Tuesday, 10 March 2015

தமிழகம் வாக்காளர் அட்டைக்கும், ஆதார் அட்டைக்கும் விண்ணப்பிக்க ஒரே இடத்தில் சிறப்பு முகாம்: சந்தீப் சக்சேனா தகவல்

வாக்காளர் அடையாள அட்டைக்கும், ஆதார் அட்டைக்கும் விண்ணப்பிக்க ஒரே இடத்தில் சிறப்பு முகாம் நடத்தப்படும் என தமிழக தலைமை தேர்தல் அதிகாரி சந்தீப் சக்சேனா தெரிவித்துள்ளார்.

இது குறித்து சென்னையில் செய்தியாளர்களிடம் சந்தீப் சக்சேனா பேசினார். ''வாக்காளர் அடையாள அட்டைக்கும், ஆதார் அட்டைக்கும் விண்ணப்பிக்க ஒரே இடத்தில் சிறப்பு முகாம் நடத்தப்படும்.இதற்காக இந்திய மக்கள் தொகை கணக்கெடுப்பு பதிவாளர் அலுவலகத்துடன் தொடர்பு கொண்டு ஒப்புதல் பெறப்பட்டுள்ளது.

இந்த சிறப்பு முகாம் மாவட்ட ஆட்சியர்கள் தலைமையில் மாநிலம் முழுவதும் நடத்தப்படும்.இதற்கான பயிற்சிக் கையேடுகள் தேர்தல் ஆணையத்தால் உருவாக்கப்பட்டுள்ளது.

இந்த சிறப்பு முகாம் தொடர்பாக மார்ச் 13 -ல் மாவட்ட ஆட்சியர்களுடன் காணொளிக் காட்சி மூலம் உரையாட இருக்கிறேன். இதைத் தொடர்ந்து மார்ச் 19-ல் மாவட்ட அதிகாரிகளுக்கு பயிற்சி அளிக்கப்படும்.'' என சந்தீப் சக்சேனா தெரிவித்தார்.

Friday, 6 March 2015

ஜமாஅத் தேர்தல் தேதி அறிவிப்பு

கொடிக்கால்பாளையம் முஹ்யித்தீன் ஆண்டவர்கள் பள்ளிவாசல் ஊர்உறவின் முறை ஜமாஅத் தின் தெரு பிரதிநிதிகள் தேர்தல் வரும் மார்ச் 15 ஞாயிறு மத்லபுல் கைராத் பள்ளி வளாகத்தில் நடைபெற உள்ளதாக வக்ப் வாரிய கண்காணிப்பாளர் ஜூம்மாவிற்கு பிறகு அறிவித்துள்ளார்கள்.

ராணுவ கல்லூரியில் சேர விண்ணப்பிக்கலாம்


டேராடூனிலுள்ள ராஷ்டிரிய இந்தியன் மிலிட்டரி கல்லூரியில் 2016-ம் கல்வியாண்டுக்கான 8-ம் வகுப்பில் சேர மாணவர்கள் விண்ணப்பிக்கலாம்.
இதுகுறித்து மாவட்ட ஆட்சியர் எம். மதிவாணன் வெளியிட்டுள்ள செய்திக்குறிப்பு: 2003 ஜன. 2 மற்றும் 2004 ஜூலை 1-ம் தேதிகளுக்கு இடைப்பட்ட நாட்களில் பிறந்தவராகவும், 2016 ஜன. 1-ம் தேதி அன்று 7-ம் வகுப்பு படித்து கொண்டிருப்பவராக அல்லது முடித்தவராக உள்ள மாணவர்கள் இக்கல்லூரியில் சேர விண்ணப்பிக்கலாம். தகுதித் தேர்வு விண்ணப்பம் மற்றும் தகவல் தொகுப்பை பொதுப் பிரிவினர் பதிவஞ்சலில் பெற ரூ.430, துரித தபாலில் பெற ரூ 480, பட்டியல் மற்றும் அட்டவணை இனத்தவர் பதிவஞ்சலில் பெற ரூ.385, துரித தபாலில் பெற ரூ. 435, பஏஉ இஞஙஙஅசஈஅசப ஈஉஏதமச என்ற பெயரில் டேராடூன் பாரத ஸ்டேட் வங்கியில் மாற்றத் தக்க வகையில் காசோலை (டிராப்ட்) எடுத்து அதை கமாண்டன்ட், ராஷ்டிரிய இந்தியன் மிலிட்டாரி கல்லூ ரி, டேராடூன் - 248 003 உத்திரகாண்ட் என்ற முகவரிக்கு அனுப்பி பெற்றுக்கொள்ளலாம்.

பிளஸ் 2 தேர்வு14,722பேர் எழுதினர்


திருவாரூர் மாவட்டத்தில் வியாழக்கிழமை மாணவ, மாணவிகள் 14,722 பேர் பிளஸ் 2 தேர்வை எழுதினர்.
பிளஸ் 2 பொதுத் தேர்வு வியாழக்கிழமை தொடங்கி மார்ச் 31-ம் தே தி வரை நடைபெறுகிறது.
திருவாரூர் மாவட்டத்தில் 41 தேர்வு மையங்களில் 6,100 மாணவர்கள், 8,622 மாணவிகள் என மொத்தம் 14,722 பேர் தேர்வெழுதினர்.
தேர்வு நியாயமாக முறைகேடுகள் இன்றி நடக்க 10 தேர்வு அறைக்கு 1 பறக்கும் படையினர் வீதம் 100 பறக்கும் படையினர் தேர்வு கண்காணிப்பு பணியில் ஈடுபடுத்தப்பட்டனர்.
தவிர முதன்மைக் கல்வி அலுவலர், மாவட்ட கல்வி அலுவலர், மாவட்ட தொடக்கக் கல்வி அலுவலர், அனைவருக்கும் கல்வி இயக்க கூடுதல் முதன்மைக் கல்வி அலுவலர் ஆகியோர் தலைமையில் பறக்கும் படையினர் மாவட்டம் முழுவதும் அனைத்து பள்ளிகளுக்கும் சென்று கண்காணிப்பு பணியில் ஈடுபட்டனர்.
அறை கண்காணிப்பாளர்கள், நிலையான பறக்கும் படை அலுவலர்கள், கட்டு காப்பாளர்கள், வழித்தட அலுவலர்கள், துறை அலுவலர்கள், முதன்மைக் கண்காணிப்பாளர்கள், பறக்கும் படை உறுப்பினர்கள், அலுவலக உதவியாளர்கள் உள்ளிட்ட அனைத்து அலுவலர்களும் பணியில் ஈடுபடுத்தப்பட்டுள்ளனர்.
திருவாரூர் ஜிஆர்எம் பெண்கள் மேல்நிலைப் பள்ளியில் நடைபெற்ற தேர்வு மையத்தை மாவட்ட வருவாய் அலுவலர் த. மோகன்ராஜ் பார்வையிட்டு ஆய்வு செய்தார். அப்போது மாவட்ட முதன்மைக் கல்வி அலுவலர் மணி, கோட்டாட்சியர் முத்துமீனாட்சி உள்ளிட்டோர் உடனிருந்தனர்.

Thursday, 5 March 2015

வாக்காளர் பட்டியலில் பெயர் சேர்க்க விண்ணப்பிக்கலாம்


திருவாரூர் மாவட்டத்தைச் சேர்ந்த 18 வயது பூர்த்தியடைந்து வாக்காளர் பட்டியலில் இதுவரை பெயர் சேர்க்காதவர்கள் தற்போது விண்ணப்பம் அளித்து பெயரை சேர்த்துக்கொள்ளலாம் என ஆட்சியர் எம். மதிவாணன் தெரிவித்துள்ளார். 
 இதுகுறித்து அவர் வெளியிட்ட செய்திக்குறிப்பு:
 வாக்காளர் பட்டியல்கள் பொதுமக்கள் பார்வைக்காக சம்பந்தப்பட்ட வாக்குச்சாவடி நிலைய அலுவலர்கள் அலுவலகத்தில் வைக்கப்பட்டுள்ளது. பட்டியலில் தங்களது பெயர் இடம் பெற்றுள்ளதா என்றும், பெயர் பாலினம், வயது, உறவுமுறை, கதவிலக்க எண் மற்றும் முகவரி ஆகிய விவரங்கள் சரியாக உள்ளதா என்று சரிபார்த்துக் கொள்ளலாம். 
 பெயர் சேர்க்கை மற்றும் விவரங்கள் தவறாக இருப்பின் சேர்க்கை மற்றும் திருத்தங்களுக்கு புதிய சேர்க்கை படிவம் 6, பெயர் நீக்க படிவம் 7, பெயர் மற்றும் ஏனைய விவரங்களை திருத்தம் செய்ய 8, ஒரே சட்டப்பேரவை தொகுதிக்குள் முகவரி மாற்றம் செய்ய 8யு படிவங்களை பயன்படுத்தலாம். 
 வாக்காளர் பட்டியலில் இதுவரை பெயர் இடம் பெறதாவர்கள் இவ்வாய்ப்பை பயன்படுத்தி பெயரை பதிவு செய்து கொள்ளலாம். இரட்டைப் பதிவுகள் இருந்தால் தவறாக உள்ள ஒன்றினை நீக்கம் செய்துக் கொள்ள வேண்டும் என அறிவுறுத்தப்படுகிறது. 

திருவாரூரில் நாளை மார்பக புற்றுநோய் சிகிச்சை முகாம்


திருவாரூரில் வெள்ளிக்கிழமை (மார்ச் 6) உலக மகளிர் தினத்தையொட்டி, அதிமுக மகளிர் அணி சார்பில் மார்பக புற்றுநோய் சிகிச்சை முகாம் நடைபெறவுள்ளது.
திருவாரூர் - நாகை சாலை மல்லிகா மகாலில் காலை 9.30 மணிக்கு மார்பக புற்றுநோய் சிகிச்சை முகாம் தொடங்குகிறது. முகாமை அதிமுக மாவட்டச் செயலர் மற்றும் தமிழக உணவு, இந்து அறநிலையத்துறை அமைச்சர் ஆர். காமராஜ் தலைமையில், மீன்வளத்துறை அமைச்சர் கே.ஏ. ஜெயபால், வீட்டுவசதி மற்றும் நகாóபுற
வளர்ச்சித் துறை அமைச்சர் ஆர். வைத்திலிங்கம் ஆகியோர் தொடக்கிவைக்கின்றனர்.
முகாமில் அனுபவம் பெற்ற மருத்துவர்கள் பங்கேற்கின்றனர்.
பரிசோதனையில் தீவிர சிகிச்சை தேவைப்படுபவர்களுக்கு தேவையான உதவிகள் "அம்மா' மருத்துவ முகாம் மூலம் வழங்கப்படுகிறது.

