Wednesday, 12 October 2016

நாகை, திருவாரூர், தஞ்சாவூர் மாவட்டங்களில் மத்தியக் குழு ஆய்வு

காவிரி நீர் பிரச்னை தொடர்பாக உச்ச நீதிமன்ற உத்தரவுப்படி அமைக்கப்பட்ட மத்திய தொழில்நுட்பக் குழுவினர் நாகை, திருவாரூர், தஞ்சாவூர் ஆகிய மாவட்டங்களில் ஆய்வு மேற்கொண்டனர்.
இந்த ஆய்வின் போது, காவிரி நீரில் தமிழகத்தின் உரிமையை உறுதி செய்ய விவசாயிகள் கோரிக்கை விடுத்தனர்.
மத்திய நீர் வள ஆணையத் தலைவர் ஜி.எஸ். ஜா தலைமையில், ஆணைய உறுப்பினர் மசூத் உசேன், கிருஷ்ணா- கோதாவரி அமைப்பு தலைமைப் பொறியாளர் ஆர்.கே. குப்தா ஆகியோரடங்கிய மத்தியக் குழுவினர், திங்கள்கிழமை பிற்பகல் நாகை மாவட்டம், கருங்கண்ணி, கிள்ளுக்குடி ஆகிய பகுதிகளில் வேளாண் விளை நிலங்களைப் பார்வையிட்டு ஆய்வு செய்து, விவசாயிகளைச் சந்தித்தனர்.
தமிழக வேளாண் துறை அமைச்சர் இரா. துரைக்கண்ணு, வருவாய் நிர்வாக ஆணையர் சத்யகோபால், வேளாண் உற்பத்தி ஆணையர் ககன்தீப்சிங் பேடி, பொதுப் பணித் துறை அரசு செயலாளர் பிரபாகரன், வேளாண் இயக்குநர் தெட்சிணாமூர்த்தி, நாகை மாவட்ட ஆட்சியர் சு. பழனிசாமி, நாகை தொகுதி மக்களவை உறுப்பினர் கே. கோபால், ஆகியோர் கடைமடை பகுதி வேளாண் பணிகள் எதிர்கொண்டுள்ள சவால்களை குழுவினரிடம் விளக்கினர்.
தமிழகத்தில் முப்போகம் சாகுபடி நடைபெற்று வந்த நிலையில், காவிரி நீர் பிரச்னை தொடங்கியதிலிருந்து 2 போக சாகுபடியாகக் குறைந்தது. தற்போது, கர்நாடக அரசு கடைப்பிடிக்கும் பிடிவாதம் காரணமாக, காவிரி கடைமடை பகுதிகளில் ஒரு போக சாகுபடி கூட உறுதியற்ற நிலைக்கு உள்ளாகியுள்ளது.
தற்போதைய நிலையில், வரும் 110 நாள்களுக்குத் தொடர்ந்து காவிரி நீர் கிடைக்காவிட்டால், நிகழாண்டும் சம்பா நெல் சாகுபடி பணிகள் பெரும் நஷ்டத்துக்குள்ளாக நேரிடும் என அரசியல் கட்சிகளின் நிர்வாகிகள், விவசாய சங்கங்களின் பிரதிநிதிகள், முன்னோடி விவசாயிகள் தெரிவித்தனர்.

திருவாரூர் மாவட்டத்தில்... மத்திய உயர்நிலைத் தொழில்நுட்பக் குழுவினர் திங்கள்கிழமை திருவாரூர் மாவட்டத்தில் ஆய்வு மேற்கொண்டனர். திருவாரூர் மாவட்டம், பெருகவாழ்ந்தானில் நேரடி விதைப்பு செய்து தண்ணீரின்றி காயும் நிலங்களை குழுவினர் பார்வையிட்டனர். பின்னர் அவர்கள் அங்கிருந்த விவசாய சங்கப் பிரதிநிதிகள் மற்றும் விவசாயிகளிடம் தற்போதைய சாகுபடி நிலவரம் குறித்து கேட்டறிந்தனர்.
டெல்டா மாவட்டங்களில் சம்பா சாகுபடியை காப்பாற்ற உடனடியாக 25 டி.எம்.சி. தண்ணீர் கர்நாடகத்திடமிருந்து பெற மத்திய உயர்நிலைத் தொழில்நுட்பக் குழு பரிந்துரைக்க வேண்டும். அத்துடன், டிசம்பர் மாதவாக்கில் சம்பா சாகுபடிக்கென காவிரியில் தண்ணீர் பெறவும் வழிவகை செய்ய வேண்டும். ஆண்டுதோறும் கர்நாடகத்திலிருந்து தமிழகத்துக்குரிய தண்ணீரை பெறுவதற்கு நடத்தப்படும் போராட்டங்களுக்கு முற்றுப்புள்ளி வைத்து தமிழக விவசாயிகளின் வாழ்வாதாரத்தையும், தமிழக மக்களின் குடிநீர் தட்டுப்பாட்டையும் போக்கும் வகையில் மத்தியக் குழுவினர் எங்களின் நிலைப்பாட்டை நீதிமன்றத்துக்கு தெரிவிக்க வேண்டும் என விவசாயிகள் தெரிவித்தனர்.

