தேசிய இளைஞர் விருதுக்கு விண்ணப்பிக்கலாம்

பணிகளை சிறந்த முறையில் செய்து வரும் இளைஞர்கள், தேசிய இளைஞர் விருது பெற தகுதியானவர்கள் விண்ணப்பிக்கலாம் என தெரிவித்துள்ளார் மாவட்ட ஆட்சியர் இல. நிர்மல்ராஜ்.

 இதுகுறித்து அவர் வெளியிட்டுள்ள செய்திக்குறிப்பு: ஆண்டுதோறும் ஜனவரி 12-ஆம் தேதி சுவாமி விவேகானந்தர் பிறந்த நாளையொட்டி தேசிய அளவிலான இளைஞர் விழாவில் மத்திய அரசால் சமூக நலன் மற்றும் தேசிய வளர்ச்சிக்கான பணிகளைச் சிறப்பாக செய்து வரும் இளைஞர்கள் (15 முதல் 29 வயது வரையுள்ள) மற்றும் தன்னார்வ தொண்டு அமைப்புக்களுக்கு தேசிய இளைஞர்  விருது வழங்கப்படுகிறது.

 அதன்படி 1.4.2015 முதல் 31.3.2016 வரையிலான காலத்தில் செய்த இளைஞர் நல பணி களுக்காக விருதுகள் நிகழாண்டில் வழங்கப்படுகிறது.

தகுதி: இளைஞர் (தனி நபர்):  குறிப்பிட்டுள்ள நிதியாண்டில் 15 முதல் 29 வயதுக்குள் இருக்க வேண்டும். தன்னார்வ அடிப்படையில் நிதி ஆதாயம் பெறாமல் தொண்டு செய்திருக்க வேண்டும். இதற்கு முன் விருது பெற்றவர்கள் இந்த ஆண்டுக்கான விருதுக்கு விண்ணப்பிக்கக் கூடாது.

மத்திய, மாநில பல்கலைக்கழகங்கள் மற்றும் இதர அரசு நிறுவனங்களில் பணியாற்றுபவர்கள் இவ்விருதுக்கு விண்ணப்பிக்கக் கூடாது. தேசிய விருது ரூ. 40,000 மற்றும் பதக்கம் 25 நபர்களுக்கு மட்டும்.

 தன்னார்வத் தொண்டு நிறுவனம்: சங்கப்பதிவு சட்டப்படி தொண்டு நிறுவனம் பதிவு செய்திருக்க வேண்டும். நிர்வாகக் குழுவின் அதிகாரங்கள் அமைப்பு விதிகளில் குறிப்பிடப் பட்டிருக்க வேண்டும். எவ்வித லாப நோக்கத்துடன் தொண்டு பணிகள் ஆற்றியிருக்க கூடாது.

 குறிப்பிட்ட சாதி, சமய அடிப்படையில் தொண்டாற்றிய நிறுவனங்கள் இவ்விருதுக்கு விண்ணப்பிக்க இயலாது. இதற்குமுன் இவ்விருது பெற்ற தொண்டு நிறுவனங்கள் இதற்கு விண்ணப்பிக்க இயலாது.

 சமுதாய நலப்பணிகளில் ஈடுபட்டு தொண்டாற்றிய புகைப்படம் மற்றும் செய்திக்குறிப்பு மற்றும் இதர ஆவணங்களுடன் சான்றொப்பம் இட்ட ஆதாரங்கள் இணைக்க வேண்டும். தேசிய விருது ரூ.2 லட்சம் பட்டயம் மற்றும் பதக்கம்.

இவ்விருதுக்கான விண்ணப்பம் திருவாரூர் மாவட்ட ஆட்சியர் வளாகத்தில் மாவட்ட விளையாட்டு மற்றும் இளைஞர் நலன் அலுவலகத்தில் அலுவலக வேலை நாட்களில் பெற்றுக் கொள்ளலாம்.

பெற்ற விண்ணப்பம் 3 நகல்களுடன் கருத்துருக்கள் மாவட்ட விளையாட்டு மற்றும் இளைஞர் நலன் அலுவலர் அலுவலகத்தில் ஆக. 25-ஆம் தேதிக்குள் ஒப்படைக்க வேண்டும். மேலும் விவரங்கள் மற்றும் விண்ணப்பங்கள் பெற தமிழ்நாடு விளையாட்டு மேம்பாட்டு ஆணைய இணையதளமான w‌w‌w.‌s‌d​a‌t.‌t‌n.‌g‌o‌v.‌i‌n​  என்ற இணையதளத்தில் பதிவிறக்கம் செய்து கொள்ளலாம்.