தமிழகத்தில் 3 லட்சம் செயலற்ற எரிவாயு இணைப்புகள்: 6 மாதம் பயன்படுத்தாவிட்டால் இணைப்பு துண்டிப்பு


சமையல் எரிவாயு நேரடி மானியத் திட்டம் அமல்படுத்தப்பட்ட பிறகு, தமிழகத்தில் சுமார் 3.40 லட்சம் எரிவாயு இணைப்புகள் செயலற்றவை எனக் கண்டறியப்பட்டுள்ளன.
மத்திய அரசின் சமையல் எரிவாயு நேரடி மானியத் திட்டம் தமிழகம் உள்பட நாடு முழுவதும் கடந்த ஜனவரி 1-ஆம் தேதி அமல்படுத்தப்பட்டது.
தமிழகத்தைப் பொருத்தவரை 1.53 கோடி சமையல் எரிவாயு இணைப்புகள் உள்ளன.
இவற்றில் திங்கள்கிழமை (மார்ச் 2) நிலவரப்படி சுமார் 1.25 கோடி வாடிக்கையாளர்கள் நேரடி மானியத் திட்டத்தில் இணைந்துள்ளனர். சுமார் 17 சதவீதம் பேர் இந்தத் திட்டத்தில் இணையாமல் உள்ளனர்.
நேரடி மானியத்திட்டத்தில் சேர வரும் மார்ச் 31-ஆம் தேதி வரை கால அவகாசம் உள்ளது. இதன்பிறகு, ஜூன் மாத இறுதியில் இந்தத் திட்டம் முழுமையாக அமல்படுத்தப்படும்.
நேரடி மானியத் திட்டம் அமல்படுத்தப்பட்ட பிறகு செயலற்ற எரிவாயு இணைப்புகளின் எண்ணிக்கை அதிகரித்துள்ளது.
கடந்த ஜனவரி 1-ஆம் தேதி முதல் பிப்.28-ஆம் தேதி வரை சுமார் 3.40 லட்சம் எரிவாயு இணைப்புகள் செயலற்றவை எனக் கண்டறியப்பட்டுள்ளன.
இந்த எண்ணிக்கை கடந்த 2014-ஆம் ஆண்டு நவம்பர் மாதத்துக்கு முன்பு இணைப்பை பயன்படுத்தாதவர்களின் எண்ணிக்கையை விட அதிகம்.
இணைப்பு துண்டிப்பு: செயலற்ற எரிவாயு இணைப்புகளில் 6 மாதங்களாக தொடர்ந்து எரிவாயு உருளைக்கு முன்பதிவு செய்யாமல் இருப்பவர்களுக்கு இணைப்பு தானாகவே துண்டிக்கப்பட்டுவிடும். இவர்கள் மீண்டும் "உங்கள் வாடிக்கையாளரை அறியும் வசதிக்கான (கே.ஒய்.சி)' படிவத்தை பூர்த்தி செய்து, முகவரிச் சான்று, அடையாளச் சான்று கொடுத்து எரிவாயு இணைப்பைப் பெற்றுக் கொள்ளலாம்.
ஆனால் போலி இணைப்புகள் எனக் கண்டறியப்பட்டவர்கள், தங்களது இணைப்பு உண்மையானது என நிரூபித்தால் மட்டுமே அவர்களுக்கு மீண்டும் இணைப்பு வழங்கப்படும்.
சென்னையில் அதிகம்: சென்னையில் மட்டும் சுமார் 1 லட்சத்து 7 ஆயிரம் இணைப்புகள் செயலற்ற நிலையில் உள்ளன. இதற்கு அடுத்தபடியாக வேலூரில் 34 ஆயிரம், காஞ்சிபுரத்தில் 30 ஆயிரம், திருப்பூரில் 25 ஆயிரம், கோவையில் 19.5 ஆயிரம் செயலற்ற இணைப்புகள் உள்ளன என எண்ணெய் நிறுவன அதிகாரிகள் தெரிவித்தனர்.
10 சதவீதம் போலியானவை?
நேரடி மானியத் திட்டத்தின் மூலம் ஒன்றுக்கும் மேற்பட்ட இணைப்பு வைத்திருப்பதைக் கண்டறிய முடியும்.
ஒரே முகவரியில் இரண்டு இணைப்புகளை வைத்துள்ளவர்கள், ஒரு இணைப்புக்கு மட்டும் முன்பதிவு செய்வதாலும் செயலற்ற எரிவாயு இணைப்புகளின் எண்ணிக்கை அதிகரித்துள்ளது.
போலி எரிவாயு இணைப்பு வைத்துள்ளவர்கள் யார் என்ற விவரம் நேரடி மானியத் திட்டம் முழுமையாக அமல்படுத்தப்பட்ட பின் ஜூலை மாதத்தில்தான் தெரிய வரும். இருப்பினும் இதுவரை நேரடி மானியத் திட்டத்தில் இணையாத வாடிக்கையாளர்களில் சுமார் 10 சதவீத இணைப்புகள் போலியானவையாக இருக்கலாம் என எண்ணெய் நிறுவன அதிகாரிகள் தெரிவித்தனர்.

Wednesday, 4 March 2015

உலகக் கோப்பை முதல் கட்டம்: ஆச்சரியங்கள், அதிர்ச்சிகள், சாதனைகள்!