Tuesday, 11 October 2016

அக்.12-ம் தேதி மொகரம்: தமிழ்நாடு தலைமை காஜி அறிவிப்பு

தமிழ்நாட்டில் அக்டோபர் 12-ம் தேதி மொகரம் கடைப்பிடிக்கப்படும் என மாநில தலைமை காஜி சலாஹுதீன் முஹம்மது அய்யூப் அறிவித்துள்ளார்.
கர்பாலா போரில் முகம்மது நபியின் பேரனான ஹுசைன் இப்னு அலி கொல்லப்பட்டதை நினைவுகூர்ந்து ஷியா பிரிவு முஸ்லிம்களால் துக்க தினமாக மொகரம் அனுசரிக்கப்படுகிறது.
அதேவேளையில், ஷியா முஸ்லிம்கள் தவிர்ந்த ஏனைய இஸ்லாமியர், மொகரம் மாதத்தின் பத்தாவது நாளில் நோன்பிருந்து, தன்னைத்தானே கடவுள் என்று பிரகடணப்படுத்திய  ஃபிர்அவ்ன் என்ற மன்னன் மற்றும் படைகளை கடலில் மூழ்கடித்து மூஸா நபியை காப்பாற்றியதற்காக, அல்லாஹ்விற்கு நன்றி செலுத்தி வருகின்றனர்.
இந்த மொகரம் பிறையின் பத்தாவதுநாள் உலகம் முழுவதும் வாழும் இஸ்லாமியர்களால் மக்களால் கடைபிடிக்கப்பட்டு வருகிறது.
இந்நிலையில், இந்த ஆண்டின் மொகரம் நாள் வரும் 12-ம் தேதி கடைப்பிடிக்கப்படும் என தமிழ்நாடு தலைமை காஜி சலாஹுதீன் முஹம்மது அய்யூப் இன்று அறிவித்துள்ளார்.

நமதூர் மௌத் அறிவிப்பு 10/10/2016

இன்னாலில்லாஹி வ இன்னஇலைஹி ராஜிஊன்

நமதூர் தெற்கு தெரு நரியும் வீட்டு முஹம்மது பாஸ் அவர்களின் மனைவி பேபி என்கிற ரஹ்மத் கனி அவர்கள் மௌத் .
 

Monday, 10 October 2016

பிரதமர் அலுவலகத்திற்கு கடந்த 20 மாதங்களில் 10 லட்சம் மனுக்கள் பெறப்பட்டுள்ளது தகவல் அறியும் உரிமை சட்டத்தின் மூலம் தகவல்

பிரதமர் அலுவலகத்திற்கு கடந்த 20 மாதங்களில் 10 லட்சம் மனுக்கள் பெறப்பட்டுள்ளதாகவும், தினமும் 1,500 மனுக்கள் வருவதாகவும் தகவல் அறியும் உரிமை சட்டத்தின் மூலம் பிரதமர் அலுவலகம் தெரிவித்துள்ளது.

குர்கானை சேர்ந்த அசீம் தக்யார் என்பவர் தகவல் உரிமை சட்டத்தின்கீழ் பிரதமர் அலுவலகத்திற்கு தினமும் எத்தனை மனுக்கள் வருகிறது. பாஜக ஆட்சிக்கு வந்த பின் மனுக்களின் எண்ணிக்கை குறித்து தகவல் அளிக்குமாறு தகவல் உரிமை சட்டத்தின் மூலம் பிரதமர் அலுவலகத்திற்கு கேட்டு இருந்தார்.

அவரின் கேள்விகளுக்கு பிரதமர் அலுவலகம் பதில் அளித்துள்ளது.

இது குறித்து விவரம் வருமாறு:

கடந்த 2014-ம் ஆண்டு ஜூன் மாதம் 1-ம் தேதி முதல் ஜனவரி 31, 2016 ம் ஆண்டு வரை 10 லட்சம் மனுக்கள் வந்துள்ளது. கடந்த 20 மாதங்களில் ஒரு நாளைக்கு சராசரியாக 1,500 மனுக்கள் பிரதமர் அலுவலகத்திற்கு வந்துள்ளது.  மேலும் பிரதமர் அலுவலகத்துக்கென பயன்படுத்தப்படும் சிலிண்டர்களின்  எண்ணிக்கை, காய்கறிகளுக்கான செலவு விபரம், தொலைபேசி, இணையதள பயன்பாடு, பிரதமர் நரேந்திர மோடியின் பணி, அவரை சந்திக்க வருவோர் உள்ளிட்ட  விவரங்களை கேட்டு மனுக்கள் வந்துள்ளன.

