ரெட்டியின் செல்போன் எண்ணை லட்சுமி வர்மாவிடம் அளித்தார்.

பின்னர் லட்சுமி வர்மாவுக்கும் அஜய்ரெட்டிக்கும் செல்போன் மூலமாக பழக்கம் ஏற்பட்டது. நேற்று முன் தினம் குண்டூரில் உள்ள அரண்டல்பேட்டா பகுதியில் உள்ள தனியார் விடுதியில் இருவரும் சந்தித்துப் பேசினர். புதிதாக சினிமா படம் தயாரிப்பது குறித்து அவர்கள் பேசினர்.

தங்க பிஸ்கெட்டுகள் விற்பனை செய்யும் வியாபாரி என்று தன்னை அறிமுகப்படுத்திய அஜய்ரெட்டி, ஒரு தங்க பிஸ்கெட்டை கொடுத்துள்ளார்.

இதனை ரூ.40 ஆயிரம் கொடுத்து வாங்கி கொண்ட லட்சுமி வர்மா மீதி பணத்தை வங்கியில் செலுத்துவதாகக் கூறி உள்ளார். இதற்கு அஜய்ரெட்டி ஒப்புக்கொண்டார்.

சில மணி நேரம் கழித்து குண்டூரில் உள்ள நகைக்கடையில் தங்க பிஸ்கெட்டின் மதிப்பை அறிந்து கொள்ள லட்சுமிவர்மா சென்றார். அந்த தங்க பிஸ்கெட்டை பரிசோதித்த நகைக்கடையினர், அது போலி தங்க பிஸ்கெட் என தெரிவித்தனர்.

அதிர்ச்சி அடைந்த லட்சுமி வர்மா அரண்டல் பேட்டா போலீஸ் நிலையத்தில் புகார் தெரிவித்தார்.

இன்ஸ்பெக்டர் ஸ்ரீநிவாச ராவ் வழக்கு பதிந்து விசாரணை நடத்தி வருகிறார்

அழிந்து வரும் நிலையில் பன்னீர் திராட்சை விவசாயம்

பன்னீர் திராட்சைத் தோட்டம். - (கோப்புப்படம்)

விஜயன்

பத்தாண்டுகளுக்கு முன்பு 2 ஆயிரம் ஏக்கர் நிலப்பரப்பில் நடைபெற்ற திராட்சை விவசாயம் இப்போது 500 ஏக்கராக குறைந்துவிட்டது.

திராட்சை விவசாயம் செய்தவர்களில் பெரும்பாலானவர்கள் மாற்று விவசாயத்துக்குச் சென்றுவிட்டனர். இது தவிர சமீபத்தில் பெய்த மழையில் ரூ.10 கோடி மதிப்புள்ள திராட்சை பாழாகிவிட்டது. எஞ்சியிருக்கும் திராட்சை விவசாயிகளும் இந்தத் தொழிலை இன்னமும் தொடரத்தான் வேண்டுமா என்கிற மனக் குழப்பத்தில் இருப்பதாக தெரிவிக்கிறார்கள் கோவை மாவட்ட திராட்சை விவசாயிகள் சங்கத்தினர். கம்பம், தேனியில் 10 ஆண்டுகளுக்கு முன்பு 10 ஆயிரம் ஏக்கரில் மேற்கொள்ளப்பட்ட திராட்சை விவசாயம் தற்போது 7 ஆயிரம் ஏக்கருக்கும் கீழே சரிந்துவிட்டது.

கோவையில் 2 ஆயிரம் ஏக்கரில் இருந்து 500 ஏக்கராகிவிட்டது. இதுகுறித்து கோவை மாவட்ட திராட்சை உற்பத்தியாளர்கள் சங்கத் தலைவர் விஜயன் கூறியதாவது: இந்த திராட்சை விவசாயிகள் சங்கம் 1992-ல் 200 உறுப்பினர்களுடன் ஆரம்பிக்கப்பட்டது. 2000-ம் ஆண்டு வரை கோவையில் 3 ஆயிரம் ஏக்கரில் நடைபெற்ற திராட்சை விவசாயம் தற்போது 500 ஏக்கரில் மட்டும்தான் நடைபெறுகிறது. அநேகம் பேர் இந்த விவசாயத்திலிருந்து காய்கறி விவசாயத்துக்குச் சென்றுவிட்டார் கள். தேனி, கம்பத்திலும் இதே மோசமான நிலைமைதான். உற்பத்தி செலவு அதிகரிப்பு, கட்டுபடியாகாத விலை போன்றவைதான் இதற்கு முக்கிய காரணம்.

ஒரு ஏக்கர் திராட்சை விவசாயம் செய்ய ரூ.5 லட்சம் முதலீடு வேண்டும். கொடிக்கால்கள் கட்டி, வேலி போட்டு, பயிரிட்டு, மராமத்து வேலைகள் செய்து முதல் அறுவடை எடுக்க 18 மாதங்கள் ஆகும். அதுவரை செலவை தாக்குப்பிடிக்க வேண்டும். அரசாங்கம் சார்பாக கடன் உதவி, மருந்துகள், நவீன தொழில் நுட்பம் போன்ற எந்த உதவியும் திராட்சை விவசாயிகளுக்கு கிடைப் பதில்லை. கோவையில் முன்பு திராட்சை விவசாய ஆராய்ச்சி மையம் ஒன்று இயங்கியது. அதுவும் இப்போது இல்லை. வேளாண்மை பல்கலைக்கழகத்தில் திராட்சை விவசாயம் குறித்த ஆலோசனைகளை கேட்டால் அவர்கள் காது கொடுப்பதே இல்லை.

மேலும் மருத்துவக் குணம் மிக்க பன்னீர் திராட்சையின் விற்பனை மற்றும் அதன் மகத்துவத்தை சீட்லஸ் திராட்சைகளின் விற்பனையும் மக்களின் விருப்பமும் வெகுவாக பாதித்ததையும் இங்கே குறிப்பிட வேண்டும். கடந்த ஆண்டுகளில் பன்னீர் திராட்சையின் உற்பத்தி செலவே கிலோவுக்கு ரூ.20 ஆகும் நிலையில் அதன் விலையோ ரூ.7-க்கும் கீழே குறைந்துவிட்டதால் பாதி விவசாயிகளுக்கு மேல் இந்தத் தொழிலை விட்டுச் சென்றுவிட்டார்கள்.

பன்னீர் திராட்சை விவசாயிகளின் வாழ்க்கையை ஒளிர்விக்க தமிழகத்தில் ஒயின் தொழிற்சாலை தொடங்க வேண்டும் என்பது எங்களுடைய நீண்டகாலக் கோரிக்கை. எந்த அரசாங்கமும் இதை அக்கறையுடன் கவனிக்கவே இல்லை. இந்த நிலையில் சமீபத்தில் பெய்த மழையில் பூவும், பிஞ்சுமாக இருந்த திராட்சைகள் அழுகி, கோவை மாவட்டத்தில் மட்டும் ரூ.10 கோடிக்கும் மேல் நஷ்டம். இப்படியே போனால் பன்னீர் திராட்சை என்பது இன்னும் 5 ஆண்டு காலத்துக்குள் தமிழகத்தில் அழிந்துவிடும். இவ்வாறு அவர் தெரிவித்தார்.

சட்டமன்றத்துக்கு வந்து கருணாநிதி ஜனநாயக கடமை ஆற்ற வேண்டும் : ஓ. பன்னீர் செல்வம்

• புகைப்படங்கள்

• 

டிசம்பர் மாதம் 4ம் தேதி நடைபெற உள்ள சட்டமன்றத்துக்கு வந்து திமுக தலைவர் கருணாநிதி ஜனநாயக கடமை ஆற்ற வேண்டும் என தமிழக முதல்வர்  ஓ. பன்னீர் செல்வம் அறிக்கையில் கூறியுள்ளார்.

கருணாநிதி வெளியிட்ட அறிக்கைக்கு பதில் அளிக்கும் வகையில் ஓ. பன்னீர்செல்வம் அளித்த அறிக்கையில், தி.மு.க தலைவர் கருணாநிதியும், அவருடன் பனிப்போர் தொடுத்திருக்கும் அவரது மகன் மு.க.ஸ்டாலினும் பேரவையைக் கூட்டுவது பற்றி தரம் தாழ்ந்த அறிக்கைகளை வெளியிடுவதும், விமர்சனங்கள் செய்வதையும் தொடர்ந்து வருகின்றனர்.

சட்டப் பேரவை நடவடிக்கைகள் பற்றி கிஞ்சித்தும் கவலைப்படாத கருணாநிதி, சட்டப் பேரவையைக் கூட்டாதது தமக்கு வருத்தமளிப்பதாக பத்திரிகையாளர்களிடம் தெரிவித்தது பற்றி 22.11.2014 அன்று விரிவான அறிக்கை வெளியிட்டுள்ளேன்.