ஆஸ்திரேலிய அணி வங்கதேசத்தைவிடவும் தாழ்ந்த நிலையில் இருக்கிறது. இரண்டு வாரங்களுக்கு முன்பு இந்த வாக்கியத்தை யாராவது சொல்லியிருந்தால், அவரது மனநலன்குறித்துச் சந்தேகம் வந்திருக்கும். ஆனால், இன்று அதுதான் யதார்த்தம். 11-வது உலகக் கோப்பைப் போட்டிகளின் முதல் கட்டப் போட்டிகள் முடிந்துள்ள நிலையில், ஆஸ்திரேலிய அணி தனது பிரிவில் நியூஸிலாந்து, இலங்கை, வங்கதேசத்துக்கு அடுத்தபடியாக நான்காவது இடத்தில் இருக்கிறது. இங்கிலாந்து அணி, ஆப்கானிஸ்தானுக்கும் கீழே ஆறாவது இடத்தில் இருக்கிறது.
ஆச்சரியங்களும் அதிர்ச்சிகளும் இத்தோடு முடிந்து விடவில்லை. ஆஸ்திரேலிய, நியூஸிலாந்து ஆடுகளங்களில் இந்தியா எக்கச்சக்கமாக அடிவாங்கித் தள்ளாடப்போகிறது என்று கிரிக்கெட் பண்டிதர்கள் பலரும் நினைத்தார்கள். குறிப்பாக, அதன் பந்து வீச்சுக்கு இரங்கற்பா எழுதும் அளவுக்கும் சென்றார்கள். ஷாஹித் அஃப்ரிதியும் ஏபி டிவிலியர்ஸும் இந்தியப் பந்து வீச்சைப் புரட்டி எடுக்கப் போகிறார்கள் என்று ஆரூடம் சொன்னார்கள். பாகிஸ்தானின் ஏழடி உயர முகம்மது இர்ஃபானையும் அதிவேக டேல் ஸ்டெயினையும் இந்திய மட்டையாளர்கள் எப்படித்தான் சமாளிக்கப்போகிறார்களோ என்று அனுதாபப்பட்டார்கள். ஆனால், ஆடிய மூன்று போட்டிகளிலும் அலட்டிக்கொள்ளாமல் வென்று தன் பிரிவில் முதலிடத்தில் கம்பீரமாக வீற்றிருக்கிறது இந்தியா. இதே பிரிவில் ஆறாவது இடத்தில் பாகிஸ்தான் பின்தங்கியிருக்கிறது. இரட்டைச் சதம் எடுத்த கிறிஸ் கெய்ல் போன்ற ஆட்டக்காரரைக் கொண்ட மேற்கிந்தியத் தீவுகள் அணியைக் காட்டிலும் சற்று மேலான நிலையில் அயர்லாந்து அணி நேற்றுவரை இருந்தது. என்னதான் நடக்கிறது?
அடித்து நொறுக்கப்பட்ட ஆரூடங்கள்
இதுதான் 2015 உலகக் கோப்பை என்னும் பரபரப்பான நாடகத்தின் விறுவிறுப்பான முதல் கட்டம். ஆரூடங்களும் கணிப்புகளும் டிவிலியர்ஸும் பிராண்டன் மெக்கல்லமும் அடிக்கும் பந்துகளைவிடவும் அதிக வேகத்தில் சிதறி ஓடிய கட்டம் இது. போரால் சின்னாபின்னமான ஆப்கானிஸ்தான் சர்வதேச அரங்கில் தன் ஆட்டத்துக்காகப் பேசப்படும் வரலாறு அரங்கேறிய களம் இது. சிறந்த பந்து வீச்சு, மட்டை வீச்சு இரண்டும் இருந்தும் நான்கு போட்டிகளில் ஒரே ஒரு போட்டியில் மட்டுமே இங்கிலாந்து வென்றிருக்கிறது. அரை இறுதிக்கு வரும் எனக் கணிக்கப்பட்ட இந்த அணி, கால் இறுதியை எட்டுவதே சந்தேகம் என்னும் நிலையில் அதிர்ந்துபோயிருக்கிறது. இலங்கைக்கு எதிரான போட்டியில் 309 ரன்கள் அடித்தும் போட்டியில் வெல்ல முடியவில்லை. ஒரே ஒரு விக்கெட்டை மட்டும் இழந்து இலங்கை இலக்கை அநாயாசமாக அடித்து நொறுக்கியது. இந்தியாவிடமும் மேற்கிந்தியாவிடமும் தோற்ற பாகிஸ்தான், ஜிம்பாப்வேக்கு எதிரான போட்டியில் 237 ரன்கள் மட்டுமே எடுத்துத் தடுமாறியது. பந்து வீச்சு கைகொடுத்ததால் 20 ரன் வித்தியாசத்தில் வென்றாலும் பெரிதும் எதிர்பார்க்கப்பட்ட இந்த அணிக்கு இது பின்னடைவுதான் என்பதில் சந்தேகமில்லை.
66 பந்துகளில் 162 ரன் அடித்துப் பேயாட்டம் ஆடிய டிவிலியர்ஸும் அவருக்குப் பக்கத் துணையாக டேவிட் மில்லர், ஹஷிம் ஆம்லா, ஃபாஃப் டூப்ளசிஸ் ஆகிய மட்டையாளர்களும் நன்றாகவே ஆடினாலும் இந்தியாவிடம் பெற்ற தோல்வியால் தென்னாப்பிரிக்க அணி சற்றே பின்தங்கியிருக்கிறது. ஸ்டெயின், மோர்னி மார்க்கல் கூட்டணி எதிர்பார்த்த அளவு மிரட்டவில்லை. குறிப்பாக, இந்தியாவின் ஷிகர் தவன், விராட் கோலி, அஜிங்க்ய ரஹானே ஆகியோர் இவர்களைத் திறமை யாக எதிர்கொண்டார்கள். ஜிம்பாப்வே அணிகூட 277 ரன்களைக் குவித்துத் தென்னாப்பிரிக்கப் பந்துவீச்சைப் பற்றிய கேள்விகளை எழுப்பியது.
உறைந்து நிற்கும் உச்ச அணி
ஆஸ்திரேலியாவின் நிலை இதை யெல்லாம் தூக்கிச் சாப்பிடும்படியான அதிர்ச்சி என்று சொல்ல வேண்டும். 1999-ல் தொடர்ந்து 7 போட்டிகளில் தோல்வி காணாமல் முன்னேறிய இந்த அணி, அதன் பிறகு 2011-ல் பாகிஸ்தானிடம் தோற்றதுவரை உலகக் கோப்பைப் போட்டிகளில் ஒரு போட்டியில் கூடத் தோற்கவில்லை. கோப்பையை வெல்லக்கூடிய அணி என்று பெரும் பாலானவர்களால் கணிக்கப்பட்டுள்ள இந்த அணி, ஆடிய மூன்று ஆட்டங் களில் ஒன்றில் வெற்றி, ஒன்றில் தோல்வி, ஒரு போட்டி ரத்து என்ற நிலையில் நான்காம் இடத்தில் நிற்கிறது. ஆட்டத்தின் எல்லாத் துறைகளிலும் வல்லமை பெற்றுள்ள இந்த அணி இப்படி ஒரு நிலை தனக்கு வரும் என்று கனவிலும் நினைத்திருக்காது. நியூஸிலாந்துடனான போட்டியில் இந்த அணி 32.2 ஓவர்களில் 151 ரன்னுக்குச் சுருண்டது. மிட்செல் ஸ்டார்க்கின் பொறிபறக்கும் பந்து வீச்சால் கிட்டத்தட்ட வெற்றிபெறும் நிலைக்கு வந்தாலும், இறுதியில் கான் வில்லியம்ஸின் பதறாத ஆட்டத்தால் தோல்வி கண்டு அதிர்ச்சியில் உறைந்து நிற்கிறது.
முதல் சுற்றில் இன்னும் பாதிச் சுற்று பாக்கி இருக்கும் நிலையில், அணிகளின் நிலை மாறலாம். ஆஸ்திரேலியா வீறுகொண்டு எழலாம். பாகிஸ்தானும் இங்கிலாந்தும் சுதாரித்துக்கொண்டு முன்னேறலாம். ஆனால், சர்வதேசத் தரவரிசையில் முதல் 8 இடங்களைப் பெற்றுள்ள இரண்டு அணிகளேனும் கால் இறுதியில் இடம்பெறாமல் வெளியேறுவதற்கான வாய்ப்புகள் அதிகம் இருக்கின்றன. வலுவற்ற அணிகள் எனக் கருதப்படும் இரண்டு அணிகள் கால் இறுதியில் இடம்பெற்றுவிடலாம். அடுத்த உலகக் கோப்பையில் அணிகளின் எண்ணிக்கையைக் குறைப்பது என்னும் சர்வதேச கிரிக்கெட் கவுன்சிலின் முடிவு கடுமையாக விமர்சிக்கப்படும் நிலை உருவாகலாம்.
சிறிய அணிகளின் நிலை
அந்த விமர்சனம் இப்போதே தொடங்கிவிட்டது. சிறிய அணிகள் என்று சொல்லப்படும் அணிகளை சர்வதேச கிரிக்கெட் கவுன்சில் நடத்தும் விதம் விசித்திரமாக உள்ளது. உலகக் கோப்பை என்னும் பெயரைத் தாங்கியிருந்தாலும் பல சமயங்களில் ஒரு டஜன் அணிகள் மட்டுமே ஆடும் தொடர் இது. கிரிக்கெட்டைத் தவிர, பிரபலமான வேறு எந்த ஆட்டத்துக்கும் இந்த நிலை இல்லை. இந்நிலையில் சர்வதேச கிரிக்கெட் கவுன்சில், கிரிக்கெட்டை மேலும் பரவலாக்கும் முயற்சிகளில் ஈடுபடுவதைத் தன் கடமையாகக் கருதுவதுதான் இயல்பானது. ஆனால், இருக்கும் அணிகளைக் கழித்துக் கட்டும் வேலையை அந்த அமைப்பு மும்முரமாகப் பார்த்துக் கொண்டிருக் கிறது என்றுதான் சொல்ல வேண்டும்.
டெஸ்ட் அந்தஸ்து பெற்ற பத்து அணிகளைத் தவிர அயர்லாந்து, ஸ்காட்லாந்து, ஆப்கானிஸ்தான், ஐக்கிய அரபு அமீரகம் ஆகிய அணிகள் இந்தத் தொடரில் ஆடுகின்றன. இந்த நான்கு அணிகளும் கென்யா, நெதர்லாந்து போன்ற இதர அணிகளும் அடுத்த தொடரில் இடம் பெறுவது சந்தேகம் என்ற நிலை உருவாகலாம் எனத் தெரிகிறது. சிறிய அணிகளைக் குறைக்கும் விதத்தில் அடுத்த தொடர் நடக்கக்கூடும் என்ற செய்திகள் வெளியானதைச் சிறிய அணிகள் ஆட்சேபித்திருக்கின்றன.
உலகக் கோப்பை என்பது கிரிக்கெட் ஆடும் நாடுகளுக்கு ஒரு திருவிழா போன்றது. தங்கள் நாட்டின் அணி ஆடும் ஆட்டங்களை மட்டுமல்லாமல் பொதுவாக எல்லா ஆட்டங்களையும் கிரிக்கெட் ரசிகர்கள் ஆர்வத்துடன் கவனித்துவரும் தருணம் இது. கிரிக்கெட்டின் ஆகப் பெரிய களமான இந்தப் போட்டியில் தன்னுடைய திறமையை வெளிப்படுத்த வேண்டும் என்னும் வேட்கை ஒவ்வொரு அணிக்கும் ஒவ்வொரு ஆட்டக்காரருக்கும் இருக்கும். இந்தக் களத்திலிருந்து சிறிய அணிகளை அப்புறப்படுத்திவிட்டால் போட்டிகள் மேலும் விறுவிறுப்பாக இருக்கலாம். ஆனால், புதிய திறமைகள் வெளிச்சத்துக்கு வரும் வாய்ப்புகள் குறைந்துவிடும். உலகக் கோப்பையின் சுவாரஸ்யங்களும் வண்ணங்களும் குறைந்துவிடும்.
பெரிய அணி என்று சொல்லப்படும் அணிகளைச் சிறிய அணிகள் வெல்லும்போதோ அவற்றுக்குக் கடுமையான சவாலாக விளங்கும்போதோ கிடைக்கும் பரவசம் ஈடிணையற்றது. இந்தத் தொடரில் மேற்கிந்தியத் தீவுகள் அணியை அயர்லாந்து அணி வென்றது. பாகிஸ்தான் ஜிம்பாப்வேயிடம் திணறிப் பிறகு வென்றது. ஆப்கானிஸ்தான், அரபு அணிகள் வெளிப்படுத்தும் துடிப்பு கிரிக்கெட்டின் மீதான ஆர்வத்தை அதிகரிக்கச் செய்கிறது. உலகெங்கும் உள்ள கிரிக்கெட் ஆர்வலர்களும் நிபுணர்களும் பார்த்துக்கொண்டிருக்கும் சமயத்தில் தங்களது ஆட்டத்தின் எல்லைகளை விரிவுபடுத்திக்கொள்வதற்கான பெரும் உத்வேகத்தைச் சிறிய அணிகளுக்கு இந்த உலகக் கோப்பை தருகிறது. இந்த உத்வேகம் இந்த அணிகளை மட்டுமல்ல, ஆட்டத்தையும் வளர்க்கக்கூடியது. விரிவுபடுத்தக்கூடியது.
தரத்தை மேம்படுத்த வேண்டுமென்றால், அதற்கு வழி பலவீனர்களை வெளியேற்றுவது என்பது மேட்டுக்குடித் தனமான அணுகுமுறை. தகுதி, தரம் ஆகியவற்றின் அடிப்படையில் சிலரை ஒதுக்கும் பாரபட்சத்துக்கு இணையானது இது. அனைவரையும் உள்ளடக்கும் அணுகு முறையுடன் போட்டியின் தரத்தைப் பேணுவதற்கான வழிகளைக் காண வேண்டியதே சர்வதேச கிரிக்கெட் கவுன்சிலின் கடமை. இந்தத் தொடரிலும் பெரிய அணிகள் மிகவும் மோசமாக ஆடினாலொழிய அவை அடுத்த சுற்றுக்குப் போவதில் எந்தப் பிரச்சினையும் இருக்காது என்னும் விதத்தில்தான் தொடர் வடிவமைக்கப்பட்டிருக்கிறது. ஆட்டத்தின் தரத்தைக் கூட்டுவதைப் போலவே ஆச்சரியங் களை அதிகரிக்கச் செய்ய வேண்டியதும் முக்கியம்தான்.

Tuesday, 3 March 2015

தேர்தல் வாக்காளர் பட்டியல் ஆதார் எண்ணுடன் இணைப்பு


இந்திய தேர்தல் ஆணையம் நாடுமுழுவதும் இன்று தேசிய வாக்காளர் பட்டியல் சரிப்பார்ப்பு மற்றும் நம்பகத்தன்மை நிகழ்ச்சியை துவக்கியது. வாக்காளர் பட்டியலில் எந்தவித பிழையும் இல்லாமல் நம்பகத்தன்மையை கொண்டு வருவதே இதன் நோக்கமாகும்.
இந்நிகழ்ச்சியில் வாக்காளர் புகைப்பட அடையாள அட்டை ஆதாருடன் இணைக்கப்படும். வாக்காளர்களும் புகைப்பட தரத்தை அதிகரிப்பதும் திருத்தங்கள் போன்றவற்றை சரிசெய்வதும் இந்நிகழ்ச்சியின் நோக்கமாகும்.
தேர்தல் ஆணைய இணையதள சேவையின் மூலம் வாக்காளர்கள் தங்களது ஆதார் எண்ணை குறுஞ்செய்தி, மின் அஞ்சல், மொபைல் அப்ளிகேஷன் மற்றும் தேசிய வாக்காளர் சேவை இணையம் ஆகிய வசதிகள் கொண்டு இணைத்துக்கொள்ளலாம்.
இதைத்தவிர 1950 என்ற எண்ணின் மூலம் மாநில சேவை மையத்தை தொலைபேசி மூலம் தொடர்பு கொண்டு தங்கள் ஆதார் எண் விவரங்களையும் வாக்காளர் புகைப்பட அடையாள அட்டை எண் அதன் நகல்களையும் சமர்பிக்கலாம்.
வாக்காளர் பதிவு அலுவலர் ஏற்பாடு செய்யும் சிறப்பு முகாம்களிலும் வாக்காளர் வசதி மையங்களிலும் இணைய சேவை மையங்களிலும் மாவட்ட தேர்தல் அலுவலர்களால் அங்கீகரிக்கப்பட்ட குடிமக்கள் சேவை மையங்களிலும் ஆதார் எண்ணை சமர்பிக்கலாம். தேர்தல் அதிகாரிகள் கணக்கெடுப்பின்போதும் இந்த தகவலை தெரிவிக்கலாம். பொது மக்கள் அதிக அளவில் பங்கேற்பதை உறுதிசெய்ய தேசிய அளவிலான சிறப்பு முகாம்களை வாக்காளர் பதிவு அலுவலர் 12.4.2015 அன்று ஏற்பாடு செய்துள்ளார்.
தேசிய வாக்காளர் பட்டியல் சரிப்பார்ப்பு மற்றும் நம்பகத்தன்மை நிகழ்ச்சியின் கீழ் பல்வேறு இடங்களில் பதிவு செய்துள்ள வாக்காளர்கள் தானாக முன்வந்து தகவலை அளிக்க வசதி செய்யப்பட்டுள்ளது. இந்த வாக்காளர்கள் படிவம் 7யை சமர்பிக்க வேண்டும். இதன்மூலம் பல்வேறு இடங்களில் பதிவுசெய்யப்பட்டுள்ள அவர்களின் பெயர் நீக்கப்பட்டு அவர்கள் தங்கி உள்ள முகவரிக்கு ஏற்றபடி வழங்கப்படும். படிவம் 7யை தேசிய வாக்காளர் சேவை இணையம் அல்லது சிறப்பு முகாம்கள் / இணைய சேவை போன்ற மற்ற மையங்களிலும் சமர்ப்பிக்கலாம்.

