தமிழகம் முழுவதும் இன்று பள்ளிகள் திறப்பு!

 தமிழ்நாடு முழுவதும் கோடை விடுமுறைக்கு பின் பள்ளிகள் இன்று திறக்கப்பட்டது.

தமிழ்நாடு முழுவதும் அரசு மற்றும் அரசு உதவி பெறும் பள்ளிகள் 45 ஆயிரத்து 366 உள்ளன. இந்த பள்ளிகளில் 87,68,231 மாணவ-மாணவிகள் படித்து வருகின்றனர். முழு ஆண்டு தேர்வுகள் முடிந்து அனைத்து பள்ளிகளுக்கும் கோடை விடுமுறை விடப்பட்டது.

அரசு உயர்நிலை, மேல்நிலைப் பள்ளிகளுக்கு ஏப்ரல் 23 முதல் கோடை விடுமுறை அறிவிக்கப்பட்டது. அரசுத் தொடக்கப் பள்ளிகள், நடுநிலைப் பள்ளிகளுக்கு மே 1 முதல் கோடை விடுமுறை அறிவிக்கப்பட்டது.

கடந்த சில நாட்களாக கோடை வெப்பத்தின் தாக்கத்தினால் பள்ளிகள் திறக்கப்படும் தேதி தள்ளிவைக்கப்படலாம் என எதிர்பார்ப்பு இருந்தது. ஆனால், திட்டமிட்டபடி ஜூன் 1 ஆம் தேதியே பள்ளிகள் திறக்கப்படும் என்று பள்ளிக்கல்வித் துறை அறிவித்தது.

அதன்படி, கோடை விடுமுறை முடிந்து இன்று (திங்கட்கிழமை) பள்ளிகள் திறக்கப்பட்டன. விடுமுறையை மகிழ்ச்சியுடன் கொண்டாடிய மாணவ-மாணவிகள், மகிழ்ச்சி குறைந்து சற்று சோக முகத்துடனே இன்று பள்ளிகளுக்கு வந்தனர்.

மேலும் மாணவர்களின் கல்வி பாதிக்கக் கூடாது என்று தமிழக அரசு, அனைத்து அரசு மற்றும் அரசு உதவி பெறும் பள்ளி மாணவ-மாணவிகளுக்கு விலை இல்லா பாடப்புத்தகங்கள், விலை இல்லா நோட்டுகள், புத்தகப்பை உள்ளிட்ட 14 வகையான விலை இல்லா பொருட்களை அந்தந்த பள்ளிகளின் இன்று வழங்க ஏற்பாடுகள் செய்துள்ளது.