Sunday, 9 October 2016

வடகிழக்கு பருவமழை: அக்.20-இல் தொடங்க வாய்ப்பு


வடகிழக்கு பருவமழை வரும் 20 -ஆம் தேதி தொடங்க வாய்ப்புள்ளது என்று சென்னை வானிலை ஆய்வு மையம் தெரிவித்துள்ளது.
தென்மேற்கு பருவமழைக் காலம் ஜூன் மாதம் முதல் செப்டம்பர் மாதம் வரையாகும். இந்த ஆண்டைப் பொருத்தவரை தென்மேற்கு பருவமழையானது தென் மாநிலங்களை காட்டிலும் வட மாநிலங்களில் அதிக அளவு பெய்துள்ளது.
தமிழகத்தைப் பொருத்தவரை மேற்கு தொடர்ச்சி மலைப்பகுதியில் உள்ள நீலகிரி, தேனி, திருநெல்வேலி, கன்னியாகுமரி உள்ளிட்ட மாவட்டங்களில் தென்மேற்கு பருவமழை பெய்துள்ளது.
செப்டம்பர் மாதத்தில் இருந்து படிப்படியாகக் குறையத் தொடங்கி, அக்டோபர் மாதத்தில் தென்மேற்கு பருவமழை காலம் முடிவடையும். அதன்பின்பு வடகிழக்கு பருவமழை தொடங்கும் என்று வானிலை ஆய்வு மைய அதிகாரிகள் தெரிவித்தனர்.
இதுதொடர்பாக அவர்கள் மேலும் கூறியது:
வடகிழக்கு பருவமழையானது பொதுவாக அக்டோபர் 20 -ஆம் தேதி தொடங்கும். இந்தத் தேதிக்கு 7 நாள்கள் முன்பாகவோ, 7 நாள்கள் பின்பாகவோ மழை தொடங்கலாம். ஒன்று அல்லது இரண்டு காரணிகளைக் கொண்டு, வடகிழக்கு பருவமழை தொடங்குவதை துல்லியமாகக் கணிக்க இயலாது.
பருவமழையின்போது இந்த ஆண்டு 2 அல்லது 3 புயல்கள் வங்கக் கடலில் உருவாக வாய்ப்புள்ளது. ஆனால் அந்தப் புயலானது இந்திய கடலோரங்களை குறிப்பாக தமிழகத்தை தாக்குமா என்பதைப் பொறுத்திருந்துதான் பார்க்க வேண்டும். புயல் தொடர்பான கணிப்புகளை, அது உருவாகும் 10 நாள்களுக்கு முன்புதான் துல்லியமாக அறிந்து கொள்ள முடியும்.
தமிழகத்தின் ஒட்டுமொத்த மழைப்பொழிவில் 50 சதவீதம் வடகிழக்கு பருவமழையின் மூலம் தான் கிடைக்கும். இந்த ஆண்டு பருவமழைக் காலத்தில் 3 மாதத்தில் 40 செ.மீ. மழை பெய்ய வாய்ப்புள்ளது என்று அதிகாரிகள் தெரிவிக்கின்றனர்.

Saturday, 8 October 2016

பெற்றோரிடம் இருந்து பிரிக்க முயலும் மனைவியை விவாகரத்து செய்யலாம்: உச்ச நீதிமன்றம்

பெற்றோரிடம் இருந்து தன்னைப் பிரிக்க முயலும் மனைவியை விவாகரத்து செய்ய சட்டத்தில் இடமுண்டு என்று உச்ச நீதிமன்றம் தெரிவித்துள்ளது.

கர்நாடக மாநிலத்தில் பெற்றோரிடம் இருந்து பிரிந்து தனிக்குடித்தனத்துக்கு மனைவி வற்புறுத்துவதாக பெங்களூரு குடும்ப நீதிமன்றத்தில், கணவர் விவாகரத்து கோரியதன்பேரில் அத்தம்பதிக்கு 2001-ஆம் ஆண்டில் அந்நீதிமன்றம் விவாகரத்து வழங்கியது.

இதனை எதிர்த்து மனைவி கர்நாடக உயர் நீதிமன்றத்தில் மேல்முறையீடு செய்ததை அடுத்து, குடும்ப நீதிமன்றம் அளித்த தீர்ப்பு தள்ளுபடி செய்யப்பட்டது.
இதைத் தொடர்ந்து உச்ச நீதிமன்றத்தில் கணவர் மேல்முறையீடு செய்தார்.

அந்த வழக்கு, உச்ச நீதிமன்ற நீதிபதிகள் அனில் ஆர். தவே மற்றும் எல். நாகேஸ்வரராவ் ஆகியோர் அடங்கிய அமர்வு முன்னிலையில் வெள்ளிக்கிழமை விசாரணைக்கு வந்தது.

அப்போது நீதிபதிகள் கூறியதாவது:

பெற்றோரால் வளர்க்கப்பட்டு, கல்வி பெறப்பட்ட மகனுக்கு, திருமணத்துக்குப் பிறகும், அவர்களை பேணிக் காப்பதற்கு தார்மிக ரீதியாகவும், சட்ட ரீதியாகவும் கடமை உள்ளது. இது ஹிந்து மத தர்மமும்கூட. மேலும் பொருளாதார ரீதியாக மகனைச் சார்ந்திருக்கும் பெற்றோரிடம் இருந்து பிரித்து தனிக்குடித்தனம் செய்ய மனைவி அழைப்பதை எந்த மகனாலும் பொறுத்துக் கொள்ள முடியாது.

அவ்வாறு வலுக்கட்டாயமாக பிரிக்க முயலுவது கணவனுக்கு பெரும் தொந்தரவாகவே இருக்கும். மேலும் வாழ்க்கையில் நிம்மதியும் கிடைக்காது. எங்களைப் பொருத்தவரை, கீழமை நீதிமன்றம் அளித்தத் தீர்ப்பு சரியே.

இந்த வழக்கில் பெற்றோரிடம் இருந்து பிரிந்து செல்வதற்கு ஏற்றுக் கொள்ளக் கூடிய காரணங்கள் ஏதும் இல்லை என்பதாலும், மகன் என்ற ரீதியிலான கடமையை செய்வதிலிருந்து விலக கட்டாயப்படுத்துவதாலும் மனுதாரர் தன் மனைவியை விவாகரத்து செய்ய சட்டத்தில் இடமுண்டு என்று தீர்ப்பளித்தனர்.