அதில், சட்டமன்றத்திற்கு வருவது என்பது கருணாநிதியைப் பொறுத்த வரையில் சட்டமன்றத்தின் தாழ்வாரத்தில் உள்ள வருகைப் பதிவேட்டில் கையொப்பம் இடுவது தான், சட்டமன்ற உறுப்பினரின் தலையாயப் பணி என்பதை கருணாநிதி ஒரு பொதுக் கூட்டத்தில் பேசியதிலிருந்து மேற்கோள் காட்டி நான் விளக்கியிருந்தேன். ‘கேள்வியும் நானே, பதிலும் நானே’ என்ற அடிப்படையில், கருணாநிதி கேள்வி-பதில் அறிக்கையில் நான் பிதற்றியிருப்பதாக தரம் தாழ்ந்து விமர்சித்ததோடு சட்டமன்றத்தைக் கூட்ட நான் பதற்றப்படுவதாகத் தெரிவித்து, ‘பட்டுக்கோட்டைக்கு வழி கேட்டால் கொட்டைப்பாக்கு என்ன விலை?’ என்பது போல் பருப்பு வாங்கும் டெண்டரில் ராமதாஸ் கேள்விக்கு பதில் கூறட்டும் என்றெல்லாம் சொல்லியிருக்கிறார். பருப்பு பற்றி ராமதாஸ் கேள்விக்கு உணவுத் துறை அமைச்சர் ஏற்கெனவே பதிலளித்துவிட்டார்.

ராமதாஸ் மீது மான நஷ்ட வழக்கு ஒன்றையும் அவர் தொடுத்துள்ளார் என்பதை கருணாநிதிக்கு இந்த நேரத்தில் நினைவூட்ட விரும்புகிறேன்.

கருணாநிதி முதலமைச்சராக இருந்த தி.மு.க ஆட்சியின் போது எப்படியெல்லாம் தரக்குறைவாக சட்டமன்றப் பேரவையின் கண்ணியத்திற்கு இழுக்கு ஏற்படும் வகையில் நடந்து கொண்டார்கள் என்பதற்கு ஒரு சில உதாரணங்களை மட்டும் நான் தெரிவித்துள்ளேன். கருணாநிதியும், அவருக்கு பக்க பலமாக இருந்த அமைச்சர்களும், தி.மு.க.வைச் சேர்ந்த சட்டமன்ற உறுப்பினர்களும் செய்த இது போன்ற அராஜக செயல்களில் அஇஅதிமுக ஒரு போதும் ஈடுபடாது என்பது தமிழக மக்கள் அனைவருக்கும் நன்கு தெரியும்.

எனவே, சட்டமன்றத்தில் தமிழக அரசை விமர்சிப்பதற்கு ஏதேனும் பொருள் இருக்கிறது என்று கருணாநிதி கருதுவாரேயானால், சட்டமன்ற உறுப்பினர் என்ற முறையில், அவரது சட்டமன்றக் கட்சித் தலைவர் மு.க.ஸ்டாலின் அவரை பேச அனுமதிப்பாரேயானால், சட்டமன்றத்தில் எடுத்துரைக்கக் கூடிய கருத்துகள் ஏதேனும் இருக்குமானால், சட்டமன்றத்திற்கு வந்து பேசக் கூடிய தைரியம் கருணாநிதிக்கு உள்ளது என்றால், கருணாநிதி, 4.12.2014 அன்று கூட்டப்பட்டுள்ள சட்டமன்றக் கூட்டத் தொடருக்கு வந்து தனது ஜனநாயகக் கடமையை ஆற்ற வேண்டும் என்று கேட்டுக் கொள்கிறேன் என வலியுறுத்தியுள்ளார்.

எண்கண் முன்மாதிரி ஊராட்சியாக மாற்றப்படும்: திருச்சி சிவா எம்.பி

திருவாரூர் மாவட்டம், கொரடாச்சேரி ஒன்றியம், எண்கண் ஊராட்சி முன்மாதிரி ஊராட்சியாக மாற்றப்படும் என்றார் மாநிலங்களவை உறுப்பினர் திருச்சி சிவா.

எம்.பி.க்கள் ஒவ்வொருவரும் ஒரு கிராம ஊராட்சியை தத்தெடுத்து மேம்பாட்டுப் பணிகளை மேற்கொள்ள வேண்டும் என பிரதமர் மோடி தெரிவித்திருந்தார். இதன்படி, எண்கண் ஊராட்சியை தேர்வு செய்த திருச்சி சிவா எம்.பி., இதற்கான கடிதத்தை மாவட்ட நிர்வாகத்திடம் ஒப்படைக்க ஆட்சியரகத்துக்கு திங்கள்கிழமை வந்தார்.

அப்போது, செய்தியாளர்களிடம் அவர் கூறியது:

ஆட்சியர் ஆய்வுக்கு சென்றுள்ளதால், மாவட்ட வருவாய் அலுவலர் பு. மணிமாறனிடம் தகவலை தெரிவித்துள்ளேன். ஊராட்சியின் தரத்தை உயர்த்த இது ஒரு நல்ல வாய்ப்பு. எனவே, மாவட்ட நிர்வாகம் முழு ஒத்துழைப்பு வழங்க வேண்டும் என்று கேட்டுக் கொண்டேன். மேம்பாட்டுப் பணிக்கான நிதி வரையறை ஏதும் இல்லை என்றார்.

பின்னர், அவர் எண்கண் ஊராட்சியை பார்வையிட சென்றார். அவருடன் திமுக மாவட்டச் செயலர் பூண்டி கே. கலைவாணன் உள்ளிட்டோர் உடனிருந்தனர்.

பிரபல முஸ்லிம் மதகுரு சையது மறைவு

சென்னையில் பிரபலமான முஸ்லிம் மதகுரு சையது முஹம்மது உமர் ஆமிர் கலீமி உடல்நலக் குறை வால் மரணமடைந்தார். அவரது இறுதி ஊர்வலத்தில் பல்லாயிரக்கணக்கான முஸ்லிம்கள் பங்கேற்றனர்.

சையத் முஹம்மது உமர் ஆமிர் கலீமிஷாஹ் நூரி என்ற முஸ்லிம் மத குரு நேற்று முன் தினம் காலையில், உடல் நலக்குறைவால் மரணமடைந்தார். இவருக்கு வயது 87. சென்னை ராயப்பேட்டையில் வசித்து வந்த இவர், தமிழகத்தின் வட மாவட்டங்கள், ஆந்திரா மற்றும் கர்நாடகா முஸ்லிம்களிடம் பிரபலமானவர்.

இவர் சென்னை ஐஸ் அவுஸ், திருவல்லிக்கேணி, ராயப்பேட்டை, பெரும்புதூர் மற்றும் சுங்குவார் சத்திரம் உள்ளிட்ட இடங்களில், அரபிக் மதரசா கல்வி நிலையங்கள் நடத்தி வருகிறார். சென்னையில் நூரிகா தரிகா என்ற ஆன்மீக மையத்தின் தலைவராகவும் செயல்பட்டு வந்தார்.

இவரிடம் ஏராளமான இளைஞர்கள் அரபிக் கல்வி கற்று, மதகுருவாகியுள்ளனர்.

மதகுரு ஆமிர் கலீமிஷாஹ், இஸ்லாமிய மதத்தை பரப்பிய மதகுரு முகைதீன் ஜிலானியின் 37வது பேரர் ஆவார் என, அவரைப் பின்பற்றும் முஸ்லிம் கள் தெரிவித்தனர். இவர் சென்னை யில் முகம்மது நபியின் பிறந்த நாளையொட்டி நடக்கும் மிலாது நபி ஊர்வலத்தை முதன் முதலில் தொடங்கி நடத்தி வைத்தவர் ஆவார்.

இவரது உடல் சென்னை ராயப்பேட்டையிலுள்ள அவரது இல்லத்திலிருந்து, பெரும்புதூர் அருகிலுள்ள சுங்குவார் சத்திரம் பன்னூர் ஆமிர் கலினி அரபிக் கல்லூரி வளாகத்துக்கு எடுத்துச் செல்லப்பட்டு, அங்கு நல்லடக்கம் செய்யப்பட்டது.

அவரது இறுதி ஊர்வலத் தில் பல்லாயிரக்கணக்கான முஸ்லிம்கள் பங்கேற்றனர்.

ரேஷன் அட்டைகள் 2015 டிசம்பர் வரை செல்லும்: தமிழக அரசு

ரேஷன் கடை | கோப்புப் படம்

தற்போது பயன்படுத்தி வரும் ரேஷன் அட்டைகள் 2015-ஆம் ஆண்டு டிசம்பர் மாதம் 31ஆம் தேதி வரை செல்லுபடியாகும் என்று தமிழக அரசு அறிவித்துள்ளது.

இது குறித்து தமிழக அரசு வெளியிட்டுள்ள செய்திக்குறிப்பில் கூறியிருப்பதாவது:

தற்போது புழக்கத்தில் உள்ள குடும்ப அட்டைகளை 2015-ம் ஆண்டிற்கு புதுப்பிக்கும் வகையில் உள்தாள்களை அச்சிட்டு, குடும்ப அட்டையில் இணைத்து, குடும்ப அட்டையின் செல்லத்தக்ககாலத்தை 01.01.2015 முதல் 31.12.2015 வரை நீட்டிக்க அரசு ஆணையிட்டுள்ளது என்று உணவுத் துறை அமைச்சர் தெரிவித்தார்.

குடும்ப அட்டைதாரர்கள் நியாயவிலைக் கடைகளுக்கு டிசம்பர் மாதம் அத்தியாவசியப் பொருட்கள் பெறவரும்போது அவர்களுடைய குடும்ப அட்டையில் 2015-ம் ஆண்டிற்கான உள்தாளினை இணைத்து வழங்குமாறும் உத்திரவிடப்பட்டுள்ளது.

எப்பொருளும் வேண்டா குடும்ப அட்டைகள் வைத்திருப்பவர்கள்கணினி மூலம் புதுப்பித்துக் கொள்ளவும் வழிவகைசெய்யப்பட்டுள்ளது.