அதிகரிக்கும் பண மோசடிகளை தடுப்பது எப்படி?- சட்டங்களை கடுமையாக்க சமூக ஆர்வலர்கள் வலியுறுத்தல்


கோப்புப் படம்.
அதிகரித்து வரும் பண மோசடிகளை தடுக்க சட்டங்களை கடுமையாக்க வேண்டும் என்று சமூக ஆர்வலர்கள் தெரிவித்துள்ளனர்.
வெளிநாடு மற்றும் அரசு அலுவலகங்களில் வேலை, கல்லூரி சீட், வங்கிக் கடன் வாங்கித் தருவதாக, குறைந்த முதலீட்டில் அதிக வட்டி தருவதாக கூறி மோசடி, ஏலச்சீட்டு, நிதி நிறுவனம் நடத்தி மோசடி… இப்படி பல்வேறு மோசடிகள் குறித்த புகார்கள் தினமும் வருகின்றன. 4 நாட்களுக்கு முன்புகூட, சென்னை குன்றத்தூரில் போலி வெளிநாட்டு வேலைவாய்ப்பு நிறுவனம் நடத்தி ரூ.1 கோடிக்கும் அதிகமாக மோசடி செய்த முகமது ஜான் என்பவரை போலீஸார் கைது செய்தனர்.
கடந்த ஒரு மாதத்தில் மட்டும் தமிழகம் முழுவதும் சுமார் 700 பண மோசடி வழக்குகள் பதிவு செய்யப்பட்டுள்ளன. பண மோசடிகள் அதிகரிப்பதற்கான காரணம் குறித்தும், தடுப்பதற்கான வழிகள் குறித்தும் போலீஸார், வழக்கறிஞர், சமூக ஆர்வலர்கள் கருத்து தெரிவித்துள்ளனர்.
கடுமை இல்லாத சட்டங்கள்
மோசடி வழக்குகளை விசாரிக்கும் மத்திய குற்றப்பிரிவு போலீஸ் அதிகாரி ஒருவர் கூறும்போது, ‘‘பொதுமக்களிடம் விழிப்புணர்வு இல்லை என்பதை காரணமாக கூறினாலும், சட்டங்கள் கடுமையாக இல்லாததுதான் முக்கிய காரணம். கோடிக்கணக்கில் மோசடி செய்து விட்டு அதில் சில லட்சங்களை செலவு செய்து ஜாமீன் வாங்கிக் கொள்கின்றனர். உதாரணத்துக்கு, ரூ.1 கோடி மோசடி செய்து, அதில் ரூ.30 லட்சத்தை வழக்குக்காக செலவு செய்கின்றனர். விடுதலையானதும் மீதிப் பணத்தை வைத்து சந்தோஷ மாக இருக்கின்றனர். மோசடி செய் பவர்கள் இதை நன்றாக தெரிந்து வைத்துள்ளனர்’’ என்றார்.
சொத்துகள் பறிமுதல்
வழக்கறிஞர் துரை கூறியதாவது: நாட்டையே அதிர வைத்த முத்திரைத்தாள் மோசடியில் (ரூ.30 ஆயிரம் கோடி) குற்றவாளிக்கு நீதிமன்றம் அளித்த தண்டனை 7 ஆண்டு சிறை மட்டும்தான். மோசடி செய்யப்பட்ட பணமும் முழுமையாக பறிமுதல் செய்யப்படவில்லை. பிரபல கம்ப்யூட்டர் நிறுவனத்தின் ரூ.1,500 கோடி மோசடி, ஒரு நிதி நிறுவனத்தின் ரூ.1,200 கோடி மோசடி போன்ற வழக்குகளில் இதுவரை பாதிக்கப்பட்டவர்களுக்கு உரிய நியாயம் கிடைக்கவில்லை.
நடமாடும் நகைக் கடைபோல வலம் வந்த சென்னை கொடுங்கையூரைச் சேர்ந்த ஒருவர், கடன் பெற்றுத் தருவதாக கூறி பல கோடி மோசடி செய்தார். சிறைக்கு சென்று வந்த அவர், மீண்டும் அதையே தொழிலாக செய்கிறார். இந்திய தண்டனைச் சட்டம் 406, 420 ஆகிய பிரிவுகளின் கீழ் மோசடியில் ஈடுபட்டவர்களின் சொத்துகளை பறிமுதல்செய்து, அதை பாதிக்கப்பட்டவர்களுக்கு வழங்கலாம். ஆனால் போலீஸ் அதிகாரிகள் யாரும் அதைச் செய்வதில்லை.
இவ்வாறு அவர் கூறினார்.
குற்றவாளிகள் பட்டியலில்…
சமூக ஆர்வலர்கள் கூறும் போது, ‘‘மோசடி செய்யும் நபரின் சொத்துகளை பறிமுதல் செய்வ தோடு, அந்த நபரின் ரத்த சம்பந்தம் உள்ள அனைவரின் சொத்துக் களையும் பறிமுதல் செய்து பாதிக்க பட்டவர்களுக்கு வழங்க வேண்டும். மோசடிப் பேர்வழிகளுக்கு எந்த அரசியல் கட்சியும் அங்கீகாரம் அளிக் கக்கூடாது.
அவர்களது பெயர்களை குற்றவாளிகள் பதிவேட்டில் போலீஸார் பதிவுசெய்து, அனை வரும் தெரிந்துகொள்ளும் வகையில் பெரிதாக அறிவிப்பு வெளியிட வேண்டும்’’ என்றனர்.
வெளிநாடு செல்வோர் கவனத்துக்கு
வெளிநாடுகளில் உள்ள வேலைவாய்ப்புகள் குறித்து, சென்னை கிண்டி தொழிற்பேட்டையில் இயங்கி வரும் தமிழக அரசின் அயல்நாட்டு வேலைவாய்ப்பு நிறுவனத்தில் கேட்டு தெரிந்துகொள்ளலாம். 044-22502267, 22505886 என்ற தொலைபேசி எண்களிலும் தொடர்பு கொள்ளலாம். www.omcmanpower.com என்ற இணையதளம் மூலமாகவும் வெளிநாட்டு வேலைவாய்ப்புகளை தெரிந்துகொள்ளலாம். தனியார் வேலைவாய்ப்பு நிறுவனங்களைப் பற்றி அருகில் இருக்கும் காவல் நிலையத்திலும் அரசின் அயல்நாட்டு வேலைவாய்ப்பு நிறுவனத்திலும் கேட்டு தெரிந்துகொள்ளலாம்.

Monday, 2 March 2015

தங்கத்தை வங்கிகளில் டெபாசிட் செய்து வட்டி பெறலாம்


பொதுமக்கள் தங்கள் கைவசம் உள்ள தங்கத்தை வங்கிகளில் டெபாசிட் செய்து வட்டி பெறலாம் என்ற புதிய திட்டம் பட்ஜெட்டில் அறிவிக்கப்பட்டுள்ளது.
இந்தியாவில் எவ்வித பயனுமின்றி பொதுமக்களிடம் முடங்கிக் கிடக்கும் தங்கத்தை வெளியே கொண்டு வந்து பயனுள்ள வகையில் பயன்படுத் தவும், தங்க இறக்குமதியை குறைக்கவும் இத்திட்டம் உதவி கரமாக இருக்கும் என்று கருதப்படுகிறது.
இந்தியாவில் இப்போது 20 ஆயிரம் டன் தங்கம் மக்களிடம் முடங்கிக் கிடக்கிறது. இவை விற்கப்படுவதும் இல்லை, பணமாக்கப்பட்டு பயன்படுத்தப் படுவதும் இல்லை. எனவே பொதுமக்களிடம் அபரிமிதமாக உள்ள தங்கத்தை பணமாக செலாவணியாக்கி அவற்றை நாட்டு நலனுக்கு பயன்படுத்திக் கொள்ள பட்ஜெட்டில் 3 திட்டங் களை அருண் ஜேட்லி அறிவித்துள் ளார். அதன்படி நிலையான வட்டியுடன் தங்கத்தை அடிப்படை யாக கொண்டு பத்திரங்களை அரசு வெளியிடும். தங்கத்தை உலோகமாக வாங்குவதற்கு பதிலாக அரசு வெளியிடும் பத்திரங்களாக வாங்கும் திட்டமும் அறிமுகப்படுத்தப்படுகிறது.
இது மட்டுமல்லாது மக்கள் வங்கிகளில் பணத்தை டெபாசிட் செய்து வட்டி பெறுவதுபோல தங்களிடம் உள்ள தங்கத்தை வங்கிகளில் டெபாசிட் செய்து வட்டி பெற முடியும். தங்க நகைக் கடை வைத்திருப்பவர்களும் இத்திட்டத்தை பயன்படுத்தி பயனடைய முடியும்.
இப்போதுள்ள தங்க டெபாசிட் திட்டம், தங்க கடன் திட்டம் ஆகியவற்றுக்கு மாற்றாக இது செயல்படுத்தப்படும். வங்கி களும், பிற நிதி நிறுவனங்களும் தாங்கள் பெறும் தங்கத்தை பணமாக்கிக் கொள்ள முடியும்.
உள்நாட்டில் வீணாக தேங்கிக் கிடக்கும் தங்கத்தை மறுசுழற்சி செய்வதன் மூலம் வெளிநாட்டில் இருந்து தங்கம் இறக்குமதி செய்யப்படுவது குறையும். இதனால் நடப்பு கணக்கு பற்றாக்குறையும், வர்த்தக பற்றாக்குறையும் பெருமளவில் குறைய வாய்ப்புள்ளது.

Sunday, 1 March 2015

Kodikkalpalayam - பாச்சோறு பெருவிழா

பாச்சோற்று பெருவிழா





திருவாரூர் மாவட்டம் கொடிக்கால்பாளையத்தில் பல நூற்றாண்டுகளுக்கு முன்பு நிகழ்ந்த அற்புத நிகழ்ச்சியை நினைவு கூறும் முகத்தான் இப்பெருவிழாவாக நடைபெற்று வருகிறது.
முஹ்யித்தீன் ஆண்டவர்கள் பள்ளிவாசல் வளாகத்தில் தங்கியிருந்த சைய்தினா சைய்யது மஃஸூம் சாஹிப் அவர்கள் ஒரு ஆலம் விழுத்தை ஊன்றியதைகொண்டு அது பெருமரமாகி தோன்றியாதாக்கூறுவார்கள்.
அதனை நினைவு கூறும் விதமாக அன்றைய காலத்தில் உணவு சமைக்கப்பயன்பட்ட "மடா" என்னும் மண்பானையில் 5 படி பச்சைஅரிசி 5 சேர் சர்க்கரை 5 தேங்காய்களை கொண்டு பாகுச்சோறு எனப்படும் பாச்சோறு (சக்கரை பொங்கல்)சமைத்து பள்ளிவாசல் கொண்டு வந்து இறைவனிடம் பிராத்திகத்து அனைவர்களுக்கும் பகிர்தளித்து உண்ணுமாறு மஹான் அறிவுறுத்தி உள்ளார்கள் .
இதனை தொடக்க காலத்தில் ஒரு சில சட்டிகள் வந்த நிலையில் இன்று நூற்றுக்கானக்கான சட்டிகள் வந்தன. மேலும் அனைவர்களும் ஜாதி மத பேதம் இன்றி மனித நேய மத நல்லிணக்க விழாவாக நடைபெருவது தனி சிறப்பாகும்.