Friday, 7 October 2016

இந்தியாவில் முதன்முறையாக கொடைக்கானலில் ‘ஸ்கை வாக்’அமைக்க முடிவு

சுற்றுலாப் பயணிகளைக் கவரும் வகையில் இந்தியாவில் முதன்முறையாக கொடைக்கானல் மலைப் பகுதியில் ‘ஸ்கை வாக்’ அமைக்கப்பட உள்ளது. இதற்கான ஏற்பாடுகளை வனத்துறையினர் மேற்கொண்டுள்ளனர்.
திண்டுக்கல் மாவட்டம் கொடைக்கானல், மலைகளின் இளவரசி என அழைக்கப்படுகிறது. கொடைக்கானலில் 12 மைல் சுற்றுச் சாலையில் உள்ள சுற்றுலாத் தலங்களான மோயர் பாய்ன்ட், பைன் பாரஸ்ட், தூண்பாறை, பசுமை பள்ளத்தாக்கு என வரிசை யாக அமைந்து இயற்கையை ரசிக்க ஏற்றவையாக உள்ளன. இவற்றையும் கடந்து பிரை யண்ட் பூங்கா, ஏரியில் படகு சவாரி ஆகியவை உள்ளன.
சுற்றுலாப் பயணிகளை மகிழ்விக்க சுற்றுலாத்துறை மற்றும் வனத்துறை ஆகியவை பல திட்டங்களை செயல்படுத்தி வருகின்றன. இதன் ஒரு பகுதியாக கொடைக்கானல் மலைப் பகுதியில் டால்பின்நோஸ் என்ற இடத்தில் ‘ஸ்கை வாக்’ திட்டத்தை வனத்துறை செயல்படுத்த உள்ளது.
மலைப் பகுதியில் உள்ள பள்ளத்தாக்கில் கண்ணாடி பாலம் அமைத்து சுற்றிலும் பாதுகாப்பாக கம்பிகள் அமைத்து சுற்றுலாப் பயணிகள் சிறிது தூரம் நடந்து செல்லும் வகையில் ஏற்படுத்துவதுதான் ‘ஸ்கை வாக்’. இதில் நடக்கும்போது சுற்றுலாப் பயணிகளுக்கு ‘த்ரில்’ அனுபவம் ஏற்படும். காரணம், கண்ணாடி பாலத்தின் மீது நடக்கும்போது கீழே பார்த்தால் அதளபாதளமாக பள்ளத்தாக்கு தெரியும். இதனால் நாம் கண்ணாடி மேல் நடந்தாலும் ஒருவித அச்ச உணர்வு நமக்கு ஏற்படும்.
இந்த சுற்றுலாத் தலங்கள் வெளிநாடுகளில் மலைப் பகுதி களில் மட்டுமே உள்ளன. இந்தியாவில் முதன்முறையாக கொடைக்கானலில் ‘ஸ்கை வாக்’ சுற்றுலா அறிமுகப்படுத்தப்பட உள்ளது. இதற்கான முயற்சியில் வனத்துறையினர் ஈடுபட்டு வருகின்றனர்.
இதுகுறித்து கொடைக்கானல் வனத்துறை அலுவலர் ஒருவர் கூறும்போது, “சுற்றுலாப் பயணிகளை கவர ‘ஸ்கை வாக்’ அமைப்பது குறித்து திட்டங்கள் தயாரித்துள்ளோம். இதை அமைப்பதற்கு நிதி எவ்வளவு செலவாகும் என்பது குறித்து பரிசீலித்து வருகிறோம். இத்திட்டத்தை தனியார் நிதியுதவியுடன் செயல்படுத்தவும் திட்டம் உள்ளது. இதற்கான திட்ட அறிக்கை விரைவில் அரசிடம் சமர்ப்பிக்கப்பட உள்ளது. அரசு அனுமதி கிடைத்தவுடன் ‘ஸ்கை வாக்’ அமைக்கும் பணிகள் வெளிநாட்டு நிறுவன உதவியுடன் தொடங்கும்” என்றார்.