பொது விநியோகத் திட்டத்தின் மூலம் குடும்பஅட்டைதாரர்களுக்கு வழங்குவதற்கு போதுமான தரமான விலையில்லா அரிசி அனைத்து கிடங்குகளிலும் சுமார் 3மாததேவைக்கு இருப்பு வைக்கப்பட்டுள்ளது.

சர்க்கரை, கோதுமை,பாமாயில், பருப்பு வகைகள் உள்ளிட்ட ஏனைய அத்தியாவசியப் பொருள்களும் சீரானமுறையில் விநியோகம் செய்வது உறுதி செய்யப்பட்டு வருகிறது.

பொது விநியோகத் திட்ட கிடங்குகளிலிருந்து நியாயவிலைக்கடைகளுக்கு அத்தியாவசியப் பொருட்கள் நகர்வு செய்யப்படுவதைகண்காணிக்கவும், கடைகளில் உள்ள பொருள்களின் இருப்பினை அறிந்து அவ்வப்போது தேவையான பொருள்களை நகர்வு செய்யவும்,

புதிய குடும்ப அட்டைகளை வழங்கவும், போலி குடும்ப அட்டைகளை களையவும், இத்திட்டங்களை கணினி மயமாக்க நடவடிக்கைகள் மேற்கொள்ளப்பட்டு வருகின்றன.

இவ்வாறு அந்தச் செய்திக்குறிப்பில் தெரிவிக்கப்பட்டுள்ளது.

வானிலை முன்னறிவிப்பு: நவ.27 முதல் தமிழகத்தில் தொடர் மழைக்கு வாய்ப்பு

இடம்: தூத்துக்குடி |

தமிழகத்தில் இம்மாதம் 27-ம் தேதி முதல் தொடர் மழைக்கு வாய்ப்பு உள்ளதாக, சென்னை வானிலை ஆய்வு மையம் தெரிவித்துள்ளது.

வடகிழக்கு பருவ மழையின் காரணமாக தமிழகத்தின் தென் மாவட்டங்களில் கன மழை பெய்து வருகிறது.

ராமநாதபுரம், திருநெல்வேலி, தூத்துக்குடி, கன்னியாகுமரி, மதுரை, தேனீ உள்ளிட்ட தென் மாவட்டங்களில் மேலும் மூன்று தினங்களுக்கு மழையோ இடியுடன் கூடிய மழையோ நீடிக்கும் என்று தெரிவிக்கப்பட்டுள்ளது.

இந்திய பெருங்கடலில் கடந்த இரண்டு நாட்களுக்கு முன் உருவான காற்றழுத்த தாழ்வுப் பகுதி இன்னும் வலுபெறவில்லை. இது அந்தமான் கடலிலிருந்து தென் கிழக்கு வங்கக் கடல் வரை படர்ந்துள்ளது.

இது மேலும் நகர்ந்து மேற்கு வங்கக் கடலை அடைந்த பிறகு, வரும் 26-ம் தேதி காற்றழுத்த தாழ்வு நிலையாக மாறும் என எதிர்ப்பார்க்கப்படுகிறது. அதன் பிறகு, தமிழகத்தின் வட மாவட்டங்களிலும் தொடர் மழை பெய்யும் என்று கூறப்பட்டுள்ளது.

போக்குவரத்து நெரிசலில் சிக்கி திணறும் திருவாரூர்

 கமலாலயக் குளக்கரை இடிந்து விழுந்ததால், அந்த வழியே போக்குவரத்துக்கு தடை விதிக்கப்பட்டுள்ளதால், நெரிசலில் சிக்கித் தவிக்கும் மக்களுக்கு தீர்வாக கிடப்பில் போடப்பட்டுள்ள சுற்றுவட்ட சாலை அமைக்கும் பணியை மீண்டும் தொடங்க வேண்டும் என்று வலியுறுத்தப்பட்டுள்ளது. திருவாரூர் தியாகராஜர் கோயில் கமலாலயக் குளக்கரையின் வடக்குப் பகுதியில் தொடர் மழை காரணமாக சுமார் 200 மீட்டர் தொலைவுக்கு 2012 அக்டோபரில் இடிந்து விழுந்தது.

சேதமான குளக்கரை சாலை திருவாரூர் நகருக்குள் வந்து செல்ல கனரக வாகனங்களை உள்ளிட்டவை பயன்படுத்தி வந்த சாலையாகும். பழைமையான கட்டடம் என்பதால் குளக்கரை ஓரத்தில் ஈரம் அதிகமாகி, கனரக வாகனங்கள் சென்றதால் மதில்சுவர் இடிந்து விழுந்தது. இதையடுத்து, குளத்தின் கிழக்கு, தெற்கு, மேற்குகரை பாதை போக்குவரத்து சாலையாக மாற்றப்பட்டு அதில், பேருந்து, லாரிகள் உள்ளிட்ட வாகனங்கள் இயக்கப்பட்டன. வடக்குக் கரை சாலை தடை செய்யப்பட்டதால், சற்று தொலைவில் உள்ள முதலியார் தெரு வழியாக இரு சக்கர மற்றும் நான்கு சக்கர வாகனங்கள் இயக்கப்பட்டு, தற்போது அச்சாலை குண்டும், குழியுமாக காட்சியளிக்கிறது. மயிலாடுதுறை, காரைக்காலிருந்து வரும் வாகனங்கள் வடக்குவீதி, கீழவீதி, பனகல் சாலை வழியாக இயக்கப்பட்டு வருகின்றன. 

திருவாரூர் நகரிலுள்ள சாலைகள் மிகவும் குறுகலாக உள்ளதால், நாள்தோறும் கடுமையான போக்குவரத்து நெரிசலை மக்கள் சந்தித்து வருகின்றனர். இதற்கிடையே, கமலாலயக் குளத்தின் மேற்குகரை 2014 அக். 25-ம் தேதி சுமார் 64 மீட்டர் தொலைவுக்கு இடிந்து விழுந்தது. குளக்கரைச் சுற்றுச் சுவர் மேலும் இடிந்து விழலாம் அல்லது பாதிப்புக்கு உள்ளாகலாம் என்று குளத்தின் நான்கு பகுதி சாலையும் முற்றிலுமாக தடுப்புக் கட்டைகள் அமைத்து போக்குவரத்துக்கு தடை செய்யப்பட்டுள்ளது. அந்த வழியாக இரு சக்கர வாகனங்கள் மட்டுமே செல்ல முடியும். போக்குவரத்து தடையால், கும்பகோணம் செல்லும் பேருந்துகள் அனைத்தும் நாகை - தஞ்சை சாலை வழியாகவும், மயிலாடுதுறையிலிருந்து வரும் வாகனங்கள் வடக்குவீதி, கீழவீதி வழியாக ராஜாஜி சாலை வழியாகவும் செல்கிறது. தற்போது பயன்பாட்டில் உள்ள நகரச் சாலைகள் அனைத்துமே மிகக் குறுகிய வணிக நிறுவனங்கள் உள்ள சாலை. எனவே, திருவாரூர் மக்கள் போக்குவரத்து நெரிசலில் சிக்கி தவித்து வருகின்றனர். இதற்கிடையில், பனகல் சாலை விரிவுப்படுத்தும் பணியைத் தொடர்ந்து அண்மையில் தார் சாலை போடும் தொடங்கியது. கீழ வீதியிலிருந்து பனகல் சாலையில் எஸ்பிஐ வங்கி வரை போடப்பட்டுள்ள தார் சாலை இப்போது மோசமாகிவிட்டது.

மீதம் போடவேண்டிய சாலைப் பணி நிறுத்திவைக்கப்பட்டுள்ளது. அச்சாலை முற்றிலும் சேதமடைந்து குண்டும் குழியுமாக உள்ளது. பனகல் சாலையில் அனைத்து வாகனங்களும் இயக்கப்படுகிறது. வாகனங்கள் செல்லும் போது புழுதிக் காற்று இரு சக்கர வாகன ஓட்டிகள் மற்றும் நடந்து செல்பவர்களுக்கு சிரமத்தை ஏற்படுத்தி வருகிறது. எனவே மாவட்ட நிர்வாகம் உடனடியாக பனகல் சாலையை சீரமைப்பதுடன், போக்குவரத்து நெரிசலில் சிக்கித் தவிக்கும் மக்களைக் காக்கும் வகையில் போர்க்கால அடிப்படையில் பல ஆண்டுகளாக கிடப்பில் போடப்பட்டுள்ள அரைவட்ட சுற்றுச் சாலையை அமைக்க துரித நடவடிக்கை மேற்கொள்ள வேண்டும்.

திருவாரூரில் குழந்தைகள் தின விழா

  திருவாரூர் கொடிக்கால்பாளையம் பள்ளியில் வெள்ளிக்கிழமை நடைபெற்ற குழந்தைகள் தின விழாவில் போட்டியில் வெற்றி பெற்ற மாணவிக்கு பரிசு வழங்கப்படுகிறது. திருவாரூர் கொடிக்கால் பாளையத்தில் செயல்பட்டு வரும் மத்லபுல் ஹைராத் நர்சரி மற்றும் பிரைமரி பள்ளியில் வெள்ளிக்கிழமை குழந்தைகள் தின விழா நடைபெற்றது. விழாவில், ஈரோடு தேசியக் கல்வி மேம்பாட்டு மையம் சார்பில் நடத்திய குழந்தைகள் தின இலக்கியப் போட்டிகளில் வென்றோருக்கு பரிசுகள் வழங்கப்பட்டது. பல்வேறு போட்டியில் பங்கேற்ற 146 மாணவர்களில் 20 மாணவர்கள் முதலிடம் பரிசு பெற்றதாக தேர்ந்தெடுக்கப்பட் டு பரிசுகள் வழங்கப்பட்டன. பள்ளிச் செயலர் ஹாஜி முஹமது ஆதம் தலைமையில் நடை பெற்ற விழாவில் பொருளர் எம். முகமது அப்துல்காதர் மற்றும் எம். ஹிதாயத்துல்லா உள்ளிட்டோர் பங்கேற்றனர்.