http://youtu.be/qDGppl-dsvU

இதற்காக விழா ஏற்பாடுகளை ஜமாஅத் தலைவர் ரபீயூதீன் ,செயலாளர் ஜாகீர் ஹூசேன், துணைத்தலைவர் ஜெகபர் சேக் அலாவுதீன் உள்ளிட்ட நிர்வாகஸ்தர்கள் மற்றும் விழா கமிட்டியாளர்கள் செய்து இருந்தனர்

Saturday, 28 February 2015

கொடிநகர் பள்ளியில் அறிவியல் கண்காட்சி

திருவாரூர் கொடிக்கால் பாளையம் மத்லபுல் கைராத் மழலையர் தொடக்கப்பள்ளியில் தேசிய அறிவியல் தினத்தையொட்டி அறிவியல் கண்காட்சி சனிக்கிழமை 28/2/2015 அன்று பள்ளி வளாகத்தில் நடைபெற்றது.பள்ளியின் தாளாளர் கலிலூர் ரஹ்மான் தலைமை வகித்தார் .இதில் ஒய்வு பெற்ற சுங்க துறை துணை கண்கணிப்பாளர் முஹம்மது ஆதம் கண்காட்சியை துவங்கி வைத்தார். இதில் துணைத்தலைவர் ஜலாலுதீன்,பொருளாளர் முஹம்மது அப்துல் காதர்,நிர்வாககுழு உறுப்பினர்கள் அப்துல் பத்தாஹ்,சேக் முஹம்மது ,நிஷாத் அலி ,ஹிதாயத்துல்லாஹ் பள்ளி தலைமையாசிரியை கலையரசி மற்றும் ஆசிரியைகள் மாணவ மாணவிகள் கலந்து கொண்டனர்.
இதில் ரோட்டரி கிளப் ஆப் டேங்க் சிட்டி தலைவர் பாஸ்கரன் பள்ளிக்கு 30 மேசைகளை வழங்கினார்.
இதில் பள்ளி மாணவ மாணவிகளின் அறிவியல் படைப்புகளை பெற்றோர்கள் பொதுமக்கள் ,கொடிக்கால்பாளையம் நகராட்சி துவங்கப்பள்ளி மாணவர்கள் கண்டு பயன் அடைந்தனர்.மேலும் அண்மையில் திருவாரூரில் நடைபெற்ற மாவட்ட மழலையர் மற்றும் தொடக்கப்பள்ளிகள் பங்கேற்ற விளையாட்டு போட்டியில் முதலிடம் பெற்ற மாணவி கள்  சாரா மற்றும் சப்பனா வுக்கு பரிசுகள் வழங்கி ஊக்கப்படுத்தப்பட்டனர்

ரயில்வே பட்ஜெட் ஏமாற்றம் அளிக்கிறது

'

மத்திய ரயில்வே பட்ஜெட்டில் திருவாரூர் - காரைக்குடி அகல ரயில் பாதை அமைக்கும் பணி மற்றும் புதிய ரயில்கள் அறிவிப்பு இல்லாதது திருவாரூர் மக்களிடை யே ஏமாற்றத்தை அளித்துள்ளது.
இதுகுறித்து ரயில் மற்றும் பேருந்து பயணிகள் சங்க மாவட்டத் தலைவர் ஆர். தெட்சிணாமூர்த்தி கூறியது:
மத்திய அரசின் 2015-2016 ஆம் நிதி ஆண்டுக்கான ரயில்வே பட்ஜெட்டை, துறை அமைச்சர் சுரேஷ் பிரபு தாக்கல் செய்தார்.
இதில் திருவாரூர் மாவட்டத்தில் திருவாரூர் - காரைக்குடி அகல ரயில் பாதை அமைக்கும் பணி, திருநெல்வேலி - திருச்சி இன்டர்சிட்டி எக்ஸ்பிரஸ் வேளாங்கண்ணி வரை நீட்டிப்பு, பாலக்காடு - திருச்சி ரயில் நாகூர் வரை நீட்டிப்பு, விழிப்புரம் - மயிலாடுதுறை ரயில் திருவாரூர் வரை நீட்டிப்பு.
மன்னார்குடி - சென்னை மற்றும் சென்னை - திருச்செந்தூர் விரைவு ரயில் திருவாரூர் வழியாக இயக்குவது, மன்னார்குடியிலிருந்து புறப்படும் ரயில்கள் திருவாரூர் வழியாக செல்வது உள்ளிட்டவைகளில் ஏதேனும் அறிவிப்பு வெளியாகலாம் என்று எதிர்பார்த்து இருந்தனர். ஆனால் மக்களின் எதிர்பார்ப்பு ஏமாற்றமளிக்கும் வகையில் ரயில்வே பட்ஜெட்டில் எவ்வித அறிவிப்பும் இல்லையென்பது பெரும் ஏமாற்றத்தை அளித்துள்ளது.
மேலும், மத்திய ரயில்வே பட்ஜெட்டில் திருவாரூர் ரயில் நிலையம் நவீனமயமாக்கப்படும், திருவாரூர் - காரைக்குடி அகல ரயில்பாதை அமைக்கும் பணி, நீடாமங்கலம் ரயில்வே மேம்பாலம் அறிவிப்புகள் வெளியாகும் என்று எதிர்பார்த்திருந்தோம். ஆனால், எவ்வித அறிவிப்பும் இல்லாததது ஏமாற்றத்தை அளிக்கிறது என்றார்.

Friday, 27 February 2015

தபால் நிலையங்களில் அறிமுகம் பெண் குழந்தைகளுக்காக செல்வமகள் சேமிப்பு திட்டம்



திருவாரூர் மாவட்டத்தில் உள்ள அனைத்து தபால் நிலையங்களிலும்  செல்வமகள் சேமிப்பு திட்டம் தொடங்கப்பட்டுள்ளது.


பெண் குழந்தைகளை பாதுகாக்க செல்வமகள் சேமிப்பு திட்டம் என்ற புதிய திட்டத்தை அனைத்து தபால் நிலையங்களிலும் தொடங்க மத்திய அரசு உத்தரவிட்டுள்ளது

இதன்படி இந்த திட்டம் திருவாரூர் மாவட்டத்தில் உள்ள அனைத்து தபால் நிலையங்களிலும் தொடங்கப்பட்டுள்ளது. இந்த திட்டத்தில் 10 வயதுக்குட்பட்ட பெண் குழந்தையின் பெயரில் அவருடையை பெற்றோர் அல்லது சட்டப்பூர்வமான காப்பாளர் கணக்கை தொடங்கலாம்.

ஒரு பெண் குழந்தையின் பெயரில் ஒரு கணக்கு மட்டுமே தொடங்க முடியும். 2 பெண் குழந்தைகள் இருந்தால் பெற்றோர் அல்லது காப்பாளர் ஒரு குழந்தைக்கு ஒரு கணக்கு வீதம் 2 கணக்குகளை தொடங்கலாம். 1 வயது குழந்தைக்கு கணக்கு தொடங்கினால் 10 வயது ஆகும் போது கணக்கு முடிவடையும்.  கணக்கு தொடங்கும் தேதியில் இருந்து குழந்தைக்கு 14 வயது முடிவடையும் வரை கணக்கில் பணம் செலுத்தலாம். அந்த குழந்தைக்கு திருமணம் ஆகும் வரை கணக்கை நீட்டித்து கொள்ளும் வசதி உண்டு.இந்த கணக்கில் ஒரு நிதியாண்டில் குறைந்தபட்சம் ரூ.1000 மற்றும் அதிக பட்சமாக ரூ.1 லட்சம் வரை செலுத்தலாம். குறைந்த பட்சம் ரூ.1000 செலுத்தவில்லை என்றால் குறைந்த பட்ச தொகையுடன் ரூ.50 செலுத்தி புதுப்பித்து கொள்ளலாம்.

பணத்தை ரொக்கமாகவோ காசோலையாகவோ அல்லது வரைவோலையாகவோ செலுத்தலாம். இந்த திட்டத்தில் 9.1 சதிவீதம் வட்டி வழங்கப்படும். வட்டி விகிதத்தை வருடாந்திர அடிப்படையில் மத்திய அரசு அறிவிக்கும். பெண் உயர் கல்விக்காக செலுத்திய தொகையில் 50 சதவீதம் வரையில் எடுத்து கொள்ளலாம். வருமான வரி சட்டம் 1961 பிரிவு 80சி-யின் கீழ் வருமான வரிவிலக்கு பெற தகுதியானது.இவ்வாறு அந்த செய்தி குறிப்பில் கூறப்பட்டுள்ளது.  இந்திய தபால் துறையின் அஞ்சலக ஆயுள் காப்பீட்டு திட்டத்தின் காப்பீட்டு தொகை அதிகபட்சமாக ரூ.20 லட்சமாக இருந்து வந்தது. தற்போது இந்த காப்பீட்டுத்தொகை ரூ.50 லட்சமாக உயர்த்தப்பட்டுள்ளது. இந்த திட்டம் தற்போது அனைத்து தபால் நிலையங்களிலும் நடைமுறைக்கு வந்துள்ளது.

Thursday, 26 February 2015

திருவாரூர் தாசில்தார் அலுவலகத்தில் பொது சேவை மையம் தொடக்கம்


திருவாரூர் வட்டாட்சியர் அலுவலகத்தில் செவ்வாய்க்கிழமை பொது சேவை மையத்தை மாவட்ட ஆட்சியர் எம். மதிவாணன் தொடக்கி வைத்தார்.
இச்சேவை மையத்தின் மூலம் வருமான, இருப்பிட, விதவை, சாதி, முதல் தலைமுறை பட்டதாரி ஆகிய சான்றிதழ்கள், முதலமைச்சரின் பெண் குழந்தைகள் பாதுகாப்பு திட்டம், ஆதரவற்ற விதவை மகள் திருமண நிதியுதவி திட்டம், விதவை மறுமண நிதியுதவி திட் டம், ஏழை பெண் திருமண நிதியுதவி திட்டம், கலப்பு திருமண நிதியுதவி திட்டம், ஆகியவற்றும் விண்ணப்பிக்கலாம். மேலும் மின் கட்டணத்தையும் செலுத்தலாம்.
தவிர மத்திய அரசின் வருமான வரித்துறையால் வழங்கப்படும் பான் கார்டு என்று அழைக்கப்படும் நிரந்தர கணக்கு பெறுவதற்கு விண்ணப்பம் செய்யலாம். ஆதார் அட்டை பெற ஒப்புகை சீட்டு இருந்தால் அதை பயன்படுத்தி பிரிண்ட் எடுத்துக் கொள்ளலாம்.
தேர்தல் ஆணையத்தின் மூலம் வழங்கப்படும் வாக்காளர் அடையாள அட்டையில் திருத்தங்கள் செய்து கொள்ளலாம். பாஸ்போர்ட் பெற அதன் தொடர்பான காவல்துறையின் சான்று பெற விண்ணப்பிக்கலாம். ஆயுள் காப்பீட்டுக் கழகத்தின் தவணைத் தொகையை செலுத்தலாம் என்றார் மதிவாணன்.

பிளஸ் 2 மாணவர்களுக்கு தாற்காலிக மதிப்பெண் சான்றிதழ்


பிளஸ் 2, 10-ஆம் வகுப்பு பொதுத் தேர்வு எழுதும் மாணவர்களுக்கு நிகழாண்டு முதல் தாற்காலிக மதிப்பெண் சான்றிதழ் (புரவிஷனல் சர்ட்டிஃபிகேட்) வழங்கப்பட உள்ளது.
இந்தச் சான்றிதழ் மூலம் மாணவர்கள் பொறியியல், மருத்துவம் உள்ளிட்ட உயர் படிப்புகளுக்கு விண்ணப்பிக்கலாம். இந்த மதிப்பெண் சான்றிதழ் 90 நாள்களுக்கு செல்லத்தக்கதாக இருக்கும் என அதிகாரிகள் தெரிவித்தனர்.
பிளஸ் 2 பொதுத் தேர்வு மார்ச் 5-ஆம் தேதி தொடங்குகிறது. தமிழகம் முழுவதும் இந்தத் தேர்வை 8.43 லட்சம் பேர் எழுதுகின்றனர். 10-ஆம் வகுப்புத் தேர்வு மார்ச் 19-ஆம் தேதி தொடங்குகிறது. இந்தத் தேர்வை 10.72 லட்சம் பேர் எழுதுகின்றனர்.
இந்தத் தேர்வுகள் தொடர்பான ஆய்வுக் கூட்டம் பள்ளிக் கல்வித் துறை அமைச்சர் கே.சி.வீரமணி தலைமையில் சென்னையில் புதன்கிழமை நடைபெற்றது. பள்ளிக் கல்வித் துறைச் செயலாளர் டி.சபிதா, அரசுத் தேர்வுகள் இயக்குநர் கே.தேவராஜன் உள்ளிட்ட அதிகாரிகளும், மாவட்ட முதன்மைக் கல்வி அலுவலர்களும் இதில் பங்கேற்றனர்.
கூட்டத்துக்குப் பிறகு நிருபர்களிடம் பள்ளிக் கல்வித் துறைச் செயலாளர் டி.சபிதா கூறியது:
நிகழாண்டு பிளஸ் 2, 10-ஆம் வகுப்பு மாணவர்களுக்கு தாற்காலிக மதிப்பெண் சான்றிதழ் (புரவிஷனல் சர்ட்டிஃபிகேட்) வழங்கப்பட உள்ளது. மாணவர்களின் புகைப்படம், பதிவு எண், மதிப்பெண் விவரங்கள் இதில் இடம்பெற்றிருக்கும்.
தேர்வு முடிவுகள் அறிவிக்கப்பட்ட ஓரிரு தினங்களில் இந்தச் சான்றிதழை மாணவர்கள் இணையதளத்திலிருந்து பதிவிறக்கம் செய்து கொள்ளலாம். அதன்பிறகு, அந்தந்தப் பள்ளித் தலைமையாசிரியர்களின் சான்றொப்பத்தை மாணவர்கள் பெற வேண்டும்.
தேர்வு முடிவுகள் அறிவிக்கப்பட்டதும், மதிப்பெண் சான்றிதழைப் பிழையின்றி அச்சடிக்க சிறிது கால அவகாசம் தேவைப்படுகிறது. இதன் காரணமாக, உயர் கல்வி பயில விரும்பும் மாணவர்கள் பாதிக்கப்படக் கூடாது என்பதற்காக இந்தத் தாற்காலிக மதிப்பெண் சான்றிதழ் வழங்க முடிவு செய்யப்பட்டுள்ளது. இந்தச் சான்றிதழ் 90 நாள்களுக்கு செல்லத்தக்கதாக இருக்கும் என்றார் அவர்.
மதிப்பெண் சான்றிதழ் எப்போது வழங்கப்படும்? தாற்காலிக மதிப்பெண் சான்றிதழ் வழங்கப்படுவதால், மாணவர்களுக்கான விடைத்தாள் மறுமதிப்பீடு, மறுகூட்டலுக்குப் பிறகே அசல் மதிப்பெண் சான்றிதழ் வழங்கப்படும் என அரசுத் தேர்வுகள் இயக்கக வட்டாரங்கள் தெரிவித்தன. இதன் மூலம், திருத்தங்கள் அதிகமில்லாமல் சரியான தகவல்களுடன் மதிப்பெண் சான்றிதழைத் தர முடியும். தாற்காலிக மதிப்பெண் சான்றிதழில் ஏதேனும் தகவல் பிழைகள் இருந்தால், அவற்றை அசல் மதிப்பெண் சான்றிதழில் மாணவர்கள் திருத்தம் செய்து கொள்ளலாம் என அந்த வட்டாரங்கள் தெரிவித்தன.
புகாருக்கு இடமில்லாமல் நடத்த வேண்டும்: கூட்டத்தில், பொதுத் தேர்வுகளை எந்தவிதப் புகாருக்கும் இடமில்லாமல் நடத்துவது தொடர்பாக பல்வேறு அறிவுரைகள் அதிகாரிகளுக்கு வழங்கப்பட்டன. பள்ளிக் கல்வி இயக்குநர்கள், இணை இயக்குநர்கள் ஆகியோர் அவரவருக்கு ஒதுக்கப்பட்டுள்ள மாவட்டங்களுக்கு முன்கூட்டியே சென்று தேர்வு ஏற்பாடுகளை மேற்பார்வையிட வேண்டும் எனவும் உத்தரவிடப்பட்டது.
வினாத்தாள் கட்டு காப்பு மையங்களுக்கான பாதுகாப்பு, வினாத்தாளை எடுத்துச் செல்லும் வழித்தடங்கள், விடைத்தாள்களை மாவட்டங்களில் உள்ள மையங்களுக்குக் கொண்டு செல்வது, பறக்கும் படைகளை அமைப்பது போன்றவை தொடர்பாகவும் அறிவுரைகள் வழங்கப்பட்டதாக அதிகாரிகள் தெரிவித்தனர்.