Thursday, 6 October 2016

இந்திய அஞ்சல் துறை வங்கியில் 1060 மேலாளர் பணி

இந்திய அஞ்சல் பண அளிப்பு வங்கியில் (IPPB) நிரப்பப்பட உள்ள 1060 மேலாளர், மூத்த மேலாளர் பணியிடங்களுக்கான அறிவிப்பு வெளியிட்டுள்ளது. இதற்கு தகுதியும் விருப்பமும் உள்ளவர்களிடமிருந்து ஆன்லைன் மூலம் விண்ணப்பங்கள் வரவேற்கப்படுகின்றன.
பதவி: Manager, Senior Manager
காலியிடங்கள்:  1060
பதவி: Senior Manager (Branch) - 350
பதவி: Manager (Area Sales) - 250
பதவி: Manager (Area Operations) - 350
பதவி: Senior Manager (Sales Operation) - 02
பதவி: Senior Manager (UI/ UX) - 01
பதவி: Senior Manager (Retail Products) - 03
பதவி: Senior Manager (Merchant Products) - 02
பதவி: Senior Manager (Government Products) - 02
பதவி: Manager (Product Research) - 01
பதவி: Manager (User Experience UX) - 02
பதவி: Manager (User Interface UI) - 02
பதவி: Senior Manager (Digital Marketing) - 01
பதவி: Senior Manager (Branding & Marketing) - 01
பதவி: Senior Manager (Financial Planning & Budgeting) - 01
பதவி: Manager (Account Payable) - 01
பதவி: Manager (Taxation) - 01
பதவி: Manager (Procurement) - 01
பதவி: Manager (Treasury Settlements & Reconciliation) - 01
பதவி: Manager (Program Management Office) - 01
பதவி: Senior Manager (Training) - 01
பதவி: Senior Manager (HR Generalist Manpower Planning & Recruitment, Performance Management System) - 02
பதவி: Manager (Training) - 01
பதவி: Manager (HR Generalist Manpower Planning & Recruitment, Performance Management System) - 02
பதவி: Manager (Corporate HR & Administration) - 01
பதவி: Manager (Branch HR & Administration) - 04
பதவி: Manager (Administration) - 01
பதவி: Manager (Hindi Cell) - 01
பதவி: Senior Manager (Risk & Concurrent Audit) - 02
பதவி: Manager (Risk & Concurrent Audit) - 02
பதவி: Senior Manager (Fraud Control Operations) - 04
பதவி: Senior Manager (Customer Service) - 04
பதவி: Senior Manager (Call Centre) - 01
பதவி: Senior Manager (Branch Operations) - 04
பதவி: Senior Manager (Cheque Truncation System) - 03
பதவி: Senior Manager (Reconciliation) - 03
பதவி: Manager (Customer Acquisition Support) - 16
பதவி: Manager (Vendor Performance Management) - 03
பதவி: Senior Manager (Compliance Support & Reporting) - 02
பதவி: Manager (Compliance Support & Reporting) - 02
பதவி: Manager (Operational Risk) - 06
பதவி: Manager (Legal) -01
பதவி: Senior Manager (System/ Database Administration) - 05
பதவி: Senior Manager (Security Administration) - 05
பதவி: Senior Manager (Network/ Infrastructure Administration) - 05
பதவி: Senior Manager (IT Project Management) - 03
பதவி: Manager (Vendor Management - Hardware/ Software/ Services) - 02
பதவி: Manager (Digital Technology Innovation) - 01
தகுதி: ஒவ்வொரு பிரிவுக்கும் தனித்தனியான தகுதிகளும், அனுபவமும் அறிவிக்கப்பட்டுள்ளதால் அதிகாரப்பூர்வ இணையதளத்தை பார்த்து தெரிந்துகொள்ளவும்.
வயதுவரம்பு: 01.09.2016 தேதியின்படி 35க்குள் இருக்க வேண்டும்.
சம்பளம்:  MMGS-III பிரிவுக்கு மாதம் ரூ.42,020-51,490 106,000
MMGS-II  பிரிவுக்கு மாதம் ரூ.31,705-45,950 83,000
தேர்வு செய்யப்படும் முறை: ஆன்லைன் எழுத்துத்தேர்வு, குழு விவாதம் மற்றும் நேர்முகத் தேர்வின் அடிப்படையில் தகுதியானவர்கள் தேர்வு செய்யப்படுவார்கள்.
விண்ணப்பக் கட்டணம்: பொது மற்றும் ஓபிசி பிரிவினருக்கு ரூ.700, மற்ற பிரிவினருக்கு ரூ.150.
விண்ணப்பிக்கும் முறை: http://www.indiapost.gov.in என்ற இணையதளத்தின் மூலம் ஆன்லைனில் விண்ணப்பிக்க வேண்டும்.
ஆன்லைனில் விண்ணப்பிப்பதற்கான கடைசி தேதி: 01.11.2016
எழுத்துத் தேர்வு: டிசம்பர் 2016
மேலும் முழுமையான விவரங்கள் அறியhttps://www.indiapost.gov.in/Financial/DOP_PDFFiles/20160929_1220%20hrs_Detailed%20Advertisement%20for%20Scale%20II%20%20III.pdfஎன்ற இணையதளத்தை பார்த்து தெரிந்துகொள்ளவும்.
வெங்கடேசன். ஆர்

Wednesday, 5 October 2016

அப்போலோ மருத்துவமனையில் செயற்கை சுவாசத்துடன் முதல்வர் ஜெயலலிதாவுக்கு தொடர்ந்து சிகிச்சை