வக்ஃபு வாரிய சொத்துக்களை மீட்க சட்டத்திருத்தம்: தமிழ்நாடு வக்ஃபு வாரிய தலைவர் வலியுறுத்தல்

வக்ஃபு வாரிய சொத்துக்களை மீட்க சட்டத்திருத்தங்களை மத்திய அரசு கொண்டுவர வேண்டும் என்று தமிழ்நாடு வக்ஃபு வாரியத் தலைவர் தமிழ்மகன் உசேன் வலியுறுத்தினார்.
 ஈரோட்டில் அவர் செய்தியாளர்களுக்கு அளித்த பேட்டி:
 தமிழகத்தில் மத்திய வக்ஃபு வாரிய அதிகாரிகள் ஆய்வு செய்து வருகின்றனர். சென்னையில் சனிக்கிழமை ஆய்வு செய்த மத்திய அதிகாரிகள், இந்தியாவிலேயே தமிழகத்தில் தான் வக்ஃபு வாரியம் சிறப்பாக செயல்பட்டு வருவதாக பாராட்டியுள்ளனர்.
 ஆக்கிரமிக்கப்பட்டுள்ள, மீட்கப்பட்டுள்ள வக்ஃபு வாரிய சொத்துக்கள் குறித்த மத்திய அதிகாரிகளிடம் ஒப்படைக்கப்பட்டுள்ளது. வக்ஃபு வாரிய சொத்துக்களை மீட்பதில் இப்போது பல்வேறு நடைமுறை, சட்டச்சிக்கல்கள் உள்ளன. எனவே, வக்ஃபு வாரிய சொத்துக்களை எளிதாக மீட்கும் வகையில் மத்திய அரசு சட்டத்திருத்தம் கொண்டுவர வேண்டும் என வலியுறுத்தப்பட்டுள்ளது.
 வக்ஃபு வாரிய மேம்பாட்டு நிதிக்காக, ஜெயலலிதா ரூ.3 கோடி ஒதுக்கினார். அதைத்தொடர்ந்து மேம்பாடு நிதியை தனியாரிடம் திரட்டலாம் என அரசாணை பிறப்பித்துள்ளார். இந்த நிதி மூலம் ஏழை இஸ்லாமியர்களின் வாழ்கையை முன்னேற்ற உரிய நடவடிக்கை எடுக்கப்பட்டு வருகிறது.
 இஸ்லாமியர்களின் பாதுகாவலர் போல திமுக தலைவர் கருணாநிதி காட்டிக்கொள்வார். ஆனால், இஸ்லாமியர்கள் கோரிக்கை வைக்காமலே பல்வேறு திட்டங்களை ஜெயலலிதா அறிமுகப்படுத்தியுள்ளார். கருணாநிதியின் சூழ்ச்சியால் இஸ்லாமிய கட்சிகள், அமைப்புகள் சிதறி இப்போது 26 அமைப்புகளாக செயல்பட்டு வருகின்றன.
 காயிதேமில்லத்தின் மகன் மியாகானுக்கு சட்டப்பேரவையில் மேலவை உறுப்பினர் பதவி வழங்கியது எம்ஜிஆர் தான். காயிதேமில்லத் பேரன் தாவூத்மியாகானுக்கு பேரவைத் தேர்தலில் போட்டியிட ஜெயலலிதா வாய்ப்பு வழங்கினார்.
 இஸ்லாமியர்களுக்கு இடஒதுக்கீடு வழங்க அச்சாரம் போட்டது ஜெயலலிதா தான். கடந்த ஆண்டு ரமலான் நோன்புக்காக ரூ.3,500 மெட்ரிக் டன் அரிசியும், இந்த ஆண்டு ரூ.4,700 மெட்ரிக் டன் அரிசியும் வழங்கப்பட்டது. உலமாக்களுக்கு ஓய்வூதியம், விலையில்லா மிதிவண்டிகள் அறிவித்தது ஜெயலலிதா தான் என்றார்.
 பேட்டியின்போது வக்ஃபு வாரிய உறுப்பினர் எஸ்.ஏ.பாரூக் உடன் இருந்தார்.

நமதூர் மௌத் அறிவிப்பு 22/11/2014

  நமதூர் ஹாஸ் நகர்  மர்ஹூம் அட்வகேட் முஹம்மது யூசுப் அவர்களின் மருமகனும்,ஆட்டோ பாட்ஷா என்கிற முஸ்தபா கமால் அவர்களின் தகப்பனாருமாகிய MRC அப்துல் ரஷீது அவர்கள் தனது இல்லத்தில் மௌத்.அன்னாரின் ஜனாசா 22/11/2014 சனிக்கிழமை மாலை 5 மணிக்கு நமது முஹ்யித்தீன் ஆண்டவர்கள்  பள்ளிவாசல்
அடக்கஸ்தலத்தில் நல்லடக்கம் செய்யபடுகிறது.

கொட்டும் மழையில் விவசாயிகள் போர்; நாகை- தஞ்சை- திருவாரூர் முழு பந்த்

காவிரியின் குறுக்கே மேகதாது அணைகள் கர்நாடக அரசு கட்ட முயற்சித்து வருகிறது. இதனை கண்டித்து தஞ்சை , நாகை, திருவாரூர் மாவட்டங்களில் இன்று ( சனிக்கிழமை) பந்த் நடக்கிறது. இந்த பந்த் போராட்டத்திற்கு பல்வேறு அரசியல் கட்சியினர் ஆதரவு தெரிவித்துள்ளனர். 3 மாவட்டங்களிலும் மழை பெய்வதையும் பொருட்படுத்தாமல் விசாயிகள் போராட்டக்களத்தில் நிற்பதை பார்க்க முடிகிறது. போராட்டம் காரணமாக இந்த பகுதியில் அனைத்து கடைகளும் முழுமையாக அடைக்கப்பட்டுள்ளன. நகர் முழுவதும் கர்நாடக எதிர்ப்பு போஸ்டர் காண முடிகிறது. ஆங்காங்கே சாலை மற்றும் ரயில் மறியல் நடந்து வருகிறது. அரசு அலுவலகம் மட்டும் இயங்கி வருகிறது. திருவாரூர் மாவட்டத்தில் பந்த்துக்கு முழு ஆதரவு கிடைத்துள்ளது. திருவாரூர், திருத்துறைப்பூண்டி, மன்னார்குடி, நன்னிலம், நீடாமங்கலம், குடவாசல், வலங்கைமான் பகுதியில் அனைத்து கடைகளும் அடைக்கப்பட்டுள்ளன. தெருக்கள் வெறிச்சோடி கிடக்கிறது. தனியார் பஸ்கள் இயக்கப்படவில்லை. அரசு பஸ்கள் இயக்கப்படுகின்றன. 

ஜமாஅத் தேர்தல் புதிய வாக்களார்கள் பெயர் சேர்ப்பு

இன்ஷா அல்லாஹ் வரும் ஹிஜ்ரி 1436 ரபியுல் ஆகிர் பிறை 11 அன்று நமது முஹ்யித்தீன் ஆண்டவர்கள் பள்ளிவாசல் ஊர் உறவின் முறை ஜமாஅத்தின் புதிய நிர்வாகம் பொறுப்பு ஏற்க உள்ளதால் தேர்தல் நடைமுறைகள் துவக்கி உள்ளது. வரும் 05/12/2014 அன்று வரையிலும் புதிய வாக்களார் கள் பெயர் சேர்ப்பு ,நீக்கம் மற்றும் தெரு தொகுதி மாற்றம் ஆகிய நடைமுறைகளை நமது ஜமாஅத் அங்கத்தினர்கள் செய்து கொள்ளலாம் என அறிவிக்கப்பட்டு உள்ளது. மேலும் வாக்களார்கள் பட்டியல் தற்பொழுது பள்ளிவாசல் அறிவிப்புப்பலகையில் வைக்கப்பட்டுள்ளது.

நமதூர் மௌத் அறிவிப்பு 21/11/2014

  நமதூர் மேலத்தெரு மர்ஹூம் முஹம்மது இஸ்மாயில்  அவர்களின் தம்பியும்,ஜியாவுதீன் , சர்புதீன் இவர்களின் தகப்பனார் முஹம்மது சாலிஹ் அவர்கள் திருவாரூர்- புதுத்தெரு (மயிலாடுதுறை சாலை) தனது இல்லத்தில் மௌத்.அன்னாரின் ஜனாசா 21/11/2014 வெள்ளிமாலை 5 மணிக்கு மேலத்தெரு ஜாமியுல் மஸ்ஜித் அடக்கஸ்தலத்தில் நல்லடக்கம் செய்யபடுகிறது.

புதிய காற்றழுத்த தாழ்வு நிலை: தென் மாவட்டங்களில் கனமழை வாய்ப்பு

இந்தியப் பெருங்கடலில் புதிதாக காற்றழுத்த தாழ்வு நிலை உருவாகியுள்ளது. இதனால், தென் மாவட்டங்களில் கன மழை பெய்யும் என்று சென்னை வானிலை ஆய்வு மையம் தெரிவித்துள்ளது.