Wednesday, 25 February 2015

எல்.கே.ஜி அட்மிஷன் குழப்பங்கள்


ஒவ்வொரு ஆண்டும் ஜனவரி, பிப்ரவரி மாதங்கள் வரும் பொழுதெல்லாம் கூடவே வரத்தொடங்குவது இரண்டரை, மூன்றரை வயதுள்ள குழந்தைகளின் பெற்றோரின் மனதில் ஒரு விதக் குழப்பம், பயம் மற்றும் கவலை. இவை எல்லாம் தம் குழந்தைக்கு ஒரு நல்ல பள்ளியில் ப்ரி.கே.ஜி, எல்.கி.ஜி,யில் அட்மிஷன் கிடைக்க போராட வேண்டியதை நினைத்து ஏற்படும் பதற்றம்தான்.
ஒரு குழந்தையைப் பெற்று எடுப்பதைவிட அக்குழந்தையை ஒரு பள்ளியில் சேர்த்துவிட பெற்றோர்கள் படும் பாடு சொல்லி மாளாது... 2 வயது தொடங்கியதுமே அந்த குழந்தையின் பள்ளி அட்மிஷன் பேச்சு ஒவ்வொரு வீட்டிலும் எழத் தொடங்குவது இயல்பு. பெற்றோர் தவிர, உறவினர்கள், நண்பர்கள் என்று ஆளாளுக்கு கேட்கும் ஒரே கேள்வி, குழந்தையை எந்தப் பள்ளியில் சேர்க்கப்போறீங்க? அங்கு சேர ஆள் பேசி, பணத்தை ரெடி பண்ணிட்டீங்களா? என்றுதான். ஆனால் ஒரு பள்ளியில் அட்மிஷன் கிடைக்க உண்மையில் என்ன தேவை என்பதை பற்றி அறிவது இன்றும் ஒரு புரியாத புதிராகவே உள்ளது.
விண்ணப்ப தேதிக்குக் காத்திருக்கும் பெற்றோர்
ப்ரி.கே.ஜி., எல்.கே.ஜி வகுப்பில் சேர முதல் அடி, அதற்கான விண்ணப்பப் படிவத்தை அந்தந்த பள்ளியில் வாங்கி பூர்த்தி செய்வதுதான். சொல்வதைப் போல் இது சுலபம் இல்லை. தமிழக அரசு பலமுறை குறிப்பிட்ட மாதத்தில் குறிப்பிட்ட தேதிகளில் விண்ணப்பப் படிவம் அளிக்கவேண்டும் என்று பள்ளிகளுக்கு ஆணையிட்டாலும் ஒவ்வொரு பள்ளியும் ஒவ்வொரு நேரத்தில் வெளியிடுவதுதான் வழக்கம். பள்ளியில் விண்ணப்ப தேதியைக் கண்டறிய பெற்றோர்கள் இங்கும் அங்கும் ஓடி தினம் தினம் அறிவிப்புக்காக காத்திருக்க வேண்டியுள்ளது.
சில பள்ளிகள் நேரடியாக விண்ணப்பப் படிவம் கொடுப்பதும், சிலர் ஆன்லைனில் மட்டுமே வெளியிடுவதும் என்றும் வெவ்வேறு முறையைக் கையாளுவதால் பெற்றொர்களின் நிலை திண்டாட்டமே. நேரில் விண்ணப்பங்களை அளிக்கும் பள்ளிகளின் வாசலில் முதல் நாள் இரவிலிருந்து க்யூ கட்டி நிற்கத் தொடங்கும் பெற்றோர்களுக்கு முதல் 100 நபருக்குள் விண்ணப்பப் படிவத்தை வாங்கிவிட்டால் சீட் நிச்சயம் என்ற ஆதங்கமே காரணம். அது மட்டுமின்றி ஆன்லைனில் மட்டுமே விண்ணப்பிக்க முடியும் என்று கட்டுபாடு விதிக்கும சில பள்ளிகளில், கணினி தொடர்பில்லாத பெற்றோர்கள் விண்ணப்பிக்க முடியாமல் தவிக்கின்றனர்.
குழப்பும் பள்ளிகளின் விதிமுறைகள்
முன்பெல்லாம் குழந்தை 4 அல்லது 5 வயது வரும் போது பெற்றோர்கள் வீட்டு அருகில் உள்ள ஒரு பள்ளியில் நிர்ணயிக்கப்பட்ட கட்டணத்தை கட்டி எல்.கே.ஜியில் சேர்த்துவிடுவது வழக்கம். வயது வரம்பு கூட அந்த அளவுக்கு கண்டுகொள்ளப்படாத காலம் அது. ஆனால் இன்றோ ப்ரி.கே.ஜி என்றால் இரண்டரை-யிலிருந்து மூன்றரை வயதுக்குள் இருக்க வேண்டும், எல்.கே.ஜி என்றால் மார்ச் 31-க்குள் 3 வயது நிரம்பியிருக்க வேண்டும் என்று பலப்பல கட்டுபாடுகளை பள்ளிகள் வரையறுத்துள்ளன.
சரி, இது சமவயதுப் பிள்ளைகள் படிக்க நல்ல வழி என்று நினைத்தாலும் அப்படி இல்லை. ஒவ்வொரு பள்ளிக்கும் இப்படி வெவ்வெறு கட்டுப்பாடுகள் வெவ்வேறு வயது வரம்பு நிலவரம். வீட்டு அருகே உள்ள ஒவ்வொரு பள்ளியிலும் தனித்தனியே விசாரித்து அதற்கேற்ப வயது வரம்பில் நம் குழந்தை வந்தால் மட்டுமே அந்த ஆண்டில் பள்ளியில் சேர்க்கமுடியும்.
இதையெல்லாம் அலசி, ஆராய்ந்து, மெட்ரிக் பள்ளியா? அல்லது சி.பீ.எஸ்.ஈ, ஐ.சி.எஸ்.ஈ பள்ளியா? என்று ஒரு முடிவு எடுப்பது இன்றைய காலத்தில் அதைவிட கடினமானது. மெட்ரிக் பள்ளி என்றால் சமச்சீர் கல்வி என்று சில பெற்றோர்களுக்கு அதன் தரத்தில் சந்தேகம் ஏற்படுவதால் சி.பி.எஸ்.ஈ. பள்ளிகளை அதிகம் நாடுகின்றனர். அதனால் அங்கு அட்மிஷனுக்கு கடும் போட்டியே நிலவுகிறது. ஏற்கனவே பள்ளியில் சேர்த்த பெற்றோர்களும் வெளிப்படையாக சீட்டு கிடைத்தன் வழியை சொல்ல தயங்குவதால் அட்மிஷனுக்கு அலையும் ஒவ்வொரு பெற்றோரின் தவிப்பும் அலைச்சலும் அளவுக்கற்றது. ஒரு பள்ளியில் அப்ளிகேஷன் போடுவதற்கு முன்பாகவே நம் சீட்டை உறுதி படுத்திக் கொள்ள முயற்சி எடுத்தால் மட்டுமே குழந்தைகளுக்கு பள்ளியில் இடம் என்ற நிலைமையே இன்று உள்ளது.
சிபாரிசைத் தேடி அலையும் பெற்றோர்கள்
பள்ளியைத் தேர்ந்தெடுத்த அடுத்த நொடி தேடவேண்டியது ஒரு சிபாரிஸை. பள்ளிக்கேற்ப இந்த சிபாரிசு மாறுபடுகிறது. அரசியல்வாதிகள் முதல் தொழிலதிபர்கள், பிரபல பிரமுகர்கள், அரசு உயர் அதிகாரிகள் என்று சிபாரிசு செய்வோரின் பட்டியல் நீண்டுகொண்டே போகிறது. அதிலும் ஒவ்வொரு பள்ளிக்கும் ஒவ்வொரு முறை. பிரபலங்கள் சிபாரிஸை எடுத்து கொள்ளும் சில பள்ளிகள் அரசியல்வாதியின் ரெக்கம்மண்டேஷனை மதிப்பதில்லை.
அதேபோல் சி.பி.எஸ்.இ பள்ளி என்றால் மாநில அரசின் உயர் அதிகாரி சிபாரிசு என்றாலும் மறுத்துவிடுவர். இப்படி வெவ்வேறாக இருக்கும் நிலையில் பெற்றோர் ஒவ்வொருவரும் ஒரு புலனாய்வு அதிகாரியை போலை இங்கும் அங்கும் தேடி, பலரிடம் விசாரித்து, அவமானப்பட்டு சிபாரிசு கடிதத்தை வாங்கி பள்ளியில் கொடுத்து அட்மிஷன் வாங்குகின்றனர் என்பதுதான் நிதர்சனமான உண்மை.
டொனேஷன் இருந்தால் அட்மிஷன் நிச்சயம்
விரல்விட்டு எண்ணக்கூடிய பள்ளிகளை தவிர பெரும்பாலான பள்ளிகள் டொனேஷன் இல்லாமல் எந்த குழந்தையும் சேர்த்துகொள்வதாக தெரியவில்ல. 50 ஆயிரம் முதல் 5 லட்சம் வரை நீடிக்கும் டொனேஷன் நடுத்தர வர்கக பெற்றோர்களுக்கு பெருத்த சுமையை ஏற்படுத்தி கடன் வாங்கும் அளவிற்கு தள்ளிவிடுவது கொடுமை. தன் குழந்தையும் நல்ல ஒரு பள்ளியில் படிக்க வைக்க நினைக்கும் பெற்றோர் அனைவரின் நிலையுமே இதுதான்.
சுமாரான பள்ளியாக இருந்தாலும் சேர்த்துவிட வேண்டும் என்ற இக்கட்டான சூழ்நிலையில் டொனேஷன் தருவதை விட வேறு வழி இல்லை. நேரடியாக டொனேஷனை வாங்க மறுக்கும் பள்ளிகள் இடை தரகர்கள் மூலமே பணத்தை பெற்று அட்மிஷன் தருவது இயல்பாகிவிட்டது. டொனேஷனை தர மறுத்து நியாயம் பேசி காத்திருந்தால் மிஞ்சுவது குழந்தைக்கு பள்ளி இல்லாத நிலை மட்டுமே. பள்ளியில் குலுக்கல் முறையில் அல்லது கணினி மூலம் ராண்டம் செலக்‌ஷன் முறையில் அட்மிஷன் நடப்பதாக கூறுவது பெற்றோரின் கண்துடைப்புக்காகவே சொல்லபடுவது என்பது அனுபவத்தில் நன்கு தெரிந்துவிடும்.
ஆர்.டி.இ. இடங்கள் குளறுபடி
பாரபட்சமின்றி அனைத்து தரப்பு மக்களுக்கும் கல்வி கிடைக்கும் உயரிய நோக்கத்தோடு 2009 ஆண்டு கொண்டுவரப்பட்ட ஆர்.டி.இ அதாவது 'கல்வி உரிமைச் சட்டம்' இன்று அதன் உண்மை பயனை அடைந்ததா? என்றால் அதுவும் கேள்விகுறிதான். ஒவ்வொரு பள்ளியிலும் 25% ஆர்.டி.இ. சீட்டுகளுக்கான இடங்களுக்கு மே மாதம் வரை விண்ணப்பிக்க அவகாசம் தர வேண்டும் என்று பலமுறை அரசு ஆணையிட்டும் பல பள்ளிகள் அதற்கும் முன்பே எல்.கே.ஜி அட்மிஷனை முடித்துவிடுகின்றனர்.
சில பள்ளிகள் தங்கள் இணையதளத்தில் ஆர்.டி.ஈ சீட்டுகான விண்ணப்ப நாட்களை அறிவிக்கின்றனர். இந்த இலவச சட்டத்தை பற்றியே சரவர தெரியாத ஏழை எளிய மக்கள் இணையத்தில் வெளியிடும் தேதிகளை அறிந்து விண்ணபிப்பது என்பது அரிது. கணக்கு காட்டுவதற்கான அறிவிப்பாகவே இதை பலரும் கருதுகின்றனர். சில பள்ளிகளிலோ ஆர்.டி.இ அடிப்படையில் ஏழை குழந்தைகளுக்கு இலவசமாக அனுமதி அளித்துவிட்டு, அந்த இழப்பை சரி செய்ய, மீதி உள்ள இடங்களில் சேர்க்கும் குழந்தைகளின் பெற்றோர்களிடம் 1 முதல் ஒன்றரை லட்சம் வரை நன்கொடை கேட்டு பெற்றுக்கொள்கின்றனர். இது மற்ற பெற்றோர்களின் சுமையை பெருக்கிவிடுவதால் இலவச கல்வி சட்டத்தின் சிறப்பே சிதைந்து விடுகிறது.
மாநில அரசிடம் ஈடு செய்ய வேண்டிய ஆர்.டி.இ-யின் கணக்கை பெற்றோர்களிடம் பறிப்பது நியாயமற்ற செயலாகி விடுகிறது. மொத்ததில் பிள்ளைகளை என்ஜினியரிங், மருத்துவ படிப்பில் சேர்ப்பதை காட்டிலும் எல்,கே.ஜி சீட் வாங்குவது பெற்றோர்களுக்கு ஒரு பெரிய சவால். குழந்தை பிறந்த உடனே பள்ளி அட்மிஷனுக்கு பணம் சேர்க்க தொடங்கினால் மட்டுமே ஒரு நல்ல கல்வியை அவர்களுக்கு அளிக்கமுடியாத நிலை உருவாகிவிட்டது.
அரசு பாடத்திட்டதை ஒரே சீராக மாற்றியதைப் போல அட்மிஷன் முறையையும் சீர்படுத்தி குறிப்பிட்ட விண்ணப்ப தேதிகளில் எல்லாப் பள்ளிகளும் ஒரே விதிமுறைகளை பின்பற்றும்படி வரையறுத்தால் மட்டுமே பிள்ளைகளின் அட்மிஷன் கவலை பெற்றோர்களுக்கு நீங்கும்.
இந்துஜா ரகுநாதன் - தொடர்புக்கு induja.v@gmail.com

வரும் மார்ச் 31 முதல் ஆபாச வீடியோ,புகைப்படங்களுக்குத் தடை விதிக்கும் கூகுள்


இளைஞர்களிடையே நல்ல வரவேற்பை பெற்று வருவது பிளாக்கர். கூகுளுக்கு சொந்தமான இதில் பலர் கதை கவிதை உள்ளிட்ட பல செய்திகளை பதிவேற்றம் செய்து வருகின்றனர். இலவசமாக பயன்படுத்தும் இந்த பிளாக்கரில் பலர் ஆபாச வீடியோ,போட்டோக்களை பதிவிடுகின்றனர். இந்நிலையில்  வரும் மார்ச் 31ம் தேதி முதல் பிளாக்கரில் ஆபாச வீடியோ, புகைப்படங்களை பதிவிட கூகுள் நிறுவனம் தடை விதிக்க முடிவு செய்துள்ளது.
இது குறித்து கூகுள் கூறுகையில், தற்போது இந்த வகையான வலைப்பூக்களை வைத்திருப்பவர்கள் உடனடியாக தங்கள் பிளாக்கரில் ஆபாச தளத்திற்குரிய adult பிரிவை தேர்வு செய்யவேண்டும் என்றும் அவ்வாறு அவர்கள் செய்யவில்லை என்றால் கூகுள் நிறுவனமே செய்துவிடும் என்றும் தெரிவித்துள்ளது.

Tuesday, 24 February 2015

பன்றிக் காய்ச்சலை எதிர்கொள்வது எப்படி?