அப்போலோ மருத்துவமனையில் அனுமதிக்கப்பட்டுள்ள முதல்வர் ஜெயலலிதாவுக்கு செயற்கை சுவாசத் துடன் தொடர்ந்து சிகிச்சை அளிக்கப் பட்டு வருகிறது.
காய்ச்சல் மற்றும் நீர்ச்சத்து குறை பாடு காரணமாக உடல்நிலை பாதிக்கப்பட்ட முதல்வர் ஜெயலலிதா, கடந்த மாதம் 22-ம் தேதி சென்னை கிரீம்ஸ் சாலையில் உள்ள அப்போலோ மருத்துவமனையில் அனுமதிக்கப்பட் டார். அவருக்கு டாக்டர்கள் குழுவினர் அளித்த தீவிர சிகிச்சையால் காய்ச்சல் குணமானது. அவர் வழக்கமான உணவு களை சாப்பிடுவதாகவும், ஓரிரு நாட்கள் மருத்துவ மனையில் ஓய்வு எடுப்பார் என்றும் மருத்துவமனை நிர்வாகம் தெரிவித்தது.
இதற்கிடையே, முதல் வருக்கு ஏற்பட்ட நோய் தொற்றுக்கும் டாக்டர்கள் தொடர்ந்து சிகிச்சை அளித்து வந்தனர். லண்டன் டாக்டர் ரிச்சர்ட் பீலே கடந்த 30-ம் தேதி அப்போலோ மருத்துவமனைக்கு வந்து முதல்வருக்கு அளிக்கப்பட்டு வரும் சிகிச்சைகள் குறித்து கேட்டறிந்தார்.
இதைத் தொடர்ந்து அப்போலோ மருத்துவமனை நிர்வாகம் நேற்று முன்தினம் வெளியிட்ட செய்தியில், ‘முதல்வருக்கு ஏற்பட்டுள்ள நோய் தொற்றை சரிசெய்வதற்கான மருந் துகள் மற்றும் செயற்கை சுவாச உதவியுடன் சிகிச்சை அளிக்கப்பட்டு வருகிறது’ என தெரிவிக்கப்பட்டி ருந்தது.
இந்நிலையில், அப்போலோ மருத்து வமனை தலைமை இயக்க அதிகாரி சுப்பையா விஸ்வநாதன் நேற்று வெளியிட்ட செய்திக்குறிப்பில், ‘முதல் வரின் உடல்நிலையில் தொடர்ந்து முன்னேற்றம் ஏற்பட்டு வருகிறது. இதுவரை அளிக்கப்பட்டு வந்த சிகிச்சைகள், முதல்வருக்கு தொடர்ந்து அளிக்கப்பட்டு வருகிறது. முதல்வரின் உடல் நலத்தை டாக்டர்கள் குழு வினர் தீவிரமாக கண் காணித்து வருகின்றனர். மேலும் சில நாட்கள் அவர் மருத்துவமனையில் சிகிச்சை பெற அறிவுறுத் தப்பட்டுள்ளது’ என்று தெரி வித்துள்ளார்.

உள்ளாட்சித் தேர்தல் ரத்து: மாநில தேர்தல் ஆணையம் மேல்முறையீடு

தமிழக உள்ளாட்சித் தேர்தல் ரத்து செய்யப்பட்டதை எதிர்த்து மாநில தேர்தல் ஆணையம் சென்னை உயர் நீதிமன்றத்தில் மேல்முறையீட்டு மனு தாக்கல் செய்துள்ளது.
உள்ளாட்சித் தேர்தல் ரத்து செய்யப்பட்டதை எதிர்த்து தமிழக அரசு மேல்முறையீடு செய்ய முடிவெடுத்திருந்தது.
இதையடுத்து, மாநில தேர்தல் ஆணையம் சார்பில் தாக்கல் செய்யப்பட்ட மேல்முறையீட்டு மனு நாளை அல்லது நாளை மறுநாள் விசாரணைக்கு எடுத்துக் கொள்ளப்படும் என்று எதிர்பார்க்கப்படுகிறது.
தமிழக உள்ளாட்சித் தேர்தலில் பழங்குடியினருக்கான இட ஒதுக்கீடு முறையாக பின்பற்றப்படவில்லை என்று கூறி திமுக சார்பில் மனு தாக்கல் செய்யப்பட்டது.
மனுவை விசாரித்த சென்னை உயர் நீதிமன்ற நீதிபதி கிருபாகரன், உள்ளாட்சித் தேர்தலை ரத்து செய்து நேற்று உத்தரவிட்டார்.
இந்த உத்தரவை எதிர்த்து மாநில தேர்தல் ஆணையம் இன்று சென்னை உயர் நீதிமன்றத்தில் மேல்முறையீடு செய்துள்ளது.

Tuesday, 4 October 2016

உள்ளாட்சித் தேர்தல் மனுதாக்கல் நிறைவு: மனுக்கள் மீது இன்று பரிசீலனை

உள்ளாட்சித் தேர்தல் வேட்புமனு தாக்கல் திங்கள்கிழமையுடன் நிறைவடைந்தது. மனுக்கள் மீதான பரிசீலனை செவ்வாய்க்கிழமை நடைபெறுகிறது.
தமிழகத்தில் 1 லட்சத்துக்கும் மேற்பட்ட உள்ளாட்சி பதவியிடங்களுக்கான தேர்தல் அறிவிக்கை செப். 26-இல் வெளியிடப்பட்டது. இதைத் தொடர்ந்து, வேட்புமனுக்கள் தாக்கல் தொடங்கியது. அதிமுக, திமுக உள்ளிட்ட பல்வேறு அரசியல் கட்சிகளைச் சேர்ந்தவர்கள் தேர்தலில் போட்டியிட வேட்புமனுக்களைத் தாக்கல் செய்தனர்.
3 லட்சத்துக்கும் மேல்...: 3 லட்சத்துக்கும் மேற்பட்டோர் வேட்புமனு தாக்கல் செய்திருக்கலாம் என்றும் இதுகுறித்த அதிகாரப்பூர்வ அறிவிப்பு செவ்வாய்க்கிழமை வெளியாகும் என்றும் தேர்தல் ஆணைய அதிகாரிகள் குறிப்பிட்டனர்.
இன்று பரிசீலனை: வேட்புமனுக்கள் மீதான பரிசீலனை செவ்வாய்க்கிழமை நடைபெறுகிறது.
மனுக்களைத் திரும்பப் பெற அக்டோபர் 6-ஆம் தேதி கடைசி நாளாகும்.
வாக்குப் பதிவு அக்டோபர் 17, 19-இல் இரு கட்டமாக நடக்கிறது. வாக்கு எண்ணிக்கை அக்டோபர் 21-இல் நடைபெறுகிறது.