இது குறித்து வானிலை ஆய்வு மைய இயக்குநர் எஸ்.ஆர்.ரமணன் கூறியதாவது:

இந்திய பெருங்கடலில் நடுநிலைக்கோட்டு பகுதியில் புதிதாக காற்றழுத்த தாழ்வு நிலை உருவாகியுள்ளது. அடுத்த 24 மணி நேரத்தில் இது மேற்கு நோக்கி நகரும். இதனால் தென் மாவட்டங்களிலும் கடலோர மாவட்டங்களிலும் கன மழை பெய்ய வாய்ப்புண்டு. இது மேலும், மேற்கு திசையில் நகர்ந்தால், தமிழகத்தின் பிற பகுதிகளிலும் மழை பெய்யும்.

இவ்வாறு அவர் கூறினார்.

தமிழகத்தில் நேற்று ராமநாதபுரம் மாவட்டம் பாம்பனில் 10 செ.மீ., தஞ்சாவூர் மாவட்டம் மடுக்கூர், ராமநாதபுரம் மாவட்டம் ராமேஸ்வரம் ஆகிய இடங்களில் 7 செ.மீ., நாகப்பட்டினம் மாவட்டம் ஆனைக்காரன்சத்திரம், ராமநாதபுரம் மாவட்டம் கமுதி ஆகிய இடங்களில் 6 செ.மீ., நாகப்பட்டினம் மாவட்டம் சீர்காழி, வேதாரண்யம், திருவாரூர் மாவட்டம் திருத்துறைப்பூண்டி, கொடவாசல், புதுக்கோட்டை மாவட்டம் ஆலங்குடி, கடலூர் மாவட்டம் சிதம்பரம், தஞ்சாவூர் மாவட்டம் பட்டுக்கோட்டை, ஒரத்தநாடு ஆகிய இடங்களில் தலா 5 செ.மீ. மழை பெய்துள்ளது. காரைக்கால், தூத்துக்குடி, நாமக்கல், சிவகங்கை ஆகிய மாவட்டங்களிலும் பரவலாக மழை பெய்துள்ளது.

கிசான் விகாஸ் பத்திர விற்பனை சென்னையில் மீண்டும் தொடக்கம்

மத்திய பாஜக அரசின் நிதிநிலை அறிக்கையில் கிசான் விகாஸ் பத்திரம் மீண்டும் விற்கப்படும் என்று தெரிவிக்கப்பட்டிருந்தது. இதைத் தொடர்ந்து கிசான் விகாஸ் பத்திரத்தை மத்திய நிதியமைச்சர் அருண் ஜெட்லி கடந்த செவ்வாய்கிழமை வெளியிட்டார். இதைத் தொடர்ந்து சென்னை அண்ணா சாலையில் உள்ள தலைமை அஞ்சல் அலுவலகத்தில் கிஸான் விகாஸ் பத்திர விற்பனை நேற்று தொடங்கிவைக்கப்பட்டது.

தொடக்கவிழா நிகழ்ச்சியில் சென்னை மாநகர மண்டல அஞ்சல் துறை தலைவர் மெர்வின் அலெக்சாண்டர் கலந்துகொண்டு முதல் பத்திரத்தை வெளியிட்டார். இதன் பிறகு அவர் நிருபர்களிடம் கூறியதாவது:

சென்னையில் மீண்டும் கிசான் விகாஸ் பத்திர விற்பனை தொடங் கப்பட்டுள்ளது. இந்தியாவில் சேமிப்பு நிதியின் அளவை உயர்த்துவதற்காகவும், பொது மக்களிடையே சேமிக்கும் பழக் கத்தை ஊக்குவிக்கவும் இத்திட்டம் மீண்டும் கொண்டுவரப்பட்டுள்ளது.

இந்த திட்டத்தில் நீங்கள் சேமிக் கும் தொகை 100 மாதங்களுக்கு பிறகு ( 8 ஆண்டு, 4 மாதங்கள்) இரட்டிப்பாகும். தற்போது அஞ்சல் துறையில் கோர் பேங்கிங் சிஸ்டம் கொண்டுவரப்பட்டுள்ளதால், பத்திரம் முதிர்ச்சி அடையும்போது, இந்தியாவின் எந்த பகுதியில் உள்ள அஞ்சலகத்திலும் அதைப் பணமாக மாற்றிக்கொள்ளலாம்.

30 மாதங்களுக்கு பிறகு பணத்தை பெற்றுக்கொள்ளும் வாய்ப்பும் இத்திட்டத்தில் உள்ளது. இப்பத்திரத்தை கொண்டு வங்கிகளில் கடனும் பெற்றுக் கொள்ளலாம். இது பாமர மக்களுக்கான திட்டம் என்பதால் இத்திட்டத்தின் கீழ் பணம் சேமித்தால் வருமான வரி விலக்கு கிடைக்காது.

இவ்வாறு அவர் கூறினார்.

  

தூக்குத் தண்டனையிலிருந்து மீனவர்கள் விடுதலை

: மத்திய, மாநில, இலங்கை அரசிற்கு மீனவ குடும்பங்கள் நன்றி

விடுதலை செய்யப்பட்ட மீனவர்களுடன் இலங்கைக்கான இந்தியத் தூதர் ஒய்.கே.சின்ஹா.

கொழும்புவில் உள்ள இந்திய தூதரகத்தில் விடுதலை செய்யப்பட்ட தமிழக மீனவர்கள் ஐந்து பேர்.

தமிழக மீனவர்கள் 5 பேரின் தூக்கு தண்டனை ரத்து செய்ய ஒத்துழைத்த அனைத்து அரசியல் கட்சிகளுக்கும் மத்திய, மாநில, இலங்கை அரசிற்கும் மீனவ குடும்பத்தினர் நன்றி தெரிவித்துக் கொண்டனர்.

போதை மருந்து கடத்திய குற்றச்சாட்டின் பேரில் இலங்கையில் மரண தண்டனை விதிக்கப்பட்ட தமிழக மீனவர்கள் ஐந்து பேரும் சிறையில் இருந்து விடுதலை செய்யப்பட்டு கொழும்பில் உள்ள இந்திய தூதரக அதிகாரிகளிடம் ஒப்படைக்கப்பட்ட தகவல் புதன்கிழமை ஊடகங்களில் வெளியானதும் ராமேசுவரம் மீனவர்கள் குடும்பத்தினர் பட்டாசு வெடித்தும் இனிப்புகள் வழங்கியும் கொண்டாடினர்.

மீனவர்கள் விடுதலை குறித்து மீனவர்களின் குடும்பத்தின் சார்பில் மீனவ மகளிர் கூட்டமைப்பின் தலைவி இருதயமேரி கூறியதாவது,

தாய் நாட்டிற்காக போருக்கு தன் மகனை தாயார் அர்ப்பணிப்பு உணர்வுடன் அனுப்பி வைப்பாள். அது போலவே கடலுக்குச் சென்ற மகனும், போருக்குச் சென்ற மகனும் திரும்பி வருவானா என்றே தெரியாது. மீனவ தாய்மார்கள் இவ்வாறே ஒவ்வொரு நாளும் தங்கள் குழந்தைகளை கடலுக்கு அனுப்பி வைக்கிறோம். இன்று எங்கள் மீனவர்கள் நிரபராதிகளாக உணரப்பட்டு தங்கள் தாயகத்திற்கு வந்து கொண்டிருக்கிறார்கள்.

பிரதமர் மோடி இலங்கை அதிபருக்கு அப்பாவி மீனவர்களை பற்றி எடுத்துரைத்து மீனவர்களை விடுதலை செய்ய வைத்திருக்கிறார். பிரதமர் நரேந்திர மோடி, இலங்கை அதிபர் ராஜபச்ச, தமிழக முதல்வர் ஓ. பன்னீர் செல்வம், எங்கள் சட்டமன்ற, நாடாளுமன்ற உறுப்பினர்கள் மற்றும் மீனவர்களின் போராட்டங்களுக்கு உறுதுணையாக இருந்த அனைவருக்கும் நன்றியும், கடமைப் பட்டிருக்கிறோம், என தெரிவித்தார்.

மேலும் விடுதலை செய்யப்பட்ட ஐந்து மீனவர்களின் எதிர்கால வாழ்வாதாரத்தை கணக்கில் எடுத்துக் கொண்டு அரசு ஆழ் கடல் மீன் பிடித்தல் படகும் அதற்கான பயிற்சியும் அளிக்க உடனடியாக நடவடிக்கை எடுக்க வேண்டுமென மத்திய, மாநில அரசுகளுக்கு மீனவப் பிரநிதிகள் கோரிக்கை விடுத்துள்ளனர்.

விடுதலை செய்யப்பட்ட 5 மீனவர்கள் கொழும்பில் இருந்து திருச்சி விமான நிலையத்திற்கு வியாழக்கிழமை மதியம் வருவார்கள் என எதிர்பார்க்கப்படுகிறது

கருப்புப் பணத்தைக் குறைக்க உதவும் ஏ.டி.எம். பரிவர்த்தனை

ஒரு வங்கியில் கணக்கு வைத்திருப்பவர், அதே வங்கியின் ஏ.டி.எம்-ல் ஒரு மாதத்தில் 5 முறையும், பெருநகரங்களில் இருந்தால் வேறு வங்கிகளின் ஏ.டி.எம்-ல் 3 முறையும் மற்ற இடங்களில் 5 முறையும் இலவசமாக வர்த்தகம் செய்யலாம் என மத்திய ரிசர்வ் வங்கி தெரிவித்துள்ளது. இதற்கு மேல் ஏ.டி.எம். பயன்படுத்தும்போதெல்லாம் வங்கிகள் அதற்கான கட்டணத்தை வாடிக்கையாளர்களிடம் வசூலிக்கலாம். சில வங்கிகள் இதற்கு மேலும் இலவச ஏ.டி.எம். பயன்பாட்டை அனுமதிக்கலாம் என்று மத்திய ரிசர்வ் வங்கி கூறியுள்ளது. ஏ.டி.எம். பயன்பாட்டுக்குக் கட்டணம் வசூலிப்பது சரியா?