அரசும் மக்களும் கைகோத்தால் மட்டுமே தொற்றுநோய்களை அடியோடு ஒழிக்க முடியும்
இரண்டு வருடங்களுக்கு முன்பு இந்தியாவின் மத்திய மாநிலங்களில் மக்களை அச்சுறுத்திய பன்றிக் காய்ச்சல், இப்போது மீண்டும் வந்து மிரள வைத்துக் கொண்டிருக்கிறது. ராஜஸ்தான், குஜராத், ஆந்திரம், தெலங்கானா, மகாராஷ்டிரம் என்று கொஞ்சம் கொஞ்சமாகப் பரவி, தமிழகத்துக்குள்ளும் வந்துவிட்டது.
இதுவரை 700-க்கும் மேற்பட்டவர்கள் இந்தக் காய்ச்சலால் இறந்திருக்கிறார்கள். 12,000-க்கும் மேற்பட்டோர் சிகிச்சை பெற்றுவருகிறார்கள். இத்தனைக்கும் இது ஓர் உயிர்க்கொல்லி நோய் இல்லை. எளிதாகத் தடுத்துவிடக் கூடியதுதான். உயிர் காக்கும் மருத்துவம் பல வழிகளில் முன்னேறிக்கொண்டிருந்தாலும், சுத்தமும் சுகாதாரமும் குறைந்துள்ள இந்தியா போன்ற வளரும் நாடுகளில் பன்றிக் காய்ச்சல், டெங்கு காய்ச்சல் போன்றவை நமக்குச் சவால் விடுவதைத் தவிர்க்க முடியவில்லை. தோற்றுத்தான் போகிறோம். ஊட்டச்சத்துக் குறைபாடும், நோய் எதிர்ப்புச் சக்தியும் குறைந்து காணப்படுகிற நம் சமுதாயத்தில், தொற்றுக் காய்ச்சலால் ஏற்படுகிற உயிர்ப் பலிகளை முழுவதுமாகத் தடுக்க முடியவில்லை. எல்லாவற்றையும்விட முக்கியக் காரணம், நம்மிடம் போதுமான எச்சரிக்கை விழிப்புணர்வு இல்லை. நோயை ஆரம்பத்திலேயே உறுதி செய்யும் பரிசோதனைக்கூடங்கள் மிகவும் குறைவு. இதனால், நோயைக் கணிப்பதற்குள் நோயாளிக்கு மரணம் நெருங்கிவிடுகிறது.
பன்றிக் காய்ச்சல் தோற்றம்
முதன்முதலில் 2009-ல் மெக்சிகோவில் இந்தக் காய்ச்சல் பரவி, லட்சக் கணக்கில் உயிர்ப் பலி வாங்கியது. பன்றியிடம் காணப்பட்ட வைரஸும் மனிதரிடம் காணப்பட்ட வைரஸும் ஒன்றுபோலிருந்த காரணத்தால், இதற்கு ‘பன்றிக் காய்ச்சல்’(Swine Flu) என்று பெயரிட்டார்கள். இது காற்று மூலம் பரவும் தொற்றுநோய். பன்றியிடமிருந்து மனிதருக்குப் பரவுவதில்லை. ‘ஹெச்1என்1 இன்ஃபுளுயென்சா வைரஸ்’ எனும் வைரஸ் கிருமி மனிதரைத் தாக்குவதால் பன்றிக் காய்ச்சல் வருகிறது. மற்ற பருவக் காலங்களைவிட, குளிர்காலத்தில் இந்த வைரஸ் அதிக வீரியத்துடன் மக்களைத் தாக்கும் தன்மையுடையது. தென்னிந்திய மாநிலங்களில் இன்னமும் அதிக அளவில் குளிர் நீடிப்பதால் பன்றிக் காய்ச்சல் பரவ சாதகமாகிவிட்டது.
எப்படிப் பரவும்?
நோயாளி தும்மினாலோ, இருமினாலோ, மூக்கைச் சிந்தினாலோ, சளியைக் காறித் துப்பினாலோ கிருமிகள் சளியுடன் காற்றில் பரவி மற்றவர்களுக்கும் நோயை உண்டாக்கும். நோயாளியின் மூக்கு, வாய் போன்ற பகுதிகளில் வைரஸ் கிருமிகள் ஒட்டிக்கொண்டிருக்கும்.அந்த இடங்களைத் தொட்டுவிட்டு, அதே கைவிரல்களால் அடுத்தவர்களைத் தொட்டால் கிருமிகள் அவர்களுக்கும் பரவிவிடும். நோயாளி பயன்படுத்திய கைக்குட்டை, உடை, உணவுத்தட்டு, போர்வை, துண்டு, சீப்பு, தலையணை, கழிப்பறைக் கருவிகள் போன்றவற்றை மற்றவர்கள் பயன்படுத்தினால் நோய் எளிதாகப் பரவிவிடும். நோயாளி பேசும்போதுகூட நோய்க் கிருமிகள் பரவ வாய்ப்புண்டு. ஆறு அடி தூரத்துக்கு இந்தக் கிருமிகள் பரவக்கூடியவை. ஆகவே, காற்றில் பரவும் மற்ற தொற்றுநோய்களைப் போல் மிக நெருக்கத்தில் உள்ளவர்களுக்கு மட்டுமே இது பரவும் என்று அலட்சியமாக இருக்க முடியாது. இந்தக் காய்ச்சல் மக்களிடம் வேகமாகப் பரவுவதற்கு இதுவும் ஒரு காரணம்.
மூன்று வகை நோயாளிகள்
சாதாரண ஃபுளு காய்ச்சலைச் சேர்ந்ததுதான் பன்றிக் காய்ச்சல். இதன் அறிகுறிகளை வைத்து நோயாளிகளை மூன்று வகைப்படுத்துகிறார்கள் மருத்துவர்கள். முதல் வகையில் மிதமான காய்ச்சல், இருமல், தும்மல், மூக்கு ஒழுகுதல், தொண்டைவலி, உடல்வலி, தலைவலி, குமட்டல், வாந்தி, வயிற்றுப்போக்கு போன்ற அறிகுறிகள் தெரியும். இவர்களுக்குப் பாதிப்பு அதிகமாக இருக்காது. எனவே, ரத்தப் பரிசோதனை தேவையில்லை. வீட்டில் இருந்தபடியே சிகிச்சை எடுத்துக்கொள்ளலாம். ஒரு வாரத்தில் நோய் கட்டுப்பட்டுவிடும். இரண்டாம் வகையில், இந்த அறிகுறிகளுடன் காய்ச்சல் கடுமையாக இருக்கும். மூட்டுகளில் வலி அதிகமாக இருக்கும். சோர்வு கடுமையாகும். இவர்களுக்கு ரத்தப் பரிசோதனை அவசியம். காய்ச்சலைக் குறைக்க ‘டாமிஃபுளு’ மாத்திரைகளைச் சாப்பிட வேண்டும். மூன்றாம் வகையில், மேற்சொன்ன அறிகுறிகளுடன் மயக்கம், மூச்சு விடுவதில் சிரமம், சளியில் ரத்தம், நெஞ்சுவலி போன்ற தொல்லைகளும் சேர்ந்துகொள்ளும். இவர்கள் மருத்துவமனையில் அனுமதிக்கப்பட்டு சிகிச்சை பெற வேண்டியது அவசியம். இவர்களுக்கு ‘டாமிஃபுளு’ மாத்தி ரைகளுடன் உயிர்காக்கும் சிகிச்சைகளும் தேவைப்படும்.
யாருக்குப் பாதிப்பு அதிகம்?
பன்றிக் காய்ச்சல் வந்துவிட்டவர்கள் அனைவரும் அச்சப்படத் தேவையில்லை. ஐந்து வயதுக்கு உட்பட்ட குழந்தைகள், நோய் எதிர்ப்புச் சக்தி குறைந்தவர்கள், ஊட்டச்சத்து குறைந்தவர்கள், முறையாகத் தடுப்பூசி போட்டுக்கொள்ளாதவர்கள், முதியவர்கள், கர்ப்பிணிகள், ஆஸ்துமா, காசநோய், சிறுநீரக நோய், சர்க்கரை நோய், கல்லீரல் நோய், இதயநோய், புற்றுநோய், எய்ட்ஸ் உள்ளவர்கள் ஆகியோரை இந்த நோய் மிகச் சுலபத்தில் பாதித்துவிடுகிறது. இவர்கள்தான் மிகவும் எச்சரிக்கையாக இருக்க வேண்டும்.
தடுப்பது எப்படி?
இருமும்போதும் தும்மும்போதும் மூக்கையும் வாயையும் சுத்தமான கைக்குட்டையால் மூடிக்கொள்ள வேண்டும். கைகளை அடிக்கடி சோப்புப்போட்டுத் தண்ணீரில் கழுவ வேண்டும். கண்ட இடங்களில் எச்சிலைத் துப்புவதும் சளியைச் சிந்துவதும் கூடாது.கைகுலுக்காதீர்கள். பொதுஇடங்களுக்குச் சென்று திரும்பினால், வெதுவெதுப்பான தண்ணீரில் உப்பு கலந்து கொப்பளித்து, தொண்டையைச் சுத்தம் செய்யுங்கள். முகத்தையும் கண்களையும் சோப்புப்போட்டுக் கழுவி சுத்தம் பேணுங்கள். வெளியில் செல்லும்போது முகமூடி அணிவதாக இருந்தால், மூன்றடுக்கு முகமூடி அல்லது N95 ரக முகமூடியை அணியுங்கள். சுய மருத்துவம் வேண்டாம். காய்ச்சல், சளி உள்ள குழந்தைகளைப் பள்ளிக்கு அனுப்ப வேண்டாம்.
ஃபுளு காய்ச்சலைத் தடுக்க உதவுகின்ற ‘வீரியம் குறைக்கப்பட்ட நுண்ணுயிரி மூவகைத் தடுப்பூசி’யை (Trivalent inactivated vaccine - TIV) மழைக்காலம் தொடங்குவதற்கு முன்னால் போட்டுக்கொள்ளலாம். இது ஓராண்டுக்கு நோயைத் தடுக்கும். எனவே, வருடாவருடம் இந்தத் தடுப்பூசியைப் போட்டுக்கொள்கிறவர்களுக்குப் பன்றிக் காய்ச்சல் எப்போதும் வராது.
அரசின் கடமை
இந்தியாவில் பன்றிக் காய்ச்சல் இப்போது ஆண்டுதோறும் குளிர்காலத்தில் பரவுகிற பருவக் காய்ச்சலாக மாறிவருகிறது. நடைமுறையில், நோய் பரவி இறப்போர் எண்ணிக்கை அதிகமாகும்போதுதான் மாநிலஅரசும் மத்தியப் பொதுசுகாதாரத் துறையும் களத்தில் இறங்குகின்றன. பன்றிக் காய்ச்சலைக் குணப்படுத்துவதில் மாத்திரை, மருந்துகளைவிடவும் மிக முக்கியமானது நோய்த்தடுப்பு. பன்றிக் காய்ச்சலுக்குரிய கிருமிகளின் தன்மையைத் தொடர்ந்து கண்காணிப்பதும், நோய் பரவ வாய்ப்புள்ள மழைக்காலத்துக்கு முன்பே அதற்கான முன்னெச்சரிக்கை நடவடிக்கைகளை மேற்கொண்டு மக்களை உஷார்படுத்துவதும் நோய் தொடங்கிய பகுதிகளில் சிறப்பு முகாம்களை ஏற்படுத்துவதும் இந்தக் கொள்ளைநோயால் ஏற்படும் இறப்புகளைத் தடுக்க சரியான வழி. தவிர, இந்தக் காய்ச்சலை உறுதிசெய்யும் ரத்தப் பரிசோதனை வசதியை அனைத்து அரசு மருத்துவமனை மற்றும் ஆரம்ப சுகாதார நிலையங்களில் கட்டாயமாக்கிவிட்டால், பன்றிக் காய்ச்சலால் பாதிக்கப்பட்டவர்களை உடனடியாக சிறப்பு மருத்துவமனைக்கு அனுப்பி உயிரைக் காப்பாற்ற முடியும்.
பன்றிக் காய்ச்சலுக்குரிய தடுப்பூசி இப்போது வெளிநாட்டிலிருந்து இறக்குமதி செய்யப்படுவதால், அதன் விலை 500-லிருந்து 1,000 ரூபாய் வரை இருக்கிறது. இதனால், இதை மருத்துவத் துறை சார்ந்த பணியாளர்களுக்கு மட்டுமே போடுகிறார்கள்.இதையே உள்நாட்டில் தயாரித்தால் இதன் விலை 100 ரூபாய்க்குத் தர முடியும். அப்போது பொதுமக்களுக்கும் அதைப் போட முடியும். இதற்கு மத்திய அரசு ஏற்பாடு செய்ய வேண்டும். மக்களைப் பொறுத்தவரை பொது சுத்தம் மிக முக்கியம்.