Sunday, 2 October 2016

முதல்வர் உடல் நலன் தேறி வருவது மகிழ்ச்சி அளிக்கிறது: ஆளுநர்

முதல்வர் ஜெயலலிதாவின் உடல் நலன் தேறி வருவது மகிழ்ச்சி அளிப்பதாக ஆளுநர் வித்யாசாகர் ராவ் தெரிவித்துள்ளார்.
முதல்வர் ஜெயலலிதாவின் உடல் நிலை குறித்து அறிய அப்பல்லோ மருத்துவமனைக்கு ஆளுநர் வித்யாசாகர் ராவ் சனிக்கிழமை இரவு 6.45 மணிக்கு நேரில் சென்றார்.
இரவு 7.15 மணி வரை, அதாவது சுமார் 30 நிமிஷங்கள் அவர் மருத்துவமனையில் இருந்து முதல்வருக்கான சிகிச்சைகள் குறித்துக் கேட்டறிந்தார்.
இது தொடர்பாக, ஆளுநர் மாளிகை சனிக்கிழமை இரவு வெளியிட்ட அறிக்கை: முதல்வர் ஜெயலலிதா சிகிச்சை பெற்று வரும், சென்னை கிரீம்ஸ் சாலையில் உள்ள அப்பல்லோ மருத்துவமனைக்கு ஆளுநர் வித்யாசாகர் ராவ், சனிக்கிழமை நேரில் சென்றார். முதல்வர் ஜெயலலிதாவுக்கு அளிக்கப்பட்டு வரும் சிகிச்சைகள் குறித்து ஆளுநரிடம் மருத்துவமனையின் தலைவர் பிரதாப் சி.ரெட்டி எடுத்துரைத்தார்.
பின்னர் முதல்வர் ஜெயலலிதா சிகிச்சை பெற்று வரும் அறைக்கு ஆளுநர் வித்யாசாகர் ராவ் சென்று பார்வையிட்டார். முதல்வர் ஜெயலலிதாவுக்கு சிறந்த முறையில் சிகிச்சை அளித்து வருவதற்காக மருத்துவர்களுக்கு ஆளுநர் பாராட்டு தெரிவித்தார்.
முதல்வர் ஜெயலலிதா உடல் நலன் தேறி வருவது கண்டு தாம் மகிழ்ச்சி அடைவதாகவும் ஆளுநர் குறிப்பிட்டார். முதல்வர் ஜெயலலிதாவுக்கு மிகச் சிறப்பான முறையில் மருத்துவ சிகிச்சை அளித்து வரும் மருத்துவர்களுக்கு பாராட்டுதல்களையும் அவர் தெரிவித்துக் கொண்டார்.
முதல்வர் விரைவில் குணமடைய வாழ்த்துகளைத் தெரிவித்ததுடன், பழக்கூடையையும் ஆளுநர் அளித்தார்.
மக்களவை துணைத் தலைவர் எம்.தம்பிதுரை, அமைச்சர்கள் ஓ.பன்னீர்செல்வம், எடப்பாடி கே.பழனிசாமி, பி.தங்கமணி, எஸ்.பி.வேலுமணி, சி.விஜயபாஸ்கர், தலைமைச் செயலாளர் பி.ராம மோகன ராவ், அரசு ஆலோசகர் ஷீலா பாலகிருஷ்ணன், சுகாதாரம்-குடும்ப நலத் துறை முதன்மைச் செயலாளர் ஜெ.ராதாகிருஷ்ணன் உள்ளிட்டோர் ஆளுநரை வரவேற்றனர்.

Saturday, 1 October 2016

பெட்ரொல் விலை உயர்வு டீசல் விலை மாற்றம்

சர்வதேச சந்தையில் கச்சா எண்ணெய் விலை நிலவரத்தின் அடிப்படையில் இந்தியாவில் பெட்ரோல், டீசல் விலையை 15 நாட்களுக்கு ஒருமுறை எண்ணெய் நிறுவனங்கள் மாற்றியமைத்து வருகின்றன.இந்நிலையில்  பெட்ரோல் விலை லிட்டருக்கு 28 காசுகளாக உயர்த்தப்பட்டுள்ளது.  டீசல் விலை லிட்டருக்கு 6 காசுகளாக குறைக்கப்பட்டுள்ளது. இந்த விலை குறைப்பு இன்று நள்ளிரவு முதல் அமலுக்கு வருகிறது.


கர்நாடகம் தண்ணீர் திறக்கவும், மத்திய அரசு காவிரி மேலாண்மை வாரியம் அமைக்கவும் சுப்ரீம் கோர்ட்டு உத்தரவு

மத்திய அரசு 3 நாட்களுக்குள் காவிரி மேலாண்மை வாரியத்தை அமைக்க சுப்ரீம் கோர்ட்டு உத்தரவிட்டு உள்ளது.

காவிரி நீர் பங்கீட்டு பிரச்சினை 

தமிழகத்தில் சம்பா சாகுபடிக்கு போதுமான தண்ணீரை திறந்து விடுமாறு கர்நாடக அரசுக்கு உத்தரவிட வேண்டும் என்று கோரி தமிழக அரசின் சார்பில் தாக்கல் செய்யப்பட்ட மனுவை விசாரித்த சுப்ரீம் கோர்ட்டு, தமிழகத்துக்கு காவிரியில் கடந்த 21–ந் தேதியில் இருந்து 27–ந் தேதி வரை வினாடிக்கு 6 ஆயிரம் கனஅடி வீதம் தண்ணீர் திறந்துவிட வேண்டும் என்று உத்தரவிட்டது.

ஆனால், இந்த உத்தரவை அடுத்த ஆண்டு ஜனவரி 31–ந் தேதிக்கு பிறகு நடைமுறைப்படுத்தும்படி உத்தரவிடுமாறு கேட்டு கர்நாடக அரசு திருத்த மனு தாக்கல் செய்தது.

சுப்ரீம் கோர்ட்டு உத்தரவு 

இதற்கு தமிழக அரசு எதிர்ப்பு தெரிவித்து இடைக்கால மனு தாக்கல் செய்தது. அதில், ‘கடந்த 5, 12, 20–ந் தேதிகளில் சுப்ரீம் கோர்ட்டு பிறப்பித்த உத்தரவு எதையும் கர்நாடகம் நடைமுறைப்படுத்தவில்லை என்றும், இது கோர்ட்டை அவமதிக்கும் செயல் என்பதால், காவிரி நீர் பங்கீடு தொடர்பாக சுப்ரீம் கோர்ட்டு சமீபத்தில் பிறப்பித்த உத்தரவை நிறைவேற்றும் வரையில் கர்நாடகத்தின் எந்த திருத்தம் கோரும் மனுவையும் விசாரணைக்கு எடுத்துக் கொள்ளக்கூடாது’ என்று கூறப்பட்டு இருந்தது.

 இந்த மனுக்களை கடந்த செவ்வாய்க்கிழமை விசாரித்த சுப்ரீம் கோர்ட்டு நீதிபதிகள் தீபக் மிஸ்ரா, யு.யு.லலித் ஆகியோர் அடங்கிய அமர்வு, இந்த பிரச்சினை தொடர்பாக தமிழகம் மற்றும் கர்நாடக மாநில அரசுகளை மத்திய அரசு அழைத்து பேசவேண்டும் என்று உத்தரவிட்டது.

டெல்லியில் பேச்சுவார்த்தை 

அதன்படி, மத்திய அரசு நேற்று டெல்லியில் இரு மாநில அரசுகளையும் அழைத்து பேச்சுவார்த்தை நடத்தியது.

மத்திய மந்திரி உமாபாரதி தமிழக, கர்நாடக மாநில அரசுகளுடன் நேற்று மத்திய அரசு நடத்திய பேச்சுவார்த்தையில் எந்த முடிவும் ஏற்படவில்லை.
 
சுப்ரீம் கோர்ட்டில் அறிக்கை 

உமா பாரதி தலைமையில் நடைபெற்ற பேச்சுவார்த்தை விவரங்களை மத்திய அரசு இன்று சுப்ரீம் கோர்ட்டில் தாக்கல் செய்தது.

காவிரி மேலாண்மை வாரியம்

இன்று வழக்கு விசாரணைக்கு வந்தது, அப்போது சுப்ரீம் கோர்ட்டு, மத்திய அரசு 3 நாட்களுக்குள் காவிரி மேலாண்மை வாரியத்தை அமைக்க   வேண்டும் என்று உத்தரவிட்டது.

அக்டோபர் 4-ம் தேதிக்குள் காவிரி மேலாண்மை வாரியத்தை மத்திய அரசு அமைக்கவேண்டும். காவிரி பாயும் மாநிலங்களான தமிழகம், கர்நாடகா, கேரளா, புதுச்சேரி ஆகிய மாநிலங்கள் தங்களது தரப்பு பிரதிநிதியை நாளை மாலை 4 மணிக்குள் அறிவிக்கவேண்டும் என்று சுப்ரீம் கோர்ட்டு உத்தரவிட்டு உள்ளது.  

கர்நாடகாவிற்கு உத்தரவு

இன்றும் சுப்ரீம் கோர்ட்டு கர்நாடகா, தமிழகத்திற்கு தண்ணீர் திறக்க உத்தரவிட்டது. காவிரியில் தமிழகத்திற்கு நாளை முதல் அக்டோபர் 6-ம் தேதி வரையில் வினாடிக்கு 6 ஆயிரம் கனஅடி தண்ணீரை திறக்க சுப்ரீம் கோர்ட்டு உத்தரவிட்டது.

கடந்த 27–ந் தேதியன்று காவிரி நதிநீர் பங்கீடு தொடர்பான வழக்கு சுப்ரீம் கோர்ட்டில் விசாரணைக்கு வந்தது அப்போது மத்திய அரசு, காவிரி மேலாண்மை வாரியத்தை 4 வாரங்களுக்குள் அமைக்க வேண்டும் என்று சுப்ரீம் கோர்ட்டு உத்தரவு பிறப்பித்தது. இப்போது மூன்று நாட்களுக்குள் வாரியத்தை அமைக்கவேண்டும் என்று சுப்ரீம் கோர்ட்டு உத்தரவிட்டு உள்ளது மிகவும் முக்கியமானதாக பார்க்கப்படுகிறது.