2007-ல் இந்தியாவில் மொத்தமே 27,000 ஏ.டி.எம்-கள் இருந்தன. ஆனால் இன்று 1.7 லட்சம் ஏ.டி.எம்-கள் உள்ளன. ஏ.டி.எம். பயன்பாடு அதிகரிக்கும்போது, வாடிக்கையாளர்கள் வங்கியின் அலுவலகத்துக்கு வருவது குறைந்து, வங்கியில் வியாபாரச் செலவும் குறையும். அதே நேரத்தில், வாடிக்கையாளரின் இருப்பிடத்துக்கு அருகில் ஏ.டி.எம். வசதியை வழங்குவதிலும் செலவுகள் உண்டு. ஒரு வாடிக்கையாளர் வங்கியில் காசோலை மூலம் ஒரு முறை பரிவர்த்தனை செய்தால் வங்கிக்கு ஆகும் செலவு ரூ. 50 என்றால், அதே வேலையை ஏ.டி.எம்-ல் செய்யும்போது செலவு ரூ. 15-தான் ஆகிறது.

பரிவர்த்தனையில், கடனைத் திருப்பிக் கொடுப்பது போன்றவற்றுக்குக் காசோலையைப் பயன்படுத்த முடியும் என்பதுதான் சேமிப்புக் கணக்கை ஆரம்பிப்பதற்கு மிகப் பெரிய தூண்டுதல். இதில் ஒரு மாதத்தில் எத்தனை காசோலை பயன்படுத்தலாம் என்பதிலும் கட்டுப்பாடு உண்டு. காசோலை பயன்படுத்தும் முறையில் அதிக செலவாவதும், அதனை வங்கியே ஏற்பதும் நமக்குத் தெரியும். இதில் எல்லாரும் காசோலையை மட்டுமே பயன்படுத்தினால், வங்கியின் செலவுகள் அதிகமாகி, சிறுசேமிப்பு மீது வங்கி அளிக்கும் வட்டி விகிதம் குறையும் என்பதை நினைவில் கொள்ள வேண்டும். எனவே, காசோலையைவிட ஏ.டி.எம். பண அட்டையின் (டெபிட் கார்டு) பயன்பாட்டை உயர்த்துவது வங்கிக்கும் வாடிக்கையாளருக்கும் லாபம்தான்.

கிராமத்திலும் நகரத்திலும்

நடப்பு மற்றும் சேமிப்புக் கணக்குகளில் வாடிக்கை யாளர்கள் அதிக அளவு பணம் வைத்திருந்து, தேவைப்படும்போது போதுமான தொகையை ஏ.டி.எம். மூலம் பெறுவதால், இந்தக் கட்டணத்தைக் குறைக்க முடியும். எல்லா இடங்களிலும் ஏ.டி.எம்-ன் பயன்பாடு ஒரே அளவில் இருக்குமா? சிறு நகரங்களில், ஊர்ப்புறங்களில் சில நூறு வங்கி வாடிக்கையாளர்களுக்கு ஒரு ஏ.டி.எம். வைக்கும்போது சராசரியாக ஒரு ஏ.டி.எம்-மைப் பயன்படுத்துவோர் எண்ணிக்கை குறைவாக இருக்கும், அதனால் செலவும் அதிகமாகும். பெருநகரங்களில் ஏ.டி.எம். பயன்பாடு அதிகமாகி, செலவு குறைவாக இருக்கும். இவ்வாறு ஏற்படும் செலவுகளைச் சமன்படுத்தி, எல்லா வாடிக்கையாளர்களிடமும் ஒரே அளவு கட்டணம் வசூலிக்கப்படுகிறது.

வங்கிகள் நமக்குத் தரும் பண அட்டை, கடன் அட்டை (கிரெடிட் கார்டு) போன்றவற்றைப் பயன்படுத்திக் கடைகளில், இணையதளங்களில் பணம் செலுத்துகிறோம். இதற்காகக் கடைகளில் உள்ள சிறு இயந்திரத்தில் நமது அட்டையை உரசிப் பணம் எடுக்கும் முறையைப் பார்த்திருப்பீர்கள். இதற்கு பாய்ன்ட் ஆஃப் சேல் (PoS) இயந்திரம் என்று பெயர். இதில் 1,000 ரூபாய் பரிவர்த்தனைக்கு 15-லிருந்து 20 ரூபாய் வரை செலவாகும். பெரும்பாலும் இதனை வியாபாரி ஏற்றுக்கொள்வார்; அல்லது சில வியாபாரிகள் நம்மிடமிருந்து வசூலிப்பார்கள். இணையதள வங்கிச் சேவைக்கு 10 ரூபாய் வரை செலவாகும். இவ்வாறு காசோலை இல்லாத மற்ற எல்லா வகைப் பணமாற்றத்துக்கும் குறைவாகவே செலவாகும் என்பதால், இவற்றை வங்கிகளும் ரிசர்வ் வங்கியும் ஊக்குவிக்கின்றன.

நாமும் இந்த வகை பணப் பரிவர்த்தனையை அதிகமாகப் பயன்படுத்தும்போதுதான் அதற்கான செலவுகள் குறையும். வங்கிகள் மூலம் பணம் செலுத்துவதால் நமது செலவுகளெல்லாம் கணக்கில் வரும் என்பதால், வியாபாரிகளும் நுகர்வோரும் வியாபாரத்தின்போது வரி ஏய்ப்புக்காக பண அட்டையைத் தவிர்த்துவிட்டு ரொக்கத்தைப் பயன்படுத்துவார்கள். எனவே, கருப்புப் பணத்தைக் குறைக்கவும் பண அட்டை மூலமாக நடை பெறும் பணமாற்றம் உதவும்.

ஆசிரியர்களுக்குப் பயிற்சி அளிக்கும் மாணவர்கள்

கையெழுத்து பயிற்சி அளிக்கும் பிரசாந்த்குமார்.

கேலிகிராபி பேனா மற்றும் ‘நிப்’கள்

அழகிய கையெழுத்து என்பது அனைவருக்கும் அமைவதில்லை. கற்றுக்கொள்ளும் ஆர்வத்துடன்கூடிய முறையான பயிற்சி இருந்தாலே போதும் அழகாய் எழுதுவது எல்லோருக்கும் சாத்தியம் என்கிறார், திருச்சி பிஷப் ஹீபர் கல்லூரியில் ‘கேலிகிராபி’ கையெழுத்துப் பயிற்சி அளிக்கும் பிரசாந்த்குமார்.

பி.காம்., படிக்க வந்த பிரசாந்துக்குக் கல்லூரியில் ‘கேலிகிராபி’ கையெழுத்துப் பயிற்சியாளராக இருந்த பிலிப் மோசக் என்பவர் மூலம் அழகாக எழுதுவது எப்படி என்பது கைவரப்பெற்றுள்ளது. தொடர்ந்து அவருடைய பயிற்சி வகுப்புக்குச் சென்றவர், ஒரு கட்டத்தில் சீக்கிரமே அழகாக எழுதக் கற்றுக்கொண்டதைப் பார்த்த பிலிப் மோசக், பிரசாந்த்தை தனக்கு உதவியாகப் பகுதி நேரமாக மற்றவர்களுக்கும் பயிற்சி அளிக்கக் கல்லூரி நிர்வாகம் மூலம் ஏற்பாடு செய்துள்ளார்.

ஆசிரியர்களுக்கும்

அப்போது பிரசாந்துக்குக் கல்லூரியில் காலையில் பாடம் எடுக்கும் விரிவுரையாளர்கள் சிலர் மதியத்துக்கு மேல் இவரிடம் கையெழுத்துப் பயிற்சிக்கு வருவார்களாம். எம்.காம். முடித்த கையோடு அதே கல்லூரியில் முழுநேரமாக ‘கேலிகிராபி’ பயிற்சியாளராக வேலைக்குச் சேர்ந்த பிரசாந்த், கல்லூரியில் படிக்கும் மாணவர்கள் மற்றும் விரிவுரையாளர், பேராசிரியர்களும் மட்டுமின்றி, வெளியிலிருந்து ஆர்வத்துடன் வரும் பள்ளி மாணவர்கள், ஆசிரியர்களுக்கும் கற்றுத்தருகிறார்.

இதில் பெரும்பாலும் அரசுப் பள்ளி ஆசிரியர்கள் ஆர்வத்துடன் பயிற்சி பெற்று, தாங்கள் பணிபுரியும் பள்ளிகளில், அழகாக எழுதுவது எப்படி என்பது குறித்து மாணவர்களுக்குப் பகுதிநேர வகுப்பு எடுப்பதைப் பெருமையாகக் குறிப்பிடுகிறார்.

பிஷப் ஹீபர் கல்லூரியில் ‘கேலிகிராபி’ கையெழுத்துப் பயிற்சி ஒரு நாளைக்கு நான்கு வகுப்புகளாக நடத்தப்படுகிறது. ஒரு வகுப்புக்கு ஒன்றேகால் மணி நேரம் எனக் கணக்கிட்டுப் பயிற்சி அளிக்கின்றனர். 250 பேர் வரை பயிற்சிக்கு வருவதால் பிரசாந்த் தவிர தற்போது கல்லூரியில் படிக்கும் மாணவர்கள் நான்கு பேர் கல்லூரி முடிந்த பின்னர் பகுதிநேரமாக, மாணவர்கள், ஆசிரியர்கள் என அனைத்துத் தரப்பினருக்கும் பயிற்சி அளிக்கின்றனர்.

ஊக்கத்தொகை

இவர்கள் ஏற்கனவே பிரசாந்த்திடம் கையெழுத்துப் பயிற்சி முடித்துச் சான்றிதழ் பெற்றவர்கள் என்பது குறிப்பிடத்தக்கது. பகுதி நேரமாகப் பயிற்சி அளிக்கும் இந்த நான்கு மாணவர்களுக்கும் கல்லூரி நிர்வாகம் ஊக்கத்தொகை வழங்குகிறது. மேலும் இங்குக் கையெழுத்து பயிற்சி முடித்துச் சென்ற சில மாணவர்கள் திருச்சியில் ஜமால் முகமது மற்றும் காவேரி கல்லூரிகளில் ‘கேலிகிராபி’ பயிற்சி எடுக்கின்றனர். பலர் தனியாகப் பயிற்சி மையங்கள் நடத்தியும், வீட்டிலேயே ஆர்வத்துடன் வருபவர்களுக்குப் பயிற்சி அளித்தும் வருமானம் ஈட்டுகின்றனர்.

இதற்கெனப் பிரத்யேகமான ‘கேலிகிராபி’ பேனா மூலம் பயிற்சி அளிப்பதாகக் கூறும் பிரசாந்த், எட்டு வகையான எழுத்து வடிவங்களை எழுதப் பயிற்சி அளிப்பதாகவும், இதில் கேஷுவல் ரைட்டிங் மற்றும் இட்டாலிக் ரைட்டிங் ஆகிய இரண்டுக்கு மட்டும் பயிற்சி அளிக்க 25 நாட்கள் ஆகிவிடும் என்கிறார்.

கேலி தந்த வேலை

இவை மட்டுமன்றிப் பயிற்சிக்கு வருபவர்கள் கட்டாயம் வீட்டில் தொடர்ந்து இரண்டு மணி நேரம் எழுத்துப் பயிற்சி எடுக்க வேண்டுமாம். கல்லூரி ஆரம்ப நாட்களில் நான் கிறுக்கலாக எழுதுவதைக் கேலி செய்தவர்கள் மத்தியில், அழகாக எழுத வேண்டும் என்று மனதில் துளிர்விட்ட ஆர்வமே எனக்கு வேலைவாய்ப்பையும் மற்றவர்களுக்குக் கற்றுக்கொடுக்கும் வாய்ப்பையும் உருவாக்கித் தந்துள்ளது என்று பெருமிதம் பொங்கக் கூறுகிறார் பிரசாந்த்.

டெல்டா மாவட்டங்களில் 22-ல் கடையடைப்பு: அனைத்து கட்சிகளின் ஆதரவு கோர விவசாயிகள் சங்கங்கள் முடிவு

காவிரியின் குறுக்கே கர்நாடக அரசு புதிய அணைகள் கட்டுவதை கண்டித்து 22-ம் தேதி தஞ்சாவூர், திருவாரூர், நாகப்பட்டினம் மாவட்டங்களில் ஒரு நாள் கடையடைப்பு, ரயில் மறியல் போராட்டம் நடத்த விவசாயிகள் சங்கம் முடிவெடுத்துள்ளது. இதுதொடர்பாக அனைத்து கட்சிகளின் ஆதரவு கோர விவசாயிகள் முடிவு செய்துள்ளனர்.

திருவாரூர் மாவட்ட அனைத்து விவசாயிகள் சங்க ஒருங்கிணைப்புக் குழு தலைவர் பி.ஆர்.பாண்டியன் சென்னையில் நேற்று நிருபர்களிடம் கூறியதாவது:

காவிரி நீர் விவகாரத்தில் அரை நூற்றாண்டு காலமாக தமிழகம் தொடர்ந்து வஞ்சிக்கப்பட்டு வருகிறது. நீதிமன்ற தீர்ப்புப்படி தமிழகத்துக்கு கர்நாடக அரசு தண்ணீரைத் திறந்து விடுவதில்லை. காவிரி நீர் பங்கீட்டு ஒழுங்காற்றுக் குழு இன்னும் அமைக்கப்படவில்லை. இந்நிலையில், காவிரி டெல்டா பகுதியை வஞ்சிக்கும் வகையில் மேகதாதுவில் காவிரியின் குறுக்கே அணைகளைக் கட்ட கர்நாடக அரசு முயற்சித்து வருகிறது.

இந்த அணைகளைக் கட்டினால் காவிரியை நம்பியுள்ள 13 டெல்டா மாவட்டங்கள் பாதிக்கப்படும். குறிப்பாக தஞ்சை, திருவாரூர், நாகப்பட்டினம் ஆகிய 3 மாவட்டங்களில் உள்ள 14 லட்சம் ஏக்கர் பயிர்சாகுபடி கடுமையாக பாதிக்கப்படும். அத்துடன் குடிநீர் வளமும் பாதிக்கப்படும். எனவே, இது விவசாயிகள் பிரச்சினை மட்டுமல்ல. மக்களின் வாழ்வாதாரப் பிரச்சினை என்பதை புரிந்துகொள்ள வேண்டும்.

எனவே, புதிய அணைகள் கட்டும் முடிவை கர்நாடக அரசு கைவிட வேண்டும் என்று கோரி 22-ம் தேதி தஞ்சாவூர், திருவாரூர், நாகப்பட்டினம் மாவட்டங்களில் ஒருநாள் முழு அடைப்பு மற்றும் ரயில் மறியல் போராட்டங்கள் நடத்தப்படவுள்ளது. எங்கள் கோரிக்கை தொடர்பாக பிரதமரை நேரில் சந்திக்க மத்திய அமைச்சர் பொன்.ராதாகிருஷ்ணனிடம் கடிதமும் கொடுத்துள்ளோம். மேலும், தமிழக முதல்வரை நேரில் சந்திக்கவும் முடிவு செய்துள்ளோம்.

கருணாநிதியுடன் சந்திப்பு

இன்று (நேற்று) காலையில் திமுக தலைவர் கருணாநிதி, பொருளாளர் மு.க.ஸ்டாலின், ஆகியோரை நேரில் சந்தித்து போராட்டத்துக்கு ஆதரவு தருமாறு வலியுறுத்தியுள்ளோம். எங்கள் போராட்டத்துக்கு பல்வேறு கட்சிகள் ஆதரவு தெரிவித்துள்ளன.

இவ்வாறு அவர் கூறினார்.

  

பிளஸ் 1 தேர்ச்சி மதிப்பெண் நிர்ணயத்தில் பள்ளிகளுக்கிடையே அதிக முரண்பாடு

• எழுத்தின் அளவு:
 
 
 

அரசு பள்ளிகளில், பாடத்திற்கு 10 மதிப்பெண் வீதம் வாங்கினால், பிளஸ் 1 பாஸ் எனும் நிலையில், அரசு உதவிபெறும் பள்ளிகளில், 40 முதல் 60 மதிப்பெண் வரை நிர்ணயிக்கப்பட்டுள்ளது.

பிளஸ் 1 வகுப்பில், பொதுவாக மாணவர்களை, அதிகளவில் தோல்வி அடைய செய்வதில்லை. வருகைப் பதிவேடு மற்றும் பாடங்களில், ஓரளவிற்கு மதிப்பெண் பெற்றிருந்தால், பாஸ் போட்டு விடுகின்றனர். இந்த நிலை, அரசு பள்ளிகளிலும், மெட்ரிக் பள்ளிகளிலும் மட்டுமே காணப்படுகின்றன. அரசு உதவிபெறும் பள்ளிகளில், பாடத்திற்கு 40; 50; 60 மதிப்பெண் என நிர்ணயித்து, மாணவர்களை, அதிகளவில், தோல்வி அடையச் செய்கின்றனர் என்ற அதிர்ச்சித் தகவல், தகவல் அறியும் உரிமை சட்டத்தின் மூலம், அம்பலத்திற்கு வந்துள்ளது.

பிளஸ் 1 வகுப்பில், மாணவர் தேர்ச்சிக்கான மதிப்பெண்ணை, அனைத்து பள்ளிகளுக்கும் பொருந்தும் வகையில், பள்ளி கல்வித்துறை, எந்த அளவுகோலையும் நிர்ணயிக்கவில்லை. மாறாக, அந்தந்த பள்ளி ஆசிரியர் குழுவே, தேர்ச்சிக்கான மதிப்பெண்ணை நிர்ணயிக்கிறது. அரசு உதவிபெறும் பள்ளிகள், பிளஸ் 2 தேர்வில், 100 சதவீத தேர்ச்சியில் குறை வந்துவிடக்கூடாது என்பதற்காக, சுமாராக படிக்கக்கூடிய மாணவர்களை, பிளஸ் 1 வகுப்பிலேயே வடிகட்டுவது, தற்போது தெரிய வந்துள்ளது.

சென்னையைச் சேர்ந்த வழக்கறிஞர், முத்தரசன், தகவல் அறியும் உரிமை சட்டத்தின் மூலம், அரசு மற்றும் உதவிபெறும் பள்ளிகளின் வெவ்வேறு வகையான மதிப்பெண் நிலவரத்தை அறிந்துள்ளார்.

அவர் கூறியதாவது: சென்னை, ஷெனாய் நகரில் உள்ள சென்னை பெண்கள் மேல்நிலைப் பள்ளியில், 2012 13ம் கல்வி ஆண்டில், பிளஸ் 1 தேர்ச்சிக்கு, ஆங்கிலம், இயற்பியல் உள்ளிட்ட சில பாடங்களுக்கு, தலா 10 மதிப்பெண் நிர்ணயித்துள்ளனர். கணிதம், வணிகவியல் போன்ற பாடங்களுக்கு, 15 மதிப்பெண் என நிர்ணயித்துள்ளனர். ராயப்பேட்டையில் உள்ள, வெஸ்லி மேல்நிலைப் பள்ளியில், தலா 40 மதிப்பெண் என்றும், வில்லிவாக்கம், சிங்காரம்பிள்ளை மேல்நிலைப் பள்ளியில், தலா, 60 மதிப்பெண் என்றும் நிர்ணயித்துள்ளனர்.

அரசு பள்ளிகளில், 10 மதிப்பெண் முதல் 15 மதிப்பெண் வரைதான் உள்ளது. உதவிபெறும் பள்ளிகளில் மட்டும், 40 மதிப்பெண், 60 மதிப்பெண் என நிர்ணயிப்பது, எந்த வகையில் நியாயம். உதவிபெறும் பள்ளிகளில், மாணவர்களை, அதிகளவில் பெயில் ஆக்குகின்றனர். கல்வித்துறை, அனைத்து வகை பள்ளிகளுக்கும், ஒரே வகை மதிப்பெண்ணை, தேர்ச்சிக்கு நிர்ணயம் செய்ய வேண்டும். இவ்வாறு, முத்தரசன் கூறினார்.

கல்வித்துறை வட்டாரம் கூறுகையில், "இந்த பிரச்னை, செயலரின் கவனத்திற்கு கொண்டு சென்று, விரைவில் சரி செய்யப்படும். அனைத்து வகை பள்ளிகளுக்கும், பிளஸ் 1 தேர்ச்சிக்கு, சரிசமமான மதிப்பெண் நிர்ணயம் செய்யப்படும் என தெரிவித்தது.

நமதூர் மௌத் அறிவிப்பு 13/11/2014

நமதூர் நரியம் வீட்டு AMS முஹம்மது ஷாஜகான் அவர்களின் தகப்பனார் அப்துல் வாஹித் அவர்கள் வடக்கு தெரு தனது இல்லத்தில் மௌத் . அன்னாரின் ஜனாசா 13/11/2014 வியாழன் மாலை 4:45 மணிக்கு நமது முஹ்யித்தீன் ஆண்டவர்கள் பள்ளிவாசல் அடக்கஸ்தலத்தில் நல்லடக்கம் செய்யப்படுகிறது .

நமதூர் மௌத் அறிவிப்பு 12/11/2014

  நமதூர் மில்லுக்கார வீட்டு முஹம்மது கஜ்ஜாலி அவர்களின் தகப்பனார் குலாம் ரசூல் அவர்கள் மேலத்தெருவில் தனது இல்லத்தில் மௌத்.அன்னாரின் ஜனாசா 13/11/2014 வியாழன் காலை 10 மணிக்கு மேலத்தெரு ஜாமியுல் மஸ்ஜித் அடக்கஸ்தலத்தில் நல்லடக்கம் செய்யபடுகிறது.

என்ஐடி.,யில் ஆராய்ச்சி படிப்புக்கு விண்ணப்பங்கள் வரவேற்பு

• 

கொல்கத்தாவில் உள்ள நேஷனல் இன்ஸ்டிடியூட் ஆப் டெக்னாலஜியில் ஆராய்ச்சி படிப்புக்கு சேர்க்கை அறிவிப்பு வெளியிட்டுள்ளது.

படிப்பின் பெயர்; ஆராய்ச்சியில் (ஆக்கிடெக்சர், மெக்கானிக்கல், எலக்ட்ரானிக்ஸ் அண்ட் கம்யூனினேஷன், எலக்ட்ரிக்கல், கம்ப்யூட்டர் சயின்ஸ் அண்ட் இன்ஜினியரிங்)

அடிப்படைக் கல்வித்தகுதி: சம்பந்தப்பட்ட பிரிவில் எம்.டெக் முடித்திருக்க வேண்டியது அவசியம்.

தேர்வு முறை: எழுத்துத்தேர்வு மற்றும் நேர்முகத்தேர்வு மூலம் மாணவர்கள் தேர்வு செய்யப்படுவர்.

விண்ணப்பக் கட்டணம்: பொதுப்பிரிவு மற்றும் பிற்படுத்தப்பட்டோர் பிரிவினருக்கு ரூ.600. தாழ்த்தப்பட்டோர் மற்றும் பழங்குடியினருக்கு ரூ.300.

நவ.,17 விண்ணப்பிக்க கடைசி நாளாகும். கூடுதல் விவரங்களுக்கு www.dss.nitc.ac.in  என்ற இணையதளத்தை பார்க்கலாம்.

புது பாஸ்போர்ட்டுக்கு ஆதார் அவசியம்: மத்திய வௌியுறவுத்துறை முடிவு

புதிய பாஸ்போர்ட்டுகள் வழங்க, ஆதார் அட்டையை அடையாளமாக பயன்படுத்த மத்திய அரசின் வௌியுறவுத்துறை முடிவு செய்துள்ளது. இதன் மூலம், புதிய பாஸ்போர்ட் எடுக்க விரும்புபவர்களுக்கு ஆதார் கட்டாயமாகிறது.
தற்போதைய நடைமுறையின்படி, புதிய பாஸ்போர்ட் பெற குடும்ப அட்டை, இருப்பிட சான்றிதழ், போலீஸ் வெரிபிகேஷன் ஆகியவை அவசியமாக உள்ளது. இந்த நடைமுறையின் கீழ், விண்ணப்பதாரர்கள் பாஸ்போர்ட்டை பெற கால தாமதமாவதாகவும், குறிப்பாக, போலீஸ் வெரிபிகேஷனுக்காக விண்ணப்பதாரர்கள் பல நாட்கள் காத்துக் கிடக்க வேண்டியுள்ளது என்றும் புகார் எழுந்துள்ளது. இதையடுத்து, பாஸ்போர்ட் மற்றும் விசா வழங்கும் நடைமுறையில் சில மாற்றங்களை ஏற்படுத்த மத்திய அரசு முடிவு செய்துள்ளது. 

ஆதார் அட்டை அவசியம்:

புதிய பாஸ்போர்ட் வழங்குவதற்கு ஆதார் அட்டையை கட்டாயமாக்க முடிவு செய்யப்பட்டுள்ளது. அரசின் எந்த ஒரு சலுகை அல்லது சேவையை பெறவோ, ஆதார் அட்டையை கட்டாயமாக்க கூடாது என்று சுப்ரீம் கோர்ட் கூறி உள்ள நிலையிலும், பாஸ்போர்ட் வழங்குவதில் ஏற்படும் தாமதத்தை தவிர்க்க மத்திய அரசு இந்த முடிவை எடுத்துள்ளதாக கூறப்படுகிறது. பாஸ்போர்ட் வழங்குவதற்கான புதிய நடைமுறை குறித்து உள்துறை, சட்டத்துறை ஆகியவற்றின் கருத்து கேட்கப்பட்டு, பின்னர் பிரதமர் மோடியின் ஒப்புதலுக்கு அனுப்பி வைக்கப்படும் என கூறப்பட்டுள்ளது. ஆதார் அட்டை அவசியம் என்ற நிலையில், அது இல்லாதவர்கள், அது குறித்த தங்களின் பதிவு செய்த எண்ணை விண்ணப்பத்தில் குறிப்பிட்டால் போதும் என்று சலுகை காட்டப்பட்டுள்ளது. 

விரைவான சேவை:

தற்போதைய நடைமுறையில், பாஸ்போர்ட் கோரும் விண்ணப்பங்கள் சம்பந்தப்பட்ட போலீஸ் ஸ்டேஷன்களுக்கு அனுப்பி வைக்கப்படும். பின்னர், அது குறித்த அறிக்கை பாஸ்போர்ட் அலுவலகத்திற்கு கொடுக்கப்படும், இந்த அறிக்கை கிடைத்த ஒருவாரத்திற்குள் விண்ணப்பதாரர்களுக்கு பாஸ்போர்ட் அனுப்பி வைக்கப்படும். புதிய நடைமுறையின் கீழ், ஆதார் அட்டையில் கொடுக்கப்பட்டுள்ள முகவரி மட்டும், போலீஸ் ஸ்டேஷனுக்கு அனுப்பி வைக்கப்படும். இதற்கிடையில், விண்ணப்பதாரர்களின் உறுதியளிப்பின் அடிப்படையில், பாஸ்போர்ட் உடனடியாக அவர்களுக்கு அனுப்பி வைக்கப்படும். அவர்கள் வௌிநாடு பயணம் மேற்கொள்வதற்குள், போலீஸ் வெரிபிகேஷன் முடிக்கப்படும். ஒருவேளை, விண்ணப்பதாரர் குற்றச் செயலில் ஈடுபட்டிருந்தாலோ, தவறான தகவலை கொடுத்திருந்தாலோ, பாஸ்போர்ட் ரத்து செய்யப்